Éxodo 11 - Cofán: Chiga Tevaen'jen

Aisheve isu'chondeccu paya'cho

¹ Tsa'ma toya sombo'fambi'te Na'su Chigaja Moisésnga qquen su: —Ccase gi faesu paqque'suma faraónga toya'caen poiyi'cco egiptondeccunga moeña. Tsa'caen tsonsi faraónjan que'i tisupatsse jaye anttembi'ma tise'yi tsu que'ima va ande'ye tteya moeña.

² Tsa'ma ja'ño israendeccuma mandaja tsandiendeccu, pushesundeccu'qque cuintsu tise'pai'ccu pporotsse canjen'su tsandiendeccuma toya'caen pushesundeccuma'qque cori, totoacorima ñoña'choma iñajan'faye.

³ (Nane Na'su Chiga egiptondeccuma in'jaensi tsendeccuja israendeccuma ñoa'me ñotsse in'jan'fa. Toya'caen faraónma shondosundeccu, poiyi'cco egipto'su aindeccu'qque Moisésja tise'pama ti'tsse joccapitssia qquen in'jan'fa.)

⁴ Tsa'caen su'chosi Moisésja faraónga su: —Na'su Chigaja qquen tsu quema su: ‘Enttinge cose gi pa'cco Egipto andengae panshaña.

⁵ Tsonsi tsu poiyi'cco egiptondeccu aisheve isu'chondeccu pa'faya. Nane faraón na'su dyaipa'chonga dyai'sumbe dutssi'ye coenza toya'caen sunda'choma shoquendian'su sema'su pushesumbe du'shu coenza'qque fae'ngae pa'faya. Toya'caen tsu tise'pa aiña'cho aisheve isu'cho'qque pa'cco pa'faya.

⁶ Pa'cco Egipto ande'ye tsu i'namba fundo'je'faya. Minguite'qque tsa'can'ma paña'fambi qui ni minga'ni'qque qui ccase paña'faya'bi.’

⁷ Mapán tsa'caen da'je'ni'qque israendeccunijan, ainjan shendya'jepa i'na'faya'bi a'i ni tise'pa aiña'cho'qque. Tsa'caen tsu Na'su Chigaja canjaeña cuintsu israendeccuja egiptosundeqquiacan'fambi qquen in'jan'faye.

⁸ Tsa'caen dasi tsu poiyi'cco quema shondosundeccu jipa ccaru dyaipa ñama iñajamba su'faya: ‘¡Junde que, toya'caen que aindeccui'ccu jaja'faja!’ Tsa'caen susi gi ja'faya. Tsomba Moisésja ñoa'me iyicca'yepa faraón dyai'ttie sombopa ja.

⁹ Tsonsi Na'su Chigaja Moisésnga su: —Faraónjan que'i su'choma in'jaña'bi tsu. Tsa'caen tson'chone tsu ña canjaen'choja ti'tsse atapaya pa'cco Egipto andenga.

¹⁰ Moisés toya'caen Aarón osha'cho canjaen'choma faraónga tsa'caen canjaen'fa'ni'qque Na'su Chiga tisema in'jaensi iyicca'yepa se'pipa israendeccu Egipto ande'ye somboya'chove anttembi.