Éxodo 31 - Cofán: Chiga Tevaen'jen

Cachuicco'je'ttive ñoñasundeccu

¹ Na'su Chiga Moisésnga qquen su:

² “Que canjan, Judá aindeccu'su Bezaleel, tsa Uri dutssi'yema gi in'jan cuintsu ñama cachuicco'je'ttive ñoñañe. Tsambe yaya ccashe'ye tsu Hur.

³ Nane Chiga Qquendya'pa tisenga ca'nimba in'jaensi tsu osha'chove atesupa, injama'choni agattoenqquia'caen cuname in'jamba ñotsse ñoñaña'chove in'jaña.

⁴ Toya'caen osha'choma tisu in'janqquia'caen ñotsse divoja'choi'ccu divojapa ñoñaña. Nane cori, totoacori, cu'a yoshavama semamba jongoesu divoja'choi'ccu in'jan'da tsa'caen tsu ñoñaña.

⁵ Bare'cho patuma'qque veyaratssia've giyaemba ancancaeñe'qque tsu atesu. Toya'caen quini'ccoma semamba ñoñaña'chove'qque tsu atesu. Nane osha'chove ñoñañe tsu atesu.

⁶ Toya'caen gi Dan aindeccu'su Ahisamac dutssi'ye, Aholiabma, in'jan cuintsu Bezaleelma fuiteye. Nane poiyi'cco majan atesu'chondeccuma gi in'jaen cuintsu ti'tsse'tsse atesupa pa'ccoma ña mandaqquia'cantsse ñoña'faye.

⁷ Nane tsendeccu tsu qquen ñoña'faya'cho: ñai'ccu cachuicco'je'tti, a'i'ccu injancco'fa'cho cafon, tsambe ombanga corima ñoña'cho piccofin'di, osha'cho vase'je'cho cachuicco'je'tti'su jincho,

⁸ panma ccutsian'jen'cho mesa, tsani jincho vase'je'cho, cori tuñoma ccutsian'jen'cho, tsani jincho vase'je'cho, ñome'bama ccuiñamba Chiganga oque oraen'jen'cho,

⁹ Chiganga afeye oque oraen'jen'cho osha'cho tsani jinqque'su, tivema otishiye boña'jen'ccu, toya'caen tsa ccutsu'je'chove'qque. Nane pa'cco tsave tsu ñoña'faya'cho.

¹⁰ Toya'caen tsu Chigama afa'su Aarón, tise dutssiyendeccuma'qque, Chigama afasundeccuve tsomba, cachuicco'je'ttinga cani'jeña'chove ondiccu'je'cho sarupave ñoña'faya'cho.

¹¹ Chigambe qquen canjaeñe yayapaenqque'suve toya'caen cachuicco'jeccunga oque oraenqque'su ño'metssia ñome'bave ñoña'faya'cho. Nane tsendeccuta tsu pa'ccoma ña mandaqquia'cantsse nani'faya'cho”

Manda'cho patufin'dima afe'cho

¹⁸ Na'su Chigaja Sinaí ccotta'cco'ye Moisésnga afa nanimba dos patufin'dima afe tise manda'chove tise tsimian'ccoi'ccu tevaen'choma.