Éxodo 15 - Cofán: Chiga Tevaen'jen

Tsa'ccu inza'a

²² Tsomba Moisés israendeccuma avusepa Cu'a marne sombopa a'i menia'su Shur andeni ja. Nane tres a'ta pa'cco ja'ma tsa'ccuve attembitsse jacan'fa.

²³ Tsa'caen jacamba Marani nepipa tsa'ccuma atte'ma cu'iye osha'fambi panshaen inza'osi. Tsa'cansi tsu tse'ttima Marave inisian'fa.

²⁴ Tse'ttinga tsu aindeccuja Moisésma afasepa qquen iñajampaña'fa: “¿Jongoesuma gi cu'ifaya?”

²⁵ Tsonsi Moisésja Na'su Chigama iñajan cuintsu tisema fuiteye. Iñajansi Na'suja quinisisiccoma canjaen. Tsa'caen canjaensi Moisés tsa quinisisiccoma saipa tsa'ccunga ttovasi ñoa'me ñotssia tsa'ccuve da. Nane tseni tsu Na'su Chigaja israendeccu tson'choma atesuye in'jamba tsa'caen tson. Toya'caen tsu Na'su Chigaja israendeccunga qquen supa manda'choma afa tise'pa ma'caen canse'faya'chove:

²⁶ “Ña, que Na'su Chiga su'choma ñotsse in'jan'faja. Ña in'janqquia'caen tson'faja. Ña manda'choma pañamba tsomba pa'ccoma ña mandaqquia'caen nani'faja. Tsa'caen tson'fa'ninda gi ni fae paqque'suveyi'qque egiptondeccuma'caen tsoñambi. Nane ña gi Na'su Chiga que'ima ccushaen'su.”

²⁷ Marane sombopa Elimni nepi'fa. Tseni tsu dose tsa'ccu sombo'je'tti jin. Toya'caen setenta quini'jin tseni ccutsu'fa. Tseni nepipa tsa'ccu jin'ttini can'jen'fa.