Éxodo 13 - Cofán: Chiga Tevaen'jen

Unjimba'cco, si'nge anga'cho

¹⁷ Tsa'caen faraón israendeccu jaya'chove anttesi Chigaja Filisteo andeni, tsa tansintsse Canaán andeni jaya'cho tsaiqui'ye, angambi. Nane in'jamba'qque israendeccu Filisteo sundarondeccuma attepa dyopa toe Egipto andeni shanda'fasa'ne.

¹⁸ Tsa'caen in'jamba ccaru'ye a'i menia'su tsaiqui'ye angapa Cu'a marni nepian. Israendeccuja Egipto'ye sombopa osha'cho iyiccoqque'sui'ccu sundaroacan'tsse bopa ja'fa.

¹⁹ Toya'caen Moisésja José'ye tsu'ttama anga. Nane José'ye toya cansuite tsu iñajan cuintsu Israel dutssiyendeccu ñoa'metsse su'choi'ccu tise tsu'ttama tsa'caen angaye su'faya'chove. Tsa'caen iñajamba su: “Ñoa'me gi su, Chiga jipa tsu fuiteya. Tsa'caen ashaensi jayi'ta ña tsu'ttama'qque somboemba anga'faya'cho.”

²⁰ Israendeccuja Sucotne sombopa Etamni nepipa tse'ttinga ana'fa. Tse'tti tsu a'i meniame da'tti.

²¹ Poi a'ta tsu Na'su Chigaja unjimba'ccoi'ccu fuitepa canjaen'jen maningae ja'faya'chove. Toya'caen coseta tsu si'ngei'ccu sefane chanjiemba canjaen'jen. Tsa'caen canjaensi pa'cco a'ta pa'cco cose'qque jaye osha'fa.

²² Nane pa'cco a'ta tsu tsa unjimba'ccoja tise'pama o'tie jayi. Toya'caen pa'cco cose tsa si'nge'qque tise'pama o'tie jayi.