Éxodo 2 - Cofán: Chiga Tevaen'jen

Moisésma isu'cho

¹ Leví aindeccu'su tsandie tsa'su pushesuma pushe.

² Can'jensi dushundeccuve an'biamba ccase surie dapa tsandie du'shuve isu. Isupa cansi tsa du'shu me'detssisi attepa tres ccovu pa'cco a'tupa an'bian.

³ Tsa'ma ti'tsse a'tupa an'biañe oshambipa naifa'su shoshovima otata'cho saparonga ppiña. Nane saparonga tsa'ccu ca'nisa'ne ñotsse ccoqquiamba tsanga du'shuma ppiñamba piccopa Nilo na'en utufa'su shoshoviccunga ppiña dusian.

⁴ Toya'caen tsa du'shumbe she'shema manda cuintsu biacca ccutsupa caña'jeñe du'shuma mingae tson'fasa'ne.

⁵ Omboe faraón onque'ngeja naeni onjoñe ande. Andepa tise onjon'jen'ni tisema coira'su pushesundeccuja na'en otafa'ye pasia'je'fa. Tsa'caen pasia'je'fa'ni faraón onque'ngeja saparo shoshoviccuni duse'choma atte. Attepa manda tise'be sema'suma cuintsu tsa saparoma i'ngaye.

⁶ Isi saparoma fettapa atte tsani du'shu ppipa ina'jen'choma. Attepa tsa du'shuma mendeyepa qquen su: —Va tsu hebreondeccu'su tsandie du'shu.

⁷ Tsonsi tsa du'shumbe she'sheja sombopa faraón onque'ngema su: —¿In'jambi ti qui ña japa hebreo'su pushesuma ttu'sengaye cuintsu jipa va du'shuma chochoemba coeñañe?

⁸ Tsonsi faraón onque'ngeja su: —¡Japa ttusengaja! Tsa'caen susi du'shumbe she'sheja tise mamani japa ttu'sepa i.

⁹ Isi faraón onque'ngeja su: —Va du'shuma isupa ñambe coeñajan. Que tsa'caen coirapa coeñasi gi quenga afepoeña. Tsa'caen susi du'shumbe chanjan angapa coeña.

¹⁰ Coeñamba faraón onque'ngenga afe. Afesi ñoa'me tise du'shuma'caen in'jamba Moisésve inisian “Na'en'suma somboen'cho” qquen suye.

Moisés Egipto ande'ye ccuya'cho

¹¹ Moisésja ñoa'me coenza a'ive dapa tise antiandeccuni pasia'su ja. Tsa'caen japa atte tise'pa sema'jen'choja ñoa'me aiye'pave tson'jen'choma. Toya'caen tsu atte egipto'su a'i tise antian'su hebreoma ochha'chha'je'choma.

¹² Attepa faesu a'i caña'jensa'ne tta'ttasi me'i'onsi tsa egipto'suma fi'tti. Fi'ttipa sisipanga a'tu.

¹³ Ccaqui a'ta ccase pasia'su ja. Tsa'caen japa dos hebreondeccu tisupanaccu iyicco'je'choma atte. Attepa faesuma ti'tsse noñangian'sunga catsepa iñajampaña: —¿Jongoesie qui tisu faenga'suma tssetsse'je?

¹⁴ Tsa'caen susi tssetsse'suja su: —¿Majan tsu quemajan ingi injama'choma somboen'su na'suve tson? ¿Ñama'qque ti qui fi'ttiye in'jan egipto'suma fi'ttiqquia'caen? Tsama pañamba Moisésja ñoa'me dyo. Nane tse'i tsu in'jan tayo tise egipto'suma fi'tti'chove atesu'fa'choma.

¹⁵ Tsa'caen egipto'suma fi'tti'chove pañamba faraónjan manda cuintsu Moisésma tta'ttapa i'fasi fi'ttiye. Tsa'ma Moisésja tsene ccuyapa Madián andeni canseye ja. Tseni nepipa tsa'ccu poso jin'ttinga dyai.

¹⁶ Tseni canjen'su, Reuel, Madián ande'su Chigama afa'suja siete onque'ngeme an'bian. Tsequi a'ta tsendeccuja posoni ja'fa ovejama cuiña'jen'cho shavoccunga tsa'ccuma on'boemba tise yaya ovejama cui'ñañe.

¹⁷ Tsa'ma faesu ovejama coirasundeccu'qque jipa tsendeccuma posone se'pipa joqquitssian'fa. Tsa'caen se'pi'fasi Moisésja jangipa ccane'qque tsendeccuma joqquitssian moemba pushesundeccu i'cho ovejama cui'ña.

¹⁸ Pushesundeccu toequi tise yayani ja'fasi tise'pa yayaja iñajampaña: —¿Ma'camba qui ja'ñojan jundeyi ji'fa?

¹⁹ Tsendeccuja su'fa: —Fae egipto'su a'i tsu faesu oveja coirasundeccuma joqquitssiamba ingimbe o'tie tsa'ccuma somboemba ovejama cui'ña.

²⁰ Tsa'caen su'fasi Reuelja su: —¿Mani tsu tsa tsandieja can'jen? ¿Jongoesie qui tisuveyi catipa ji'fa? Japa ttusenga'faja cuintsu jipa añe.

²¹ Tsa'caen tsonsi tsu Moisésja tsa Reuel ettini canseye ashaen. Can'jensi Reuelja tise onque'nge, Séforama, Moisés pusheve antte.

²² Pushesi can'jemba tsandie du'shuve isusi Moisésja tisema inisian Gersón, “Ñanda gi faesu andene jipa faesu andeni can'jen'cho” qquen suye.

²³ Tsa'caen jasi can'jemba egipto'su na'suja pa. Israendeccuja ñoa'me vana'jemba ñombi'yepa fundo'je'fa tise'pa sema'suve tsangae ca'ni'choma asi'ttaemba. Tsa'caen ina'jen'fa'choma Chigaja pañamba

²⁴ tise tayopi Abraham, Isaac toya'caen Jacobi'ccu injancco'fa'choma in'jan.

²⁵ Nane Chiga Quitsaja israendeccu vana'jen'choma attepa tise'pama ñotsse in'jamba fuiteye ashaen.