Éxodo 14 - Cofán: Chiga Tevaen'jen

Israendeccu Cu'a Marma ise'cho

¹ Na'su Chigaja ccase afapa Moisésnga su:

² “Israendeccuma condaja cuintsu toequi japa Pihahirot isevetsse ana'faye. Nane Pihahirot tsu Baal-zefón isevetsse Migdolma panshamba mar jin'tti. Tseni nepipa tsu mar jin'ttinga ñoñamba ana'faya'cho.

³ Tsa'caen tson'fasi tsu faraónjan qquen in'jaña: ‘Israendeccuja maningae jaya'chove atesumbipa qquepa a'i menia jacan'fa.’

⁴ Tsa'ma ña gi faraónma in'jaeña cuintsu iyicca'yepa que'ima mandiañe. Tsonsi gi ña oshacho'choma tisei'ccu toya'caen tise sundarondeccui'ccu canjaeña. Tse'i tsu egiptondeccuja ñamajan Na'su Chiga qquen in'jan'faya.” Tsama pañamba israendeccuja tsa'caen tson'fa.

⁵ Tsa'caen tson'jen'fa'ni egipto'su na'sunga conda'fa israendeccu ccuyapa ja'choma. Pañamba faraón toya'caen tisema shondosundeccu'qque asi'ttaemba ccaningae in'jamba qquen su'fa: “¿Jongoesu qquen in'jamba gi antte'fa cuintsu israendeccu ingi'be sema'jen'choma anttepa tsa'caen ja'faye?”

⁶ Tse'faei'ccuyi faraónjan manda cuintsu tise cavayo qquitssasi geraen'jen'cho caroma junde ñoña'faye. Ñoña'fasi tise sundarondeccuma anga.

⁷ Nane seisciento caro ñotssia, toya'caen pa'cco Egipto ande'su caroma'qque anga. Poi caronga tsu sundaro nasundeccuja ja'fa.

⁸ Tsa'caen Na'su Chiga in'jaensi tsu faraónjan iyicca'yepa israendeccuma mandian. Mapán Na'su Chiga tisu oshacho'choi'ccu israendeccuma somboe'ni'qque tsu faraónjan toya iyicca'yepa mandian.

⁹ Egiptondeccuja pa'cco tise'pa sundaro, tise'pa caro, tise'pa cavayoi'ccu sombopa israendeccuma mandian'fa. Tsa'caen mandiamba mar otafa Pihahirot jin'tti tsa Baalzefón isevetsse anamba can'jen'fa'choma atte'fa.

¹⁰ Israendeccuja tsa'caen egiptondeccu catseji'fa'choma attepa ñoa'me dyopa Na'su Chigama iñajan'fa cuintsu tise'pama fuiteye.

¹¹ Tsomba Moisésnga su'fa: —¿Egipto andeninda ti atu'ttive me'i'on que tsene ingima somboensi jipa va a'i menia'ni paye? ¿Jongoesie qui ingima tsa'caen tsincon? ¿Jongoesie qui ingima Egiptone somboen?

¹² Qqueña'si gi toya Egipto andeni can'jemba quenga su'fa: ‘Antteja Egiptondeccumbe ingi sema'jeñe. A'i menia pa'choma bove ñotssi tsu Egipto andeni tsangae sema'suve dapa canse'faye.’

¹³ Tsa'ma Moisésja tise'panga su: —Dyombe can'faja. Ñotsse in'jamba caña'jen'faja Na'su Chiga que'ima ccushaeña'choma. Nane minga'ni'qque qui ja'ño que'i atte'cho egiptondeccuma ccase atte'faya'bi.

¹⁴ Que'ija asi'ttaembe can'faja cuintsu Na'su Chigayi que'ine iyiccoye.

¹⁵ Tsonsi Na'su Chigaja Moisésnga su: —¿Jongoesie qui ña fuiteya'chove iñajan? Mandaja cuintsu poiyi'cco israendeccu quema o'tie ja'faye.

¹⁶ Tsonsi que'ja que accuicco'choma isupa va marnga yasaja cuintsu enttinge'ye dosi israendeccu santsse ise'faye.

¹⁷ Nane ña gi in'jaeña cuintsu egiptondeccu ñoa'me iyicca'yepa que'ima marnga'qque mandian'faye. Tsonsi gi ña oshacho'choma faraón, pa'cco tise sundarondeccu toya'caen tise'pa caro, cavayoma'qque sefaemba canjaeña.

¹⁸ Tsa'caen ña oshacho'choma canjaemba faraón, tise caro toya'caen cavayoma sefaensi tsu egiptondeccuja ñamajan Na'su Chiga qquen in'jan'faya.

¹⁹ Chiga tsa'caen susi tse'faei'ccuyi Chigama sefacconi'su shondo'su toya'caen unjimba'cco israendeccuma o'tie jayi'cho cambiamba tsendeccumbe sepaccofanga da'fa.

²⁰ Tsa'caen dapa tsu tsa unjimba'ccoja egipto'su sundarondeccumbe otufae attiamba toya'caen israendeccumbe sepaccofae attian'jen. Egiptondeccungaja si'ame attian. Tsa'ma israendeccungaja a'tatssia've chanjumba tise'pama chanjien. Tsa'cansi egiptondeccuja tsequi cose israendeccunga catseye osha'fambi.

²¹ Moisés tise tivema marnga yasasi Na'su Chigaja chiga sombo'jeni'su fingiama moe. Tsa'caen moesi quian'me jipa pa'cco cose fingiamba enttinge'ye marma doña. Tsa'caen doñamba tsu Na'su Chiga enttinge marma san'ame tson

²² cuintsu israendeccu tsangae santsse ise'faye. Nane tansinfani toya'caen pavefani tsu mar tsa'ccuja ttuqquia'caen jincho. Tsambe enttinge'ye tsu ise'fa.

²³ Tsa'caen ise'fa'ni'qque poiyi'cco faraón carondeccu toya'caen tise cavayonga jacan'cho sundarondeccu israendeccuma sepaccoe mandiamba enttinge marnga ja'fa.

²⁴ Tsa'ma a'taningae Na'su Chigaja unjimba'cco toya'caen si'nge'ye egipto sundarondeccuma attepa tise'pama qqueña.

²⁵ Toya'caen tise'pa caro tsu'ttema'qque shichhasi quian'me ja'masia've da. Tsonsi egiptondeccuja su'fa: —¡Jinge ccuyaye israendeccu'ye! ¡Na'su Chiga tsu tsendeccune sepie ingi'ccu iyicco'je!

²⁶ Tsa'ma Na'su Chigaja Moisésnga su: —Que tivema marnga yasaja cuintsu ccase na'eme dapa amppipa egiptondeccu, tise'pa caro toya'caen cavayoma'qque piccoye.

²⁷ Moisés tise tivema marnga yasasi a'taningae tsa'ccuja ccase pa'cco na'eme da. Egiptondeccu ccuyaye tson'jensi marja tise'pama picco. Tsa'caen tsu Na'su Chigaja tise'pama andeccoen.

²⁸ Nane tsa'ccu ccase na'eme dapa pa'cco caro, pa'cco cavayo toya'caen pa'cco sundarondeccu israendeccuma mandiamba ca'ni'chondeccuma picco cati. Ni fae'ccoyi'qque faraón sundaroja ccushambi.

²⁹ Tsa'ma israendeccuja marma santsse ise'fa. Nane tansinfani toya'caen pavefani tsu mar tsa'ccuja ttuqquia'caen jincho. Tsambe enttinge'ye tsu ise'fa.

³⁰ Tsequi a'ta tsu Na'su Chigaja egiptondeccu'ye israendeccuma ccushaen. Tsa'caen ccushaensi tsu israendeccuja egiptondeccumbe aya, mar otafani ccui'fa'choma, atte'fa.

³¹ Israendeccuja tsa'caen Chiga osha'choma oshachopa egiptondeccuma tsa'caen tson'choma attepa Na'su Chigama ñotsse afa'fa. Toya'caen Na'su Chiga tise suqquia'caen tsonsi tise've ñotsse in'jan'fa. Tisema shondo'su Moisésma'qque tsa'caeñi in'jamba paña'fa.