Éxodo 12 - Cofán: Chiga Tevaen'jen

Chiga fi'ttimbe panshan'cho (Pascua)

¹ Na'su Chigaja egiptoni Moisés toya'caen Aarónga afapa qquen su:

² “Va ccovu tsu que'ineja me'ttia'ye ashaen'cho ccovu. Vai'ccu qui canqque'fave agatto'faya.

³ Poiyi'cco israendeccuma ttu'sepa qquen condaja: ‘Va ccovu'su diez a'tangae tsu poiyi'cco que'i tisupa tsa'o'sui'ccu oveja du'shuma tsambi'ta chivo du'shuma indiya'cho.

⁴ Fae tsa'o'su re'riccopa pa'cco ovejama añe oshambi'ta tsu faesu tsa'o'sui'ccu fae'ngae bopa an'faya'cho. Nane a'ima agattopa tisupa ma'caen añe in'janqquia'caen tsu attufaeña'cho.

⁵ Majan oveja quitsa'ye du'shu fae canqque'fave an'bian'cho, egave me'choama tsu indiya'cho. Tsa'caen oveja me'chota tsu chivo du'shuma indiya'cho.

⁶ Indipa tsu coirapa an'biaña'cho cuatro a'tave. Tsequi a'ta sime tsu poiyi'cco israendeccu tise'pa indipa an'bian'choma fi'tti'faya'cho.

⁷ Tsa'caen fi'ttipa tsu tsa'su anjampai'ccu tisupa an'cho'su tsa'ombe sombo'tti'su utufa toya'caen ombafa'fama'qque onjoeña'cho.

⁸ Tsequi cose tsu aña'choma matssamba, anqque'su ccaqueje inzatssia toya'caen cupana'cco me'choa panma an'faya'cho.

⁹ Tsa'ma aña'cho cunanatssia ni tsa'ccui'ccu sho'ccoemba an'fajama. Nane pa'ccoma si'ngenga matssamba, tsove, tsu'tte toya'caen tise tto'pama'qque tsu matssaña'cho.

¹⁰ Toya'caen ccaqui a'tane antte'fajama. Tsa'ma antteye'ninda pa'ccoma tsu oqueya'cho.

¹¹ Toya'caen que'i ondiccu'jema ondiccupa que'i sapatoma ejiamba que'i accuicco'choma isupa tsu tsa aña'choma favatsse aña'cho. Nane tsa tsu Chiga fi'ttimbe panshan'cho cose.

¹² Tsequi cose gi pa'cco Egipto andengae panshamba poiyi'cco egipto'su aisheve isu'cho tsandiendeccuma toya'caen tise'pa aiña'cho aisheve isu'chondeccuma'qque fitti'ttiya. Tsa'caen gi poi Egiptombe chigandeccuma patsuya. Ña Na'su Chiga gi tsa'caen su.

¹³ “ ‘Tsa anjampata tsu canjaeña que'i ma'tti can'jen'chove ña atesuye. Tsa'caen tson'fasi gi egiptondeccuma fittitti'jepa tsa anjampama atte'ta tse'ttima panshaña. Tsa'cansi qui fae'ccoyi'qque que'i'suja pa'faya'bi.

¹⁴ Ña tsa'caen tson'choma injan'jemba qui tsesu ccovu nepi'ninda rande fiestave ñane tson'faya'cho. Tsa'caen que'i tson'chota tsu tsangae jinchoya. Que'i omba'su dushundeccu'qque cuintsu injan'jemba tsa'caen tson'jen'faya'chove.

¹⁵ Siete a'tangae fiestaemba tsu cupana'cco me'choa panmeñi an'jen'faya'cho. Nane tsa fiesta ashaenquiyi tsu que'i tsaoni an'bian'cho cupana'ccoma metsse catiya'cho. Majan tsa siete a'ta cupana'ccopa panma an'jen'ninda tsu Israel aindeccu'ye tisema joqquitssian'cho.

¹⁶ Toya'caen aishe a'ta, septimo a'ta'qque tsu poiyi'cco a'i Chiganga bo'faya'cho. Tsequi a'taja sema'ma'quia a'ta tsu. Nane jo'su que'i anqque'suveyi tsu ñoñamba faesuve ti'tsse sema'masia.

¹⁷ Cupana'cco me'choa pan fiestama tsu poi canqque'fa fiestaen'jeña'cho. Nane tsesu a'ta gi ñajan que'i poiyi'ccoma Egipto'ye somboen. Tsangae tsu tsa'caen fiestaen'jeña'cho, que'i, toya'caen que'i omba'su dushundeccu'qque cuintsu injan'jemba tsa'caen tson'jen'faya'chove.

¹⁸ Nane primer ccovu, a'ta catorce qui sime tsesu panma añe ashaemba tsa ccovu'su a'ta veinte y uno qui si'metsse tsesuveyi an'jen'faya'cho.

¹⁹ Tsa siete a'ta tsu que'i tsaoni cupana'ccove an'bian'ma'sia. Nane majan, israe'su, tsambi'ta que'i'ccu canjen'su israembindeqquia, cupana'ccopa panma an'jen'ninda tsu Israel aindeccu'ye tisema joqquitssiaña'cho.

²⁰ Nane osha'cho jongoesu cupana'ccoi'ccu tson'choja an'masia tsu. Mani japa can'jen'an'qque qui cupana'cco me'choa panma an'jen'faya'cho.’ ”

²¹ Tsa'caen pañamba Moisésja israe'su coenzandeccuma ttu'se boñamba su: “Japa que'i ettisundeccumbe oveja tsambi'ta chivoma indipa fi'tti'faja Chiga panshan'cho a'tama panshaeñe.

²² Anjampama bandejanga boñamba canttini'cco tosema tsanga tssipoemba tsa'o sombo'tti'su utufa toya'caen ombafa'fama'qque onjoen'faja. Ni fae'ccoyi'qque tisupa etti'ye toya a'tambite sombo'fajama.

²³ Tsa'caen tson'fasi tsu Na'su Chigaja egiptondecuma fittitti'jepa sombo'tti'su utufa toya'caen ombafa'fa'su onjoen'choma atte'ta tsa ettima anttepa panshaña. Tsayita tsu Na'su Chigaja se'piya tsa fi'tti'su que'i tsa'onga ca'nisa'ne.

²⁴ Va tson'choma que'i'qque injan'jensi tsu que'i omba'su dushundeccu'qque tsangae injan'jen'faya.

²⁵ Mapán tayopi Na'su Chiga que'inga afeye su'cho andeni japa canse'a'qque qui tsa'caen injan'jen'faya'cho.

²⁶ Que'i dushundeccu ‘Va tson'choja ¿jongoesune tsu injienge?’ qquen iñajampaña'fa'ninda

²⁷ qquen conda'faja: ‘Va aña'chota tsu Na'su Chiga tson'chone injienge'cho aña'cho. Nane tayopi tise egiptondeccuma fitti'ttiye jacamba israendeccu Egiptoni can'jen'cho tsa'oma panshan. Tsa'caen panshamba ingi tayopi'su aindeccuma ccushaen'choma injan'jeñe injienge'cho aña'cho tsu.’ ” Tsama pañamba israendeccuja puntssamba Na'su Chigama ñotsse afapa

²⁸ japa Na'su Chiga Moisés toya'caen Aarónga mandaqquia'caen tson'fa.

Aisheve isu'chondeccu pa'cho

²⁹ Tsomba tse'i enttinge cose Na'su Chigaja egiptosundeccu aisheve isu'chondeccuma fitti'tti. Nane faraón, na'su dyaipa'chonga dyai'sumbe dutssi'ye coenza toya'caen indiyepa can'jen'chombe dutssi'ye coenza tsu fae'ngae pa'fa. Toya'caen tsu tise'pa aiña'cho aisheve isu'chondeccu'qque pa'cco pa'fa.

³⁰ Tsa'caen dasi faraón tisema shondosundeccu toya'caen poiyi'cco egiptondeccu cose jangipa quian'me pa'cco Egipto'ye i'na'fa. Ni fae ettiyi'qque a'i pa'chove me'i'ombi.

³¹ Tsequi cose'yi faraónjan manda cuintsu Moisés toya'caen Aarónma ttu'sepa qquen condaye: —¡Ja'faja! Joqquitssi'faja ña aindeccu'ye que'i poiyi'cco israendeccui'ccu. Japa que'i suqquia'caen Na'su Chigama iñajan'faja.

³² Toya'caen que'i oveja, que'i vaurama'qque que'i in'janqquia'caen angapa ja'faja. Japa ñane'qque Chigama iñajan'faja.

³³ Egiptondeccuja cunshoa'me israendeccuma manda'fa cuintsu tise'pa ande'ye junde sombopa ja'faye. Nane poiyi'cco tsa'caen paye tson'jen'fa qquen in'jamba tsa'caen manda'fa.

³⁴ Tsonsi israendeccuja tise'pa ñoña'cho cupana'cco me'choa pan, mandyi'je'cho shavoccuni ccutsu'choma, injanga tise'pa sarupai'ccu onccamba opipa jaye ashaen'fa.

³⁵ Toya'caen Moisés mandaqquia'caen poiyi'cco egiptondeccuma cori, totoacorima ñoña'cho toya'caen sarupave'qque iñajan'fa.

³⁶ Iñajan'fasi Na'su Chigaja egiptondeccuma in'jaen cuintsu se'pimbe'yi israendeccu iñajan'choma afe'faye. Israendeccu tsa'caen tsonsi tsu egiptondeccuja me'cco catiye'fa.

Israendeccu Egipto'ye sombo'cho

³⁷ Israendeccuja Ramsés canqquene sombopa Sucotni ja'fa. Nane pushesu, du'shuma'qque agattombe'yi jo'su coenza tsandiendeccuveyi agattosi tsu seisciento mil a'i'fa.

³⁸ Tsendeccui'ccu tsu tsain'bitssia a'i faesu aindeccu'qque jaja'fa. Toya'caen tsain'bitssi oveja tsain'bitssi vaura tsu fae'ngae ja'fa.

³⁹ Egiptondeccu cunshoa'me mandasi sombopa japa toya anqque'suma aquiambe'yi ja'fa. Tsa'camba tse'ttinga nepipa tise'pa egiptone i'cho toya cunama pan cupana'cco me'choave matssan'fa.

⁴⁰ Israendeccuja cuatro ciento treinta canqque'fave Egipto andeni canse'fa.

⁴¹ Nane tsa'caen cuatro ciento treinta canqque'fave nepi'cho a'ta tsu poiyi'cco israendeccu tsain'bitsse atapa'chondeccuja Na'su Chiga sundarondeqquia'caen tsa ande'ye sombo'fa.

⁴² Tsequi cose Na'su Chiga tise'pama coirapa Egipto ande'ye somboen'choma injan'jemba tsu israendeccuja poi canqque'fa tsesu a'ta nepi'ninda ccane'qque tsa a'tama coiraqquia'caen fiestaen'jeña'cho.