Éxodo 17 - Cofán: Chiga Tevaen'jen

Patuvo'cho'ye tsa'ccu sombo'cho

¹ Poiyi'cco israendeccu Sin a'i menia'ñe sombopa vasia've ja'ñacca'fa Na'su Chiga tise'pama mandaqquia'caen. Tsa'caen ja'ñaccapa Refidimni nepipa tse'tti can'jen'fa. Tsa'ma tse'ttija tsa'ccuve me'i'on tsu aindeccu cui'jeya'chove.

² Tsa'cansi tsu aindeccuja Moisési'ccu qquen afacco'fa: —¡Tsa'ccuma afeja ingi cui'ye! Tsonsi Moisésja su: —¿Jongoesie qui ñai'ccu afacco'fa? ¿Jongoesie qui Chigama noñangiancán'fa?

³ Tsa'ma aindeccuja tsaqquie'supa Moisésma afase'fa qquen supa: —¿Jongoesie qui ingima Egiptone somboen? ¿Aqquia ingima tsaqquie'sian fi'ttiye ti qui somboen, toya'caen ingi dushundeccu, ingi aiña'choi'ccu fae'ngae?

⁴ Pañamba Moisésja Na'su Chigama iñajan: —¿Ma'caen gi va aindeccunga tsoña? Maqui'ta tsu ñama patui'ccu fi'tti'faya.

⁵ Tsonsi Na'suja su: —Majan coenzandeccuma angapa canqquesundeccu caña'jen'fa'ni panshanjan. Toya'caen na'ema ochhai'je'cho quini'ccoma'qque angapa panshanjan.

⁶ Ñanda gi Horeb ccotta'cco'su patuvo'choni queve ronda'jeya. Tsanga nepipa patuvo'choma ochhaisi tsu tsa'ccuja somboya cuintsu aindeccu cu'i'faye. Moisés poiyi'cco israe'su coenzandeccu caña'jen'ni

⁷ tsa'caen tsomba tse'ttima Meriba qquen inisian. Nane israendeccu afacco'fattisi tsa'caen inisian. Toya'caen Masah qquen inisian, israendeccu Chigama noñangiamba'ttisi. Nane noñangiancamba tsu qquen su'fa: “¿Can'jen miconde Na'su Chigaja ingi'ccu? ¿Tsambi'ta me'in?”

Amalecitandeccui'ccu geraen'fa'cho

⁸ Tsa'caen israendeccu Refidimni can'jen'ni amalecitandeccuja israendeccui'ccu geraeñe ji'fa.

⁹ Tsonsi Moisésja Josuéma su: —Majan tsandiendeccuma avusepa amalecitandeccui'ccu iyicco'faja. Ñanda gi tu'i Chiga quini'ccoma indipa ccotta'cco'cho ombani ccutsuya.

¹⁰ Josuéja Moisés mandaqquia'caen tsomba amalecitandeccui'ccu iyiccoye ja. Tsa'caen jasi Moisés, Aarón toya'caen Hur tsu ccotta'cco'chonga ansunde'fa.

¹¹ Iyicco'je'fasi Moisés tise tivema yasa'ninda tsu israendeccu ganajin'fa. Tsa'ma Moisés antte'nijan amalecitandeccu ganajin'fa.

¹² Tsa'caen tson'jemba Moisés tive quimbisi patuma isupa ccuiña'fa cuintsu tsanga dyaiye. Dyaisi Aarón toya'caen Hur poifa'su tivema indicho'fa cuintsu yasachoye. Tsa'caen indicho'fasi Moisésja chiga amppiya'ngae anttembitsseyi yasajin dyai.

¹³ Tsa'caen tsonsi Josuéja tisu aindeccui'ccu amalecitandeccuma ganamba matichi'ccu fitti'tti.

¹⁴ Tsonsi Na'su Chigaja Moisésnga su: —Va tson'choma tevaenjan tisu injan'jeñe. Toya'caen Josuénga suja amalecitandeccuma fi'ttipa gi tise'pane injan'jen'choma'qque metsse ccuchaya.

¹⁵ Tsomba Moisésja Chiganga afeye oque'je'chove ñoñamba tsama qquen inisian “Na'su Chiga tsu ña bandera.”

¹⁶ Toya'caen tsu su: “¡Na'su Chiga banderama indipa angacán'faya'cho! ¡Na'su Chiga tsu Amalecitandeccui'ccu tsangae geraen'jeña!”