Éxodo 20 - Cofán: Chiga Tevaen'jen

Diez manda'chove afa'cho

¹ Chigaja afapa pa'cco vama conda:

² “Ña gi Na'su, que Chiga, que Egiptoni tsangae sema'suve da'cho'ye somboen'su.

³ “Faesu chigave ñama'caen an'bianjama.

⁴ “Ñoña'cho chiga'can'me ñoñajama. Ni sefani jinqque'suve, ni andeni jinqque'suve, ni ande tsosini'su marni jinqque'suve chiga qquen ñoñajama.

⁵ Tsesundeccunga puntssamba iñajanjama. Nane ñañi gi Na'su, que Chiga. Sepipa Chiga gi ñama chi'gapa egae tsincon'su injama'choma somboemba tise dushundeccu, tsambe du'shumbe dushundeccu injama'choma'qque somboeña tise'pa egae tsincon'chone.

⁶ Tsa'ma ñama in'jamba pañasundeccunga gi mil omba'su dutssiyendeccunga ñotsse tsoña.

⁷ “Aqquia injanga Na'su, que Chiga inisema egae afajama. Nane Chigaja tise inisema egae afa'suma vanaembe pasaya'bi tsu.

⁸ “Injan'jen'faja ño'faya'cho a'tama tsa Na'su Chigama iñajaña'quima.

⁹ Seis a'tayi tsu semaña'cho tisu jongoesuma semaña'chove an'bian'da.

¹⁰ Tsa'ma septimo a'ta tsu ño'faya'cho, tsa que Na'suma iñajaña'qui. Tsequi a'ta jongoesuveyi'qque sema'fajama. Ni que dutssi'ye ni que onque'nge, ni quembe sema'su tsandie, sema'su pushesu, ni que aiña'cho, ni ccani'su a'i que andeni can'jen'cho'qque sema'masia tsu.

¹¹ Nane Na'su Chigaja seis a'tayi tsu sefacco, ande, mar, osha'cho tsani can'jenqque'suve agattoemba septimo a'taja ño'fa. Tsa'camba tsa Na'su Chigaja tsequi a'tama ño'faya'chove anttepa tisema iñajaña'cho a'tave tson.

¹² “Ñotsse tsu in'jaña'cho que yaya, que mamama cuintsu Chiga, que Na'su, tsain'bitsse va quenga afeya'cho andeni canseya'chove antteye.

¹³ “A'ima fi'ttijama.

¹⁴ “Tisu pushema ni tisu tsa'nduma catijama faesui'ccu canseye.

¹⁵ “Cca'najama.

¹⁶ “Afopoenjama tisupaporama dañomba afasa'ne.

¹⁷ “Tisu injamáchoni faesu an'bian'chove tisumbema'caen in'janjama; ni tise tsa'o, ni tise pushe, ni tise'be sema'su tsandie, sema'su pushesu, ni tise'be sema'su vaura, ni tise boro, ni jongoesuveyi'qque tisumbe qquen in'janjama.”

Israendeccu Chigama dyo'cho

¹⁸ Poiyi'cco israendeccu tsu tsa tsanda veyaemba afa'choma, tsonjen'cho jen'choma, toya'caen ccotta'cco'ye onfen'ba sombo'choma attesundeccu. Tsa'ma tsama attepa ñoa'me dyopa tse'ttie joqquitssi'cca'fa.

¹⁹ Tsomba Moisésma su'fa: —Afaja que, ingi quema pañañe. Tsambi'pa Chigayi inginga afa'ninda gi dyo pa'faya.

²⁰ Tsonsi Moisésja su: —¡Dyombe can'faja! Chigata tsu ji ingima atesucañe. Ñoa'me dyo'ta gi tisema dyoe'sui'ccuyi injan'jemba egae tsincombe canse'faya.

²¹ Tsa'caen aindeccu joqquitssi'je'ni Moisésja tsa Chiga can'jen'cho unjimba'cco sintssianga catse.