Éxodo 23 - Cofán: Chiga Tevaen'jen

Chigama sefacconi'su shondo'su

²⁰ “Que canjan, ña gi que'ima o'tie moeña ñama sefacconi'su shondo'suma cuintsu que'ima coirapa angaye que'imbe ñoña'cho andeni.

²¹ Tise'ye attufa'fajama. Tisema ñotsse paña'faja pañambiqquia'caen tsinconsa'ne. Nane tiseja ñoa'me ña'cantsse afa'su tsu. Que'i egae tsincon'choma aqque'paya'bi tsu.

²² Tsa'ma ñama sefacconi'su shondo'su su'choma ñotsse pañamba pa'cco ña manda'choma tson'ninda gi ñajan que'i'ccu iyiccosundeccui'ccu iyicco'jeya; toya'caen que'ima se'pisundeccuma gi sepi'jeya.

²³ Nane ñama sefacconi'su shondo'su tsu que'ima o'tie japa angaya tsa amorreo, hitita, ferezeo, cananeo, heveo, toya'caen jebuseondeccu can'jen'cho andeni. Tsendeccuma gi me'tsse sefaeña.

²⁴ Tsa andesundeccu tson'jen'chonga ma'de'fajama. Tsendeccumbe chiganga ccaru'fajama ni tsanga iñajan'fajama. Tsa'ma tise'pa ñoña'cho chigandeccuma me'tsse catipa tise'pa iñajan'jen'cho patu ccutsu'choma'qque ttova cati'faja.

²⁵ Que Na'su Chigangayi iñajan'jen'faja. Tsa'caen iñajansi tsu que'i pan, toya'caen que'i tsa'ccuma'qque ñotsse tsoña. “Toya'caen paqque'suma'qque gi que'i'ye joqquitssiaña.

²⁶ Tsomba gi que'ima tsoña tisu paya'cho a'ta nepimbi'te pa'masia've. Toya'caen ni fae pushesuyi'qque tsu que'i ande'suja toya chu'ama cati'je'cho ni dusumbiyi'qque jincho'faya'bi.

²⁷ “Nane ña gi tsoña cuintsu poiyi'cco cca'isundeccuja ña que'i'ccu can'jen qquen in'jamba dyojo'faye. Toya'caen mani'su aindeccunga que'i ja'fa'nijan tise'pa injama'choma gi qqueñaña cuintsu que'ima attepa ccuya'faye.

²⁸ Nane pa'ttanga dyopa ccuyaqquia'caen tsu heveondeccu, hititandeccu, toya'caen cananeondeccu que'ima attepa ccuya'faya.

²⁹ Fae canqque'fangayi tsani can'jensundeccuma joqquitssiaña'bi gi panshaen aqquia ande catiyesa'ne; toya'caen osha'cho putsa'su tsampini can'jenqque'su atapapa que'ima vanaesa'ne.

³⁰ Tsa'ma ti'tsse que'i atapajisi vasia've gi joqquitssiaña'ccaya cuintsu tsa andeni que'i dushundeccuja can'jen'faye.

³¹ Ñanda gi antteya cuintsu que'i ande qquen jinchoye: Cu'a marne ashaemba Filisteondeccu marni nepiya'cho. Toya'caen a'i menia'ñe ashaemba Eufrates naini nepiye. Nane quenga gi tayo afe tsa aindeccu can'jen'cho andema. Tsa'cansi que'i qui tise'pama tteya maña'faya.

³² “Tise'pai'ccu injancco'fajama ni tise'pa chigandeccuma in'jan'fajama;

³³ ni tise'pama antte'fajama cuintsu que'i'ccu fae'ngae que'i andeni can'jeñe. Nane tsa'caen fae'ngae can'jen'fajama tise'pa que'ima in'jaensi tise'pa chigandeccuma in'jamba ñama egae tsinconsa'ne. Tsa'caen tson'da qui tisupama tsangae qqueña'faya.”