Éxodo 24 - Cofán: Chiga Tevaen'jen

Chiga injanccoye afa'cho

¹ Na'su Chigaja Moisésnga su: —Ña can'jeni ansundeja, que, Aarón, Nadab, Abiú, toya'caen setenta israe'su coenzandeccui'ccu. Tsa'ma biaccaccatsseyi jipa tse'ttingayi ccaru'faja.

² Jo'su queyi qui ñanga catseye osha. Tsa cca'indeccuta tsu ñanga catse'ma'sia. Toya'caen aindeccuja quei'ccu fae'ngae ansundeye osha'fambi.

³ Tsa'caen pañamba Moisésja Na'su Chiga afapa manda'choma aindeccunga condase. Pañamba poiyi'cco fae'ngae in'jamba qquen su'fa: —Jinge pa'cco Na'su Chiga manda'choma pañamba tsoñe.

⁴ Tsa'caen su'fasi Moisésja pa'cco Na'su Chiga su'choma tevaen. Ccaqui a'ta ñoa'me sinte'yi jangipa ccotta'cco tsosiccuni Chiganga afeye oque'je'chove ñoña. Toya'caen dose patu biaccova'ma'qque ccutsutsian cuintsu dose Israel naccuve canjeñe.

⁵ Omboe Moisésja israe'su tsandiendeccuma manda cuintsu vaura quitsayema fi'ttipa Na'su Chiganga oque oraen'faye; toya'caen Chigama ñoquiaña'chove'qque afe'faye.

⁶ Moisésja tsa'su anjampama enttingeve tasanga boña. Toya'caen enttingeve tsa Chiganga afeye oque'je'chonga zanzan.

⁷ Omboe Moisésja Chigai'ccu injancco'fa'cho tevaen'jema poiyi'cco paña'jen'ni afa. Afasi pañamba su'fa: —Jinge pa'cco Na'su Chiga manda'choma ñotsse in'jamba tson'faye.

⁸ Tsa'caen su'fasi Moisésja anjampama isupa aindeccunga zanzapa qquen su: —Va anjampa tsu que'i Na'su Chigai'ccu injancco'fa'choma canjaen, que'i tayo tise condase'choma pañasi.

⁹ Tsomba Moisésja Aarón, Nadab, Abiú, toya'caen setenta israe'su coenzandeccui'ccu ccotta'cconga ansunde.

¹⁰ Tseni tsu atte'fa israendeccumbe Chigama. Nane tise tsu'tte tsosiccuni tsu veyaratssia totoa patiacaen chanjun. Toya'caen sefaccoa'caen a'tatssi tsu.

¹¹ Tsa'caen israe'su joccapitssia nasundeccu Chigama atte'ma mingae'qque da'fambi. Nane toya tsu cansepa amba cui'je'fa.

Moisés Sinaí can'jen'cho

¹² Tsonsi Na'su Chigaja Moisésnga su: —Ña can'jen'cho ccotta'cconga ansundepa tse'tti ñame ronda'jeja. Nane quenga gi afeye in'jan dos patufin'dinga ña manda'chove tevaen'choma cuintsu israendeccuma manda'jeye.

¹³ Tsama pañamba Moisésja jangipa tisema shondo'su Josuéi'ccu Chiga can'jen'cho ccotta'cconga ansunde.

¹⁴ Israe'su coenzandeccumajan qquen su: —Que'ija va'tti ronda'je'faja ingi ccase jiya'ngae. Vani que'i'ccu tsu can'jeña Aarón toya'caen Hur. Tsendeccunga qui jongoesu vana'chove an'bian'da condaye osha'fa.

¹⁵ Tsa'caen supa Moisésja ccotta'cconga ansunde. Tsa ccotta'cco tsu pa'cco unjimba'ccoyi ccutsu'cho.

¹⁶ Na'su Chiga ñotssia tsu Sinaí ccotta'cconi can'jen. Nane seis a'ta tsu tsa unjimba'ccoja ccotta'ccoma picco'cho. Toya'caen septimo a'ta tsu Na'su Chigaja tsa unjimba'cco'ye Moisésma ttu'se.

¹⁷ Israendeccu tsosiccuni ccutsu'chondeccu Na'su Chiga ñotssiama attesi tsu ñoa'me ccotta'cco tansin'chone si'nge anchanda'jeqquia'caen attian tise'pa tso'fenga.

¹⁸ Tsonsi Moisésja tsa unjimba'cconga ca'nimba ccotta'cconga ansundepa cuarenta a'ta pa'cco cuarenta cose'qque tseni can'jen.