Éxodo 16 - Cofán: Chiga Tevaen'jen

Chiga manáma afe'cho

¹ Can'jemba pa'cco israendeccu Elimne sombopa Sin a'i menia nepi'fa. Tsata tsu Elim Sinaí enttingeni jin. Tsequi tsu segundo ccovu quince a'tave nepi tise'pa Egiptone sombopa ja'cho a'tane.

² Tseni a'i menia aindeccuja Moisés toya'caen Aarónma afaseye ashaen'fa

³ qquen supa: —Ma'caen'qque Na'su Chiga ingima Egiptone somboembiecan'da gi tseni pa'faye'can. Tseninda gi aña'cho api'ccu pporotsse dyaipa tteppu'tsse an'jen'fa. Tsa'ma que'ija va a'i menianga i'fa ingi poiyi'ccoma qquipoe'sian fi'ttiye.

⁴ Tsonsi Na'su Chigaja Moisésnga su: —Unjin tuiqquia'caen gi sefacconi'su aña'cho nama amppiañe tson'jen cuintsu an'faye. Aindeccuta tsu poi a'ta japa tsequi a'tane'ñi tai'je'faya'cho. Atesuye gi in'jan majan ñama paña'faya'chove toya'caen majan me'inchoa've.

⁵ Tsa'ma sexto a'ta tsu tisu pa'cco a'ta tai'je'choma ti'tsse'tsse dos a'tane taiya'cho.

⁶ Tsama pañamba Moisés toya'caen Aarón israendeccunga conda'fa: —Sime tsonsi qui in'jan'faya Na'su Chiga que'ima Egiptone somboen'chove.

⁷ Toya'caen tu'i sinte qui atte'faya Na'su Chigambe ñotssiama. Nane tayo tsu paña que'i tisema afase'choma. ¿Ñoa'me ingima afase qquen in'jamba ti qui ingima afase'fa?

⁸ Toya'caen tsu Moisésja su: —Sime tsu Na'su Chigaja aña'choma afeya que'i an'faye. Toya'caen tu'i sinte tsu panma tsain'bitsse afeya. Nane tayo tsu paña que'i tisema afase'choma. Ñoa'me ingitsse tson'su'fambi gi. Que'ita qui ingima afase'fambi. Tsa'ma Na'su Chigama qui afase'fa.

⁹ Omboe Moisésja Aarónma su: —Poiyi'cco israendeccunga condaja cuintsu Na'su Chiga attian'chonga catse'faye. Nane tiseja paña'jen tisema afase'choma.

¹⁰ Tsa'caen susi Aarón israendeccunga afa'je'ni tse'faei'ccuyi poiyi'cco tsendeccu a'i menia'ma camba atte'fa Na'su Chiga unjimba'cco'ye chanjumba attian'choma.

¹¹ Tsonsi Na'su Chigaja Moisésnga su:

¹² —Paña gi israendeccu afase'choma. Tsendeccunga afapa qquen suja: ‘Sime qui aña'choma an'faya. Toya'caen tu'i sinte'ta panma qui tte'pputsse an'faya. Tse'i qui in'jan'faya ñoa'me ñajan Na'su que'i Chigave.’

¹³ Tsequi sime tsu tsain'bitssi yayapa chivi'ri jipa canqquenga on'ba'e ande'fa. Toya'caen ccaqui sinte'ja suruno shoshovinga boqquia'caen tise'pa can'jen'cho utufani sheque.

¹⁴ Tsa'caen bo'cho samba'ta tsu ta'e'choccoe ishopa pa'cco a'i menianga sheque.

¹⁵ Tsa'ma israendeccuja jongoesuve atesumbipa tsesuma attepa tisupanaccu asi'ttaen'fa: “¿Vaja jongoesu te?” Tsonsi Moisésja su: —Vata tsu pan, Na'su Chiga que'i añe afe'cho.

¹⁶ Tsa'ma qquen tsu Na'su Chigaja tsane manda: Poiyi'cco que'i tisupa aña'ccoeyi tai'faja. Nane mañi'cco tisupa tsaoni can'jen'chone in'jamba fae a'ine dos litroa'caen tsu tai'faya'cho.

^17-18 Tsa'caen susi israendeccuja tsa'caen tson'fa. Na'su agattopa mandaqquia'caen tsu majan ti'tsse majan bove'ccoe tai'fa. Majan ti'tsse tai'ni'qque antteyembi. Ni re'riccoe tai'su'qque shacambitsse an'fa. Nane poiyi'cco tsu tisupa aña'ccoeyi tai'fa.

¹⁹ Omboe Moisésja su: —Majañi'qque tsu ccaqui a'tane antte'masia.

²⁰ Tsa'caen Moisés su'choma paña'ma majandeccuja ccaqui a'tane'qque anqque'suma antte'fa. Tsa'ma tise'pa anttepa ñoña'choja misiangepa tssu'jutsse tssu'jian. Tsa'caen tson'fasi Moisésja tsendeccuma iyicca'ye.

²¹ Poiyi'cco tsu tisupa aña'chove sinte'yi tai'je'fa. Nane coe'je de'ninda pa'cco tsu tssutssu'je.

²² Tsa'ma sexto a'ta tsu dos a'tane tai'fa. Tsata tsu fae a'ine ccattufayi litroqquia'can. Tsa'caen tai'fasi israe'su coenzandeccuja Moisésnga conda'su ja'fasi

²³ Moisésja su: —Tsa'can tsu Na'su Chiga manda'choja. Tu'i tsu ño'faya'cho a'ta. Nane ño'fapa Na'su Chigama iñajaña'cho a'ta tsu. Tsa'cansi ja'ñoñi sho'ccoeña'chove an'bian'da sho'ccoen'faja. Toya'caen goa'ttiaña'chove an'bian'da goa'ttian'faja. Ja'ño an antteye'choma coira'faja tu'ine.

²⁴ Tsendeccuja Moisés manda'choma pañamba tsequi a'ta an antteye'choma ccaquine ñoña'fa. Ccaqui a'tasi tise'pa ñoña'choja tssu'jiambi ni misiangembi.

²⁵ Tsonsi Moisésja su: —Ja'ño an'faja. Ja'ño tsu ño'fapa Na'su Chigama iñajaña'cho a'ta. Nane ja'ño a'taja que'i tai'je'ni sombo'masia tsu.

²⁶ Seis a'tayi tsu tai'je'faya'cho. Tsa'ma septimo a'taja ño'faya'cho a'tasi sema'ma'quia a'ta tsu.

²⁷ Tsa'ma majandeccuja septimo a'ta'qque taiye japa jongoesuveyi'qque atte'fambi.

²⁸ Tsonsi Na'su Chigaja Moisésnga su: —¿Mi'nge'e'qque qui ña atesian'choma pañambiqquia'caen ña manda'choma tson'fambi?

²⁹ Ñotsse in'jan'faja ña Na'su gi ño'faya'cho a'tave que'inga antte. Tsa'camba gi sexto a'tayi dos a'ta aña'chove afe. Tsa'cansi tsu septimo a'taja majañi'qque tisu tsa'o'ye sombombe'yi can'faya'cho.

³⁰ Tsa'caen susi aindeccuja septimo a'tama ño'faya'cho a'tave ñoña'fa.

³¹ Israendeccuja tise'pa taipa an'jen'choma manáme qquen inisian'fa. Tsata tsu tototssi, chipiri culantro choa'can'cho'cco. Nane cuñajun'choa'caen ansintssi tsu.

³² Omboe Moisésja su: —Tsa'can tsu Na'su Chiga manda'choja: ‘Dos litro manáma taipa apinga on'boemba ñotsse coira'faja cuintsu que'i omba'su dushundeccu'qque atte'faye. Attepa tsu in'jan'faya ña que'ima Egiptone somboemba a'i menia angapa ofian'jen'choma.’

³³ Tsomba Moisésja Aarónga su: —Dos litro manáma taipa apinga on'boenjan. Tsomba Na'su Chiga attian'jen'ttinga ccutsiamba coiraja cuintsu que'i omba'su dushundeccu atte'faye.

³⁴ Na'su Chiga Moisésnga mandaqquia'caen Aarónjan apinga on'boemba Chiga a'i'ccu fae'ngae injancco'fa'chove canjaen'cho cafon jin'ttinga ccutsiamba coira'je.

³⁵ Israendeccuja cuarenta canqque'fa pa'cco tsesu manáma amba canse'fa. Nane a'i can'jeni nepiya'ngae tsu tsa'caen an'jen'fa. Canaán andeni nepipa ca'niña'ngae tsu manáma an'jen'fa.

³⁶ (Dos litro tsu, tise'pa aya'fangae, fae gomer. Diez gomer tsu fae efa.)