Éxodo 10 - Cofán: Chiga Tevaen'jen

Pa'cco Egiptoni ttombuveyi da'cho

¹ Tsa'caen tson pasapa Na'su Chigaja Moisésnga su: —Japa faraónma can'gaja. Nane ña gi tson cuintsu tise toya'caen tisema shondosundeccu'qque iyicca'yepa se'pisi tise'panga osha'cho ña oshacho'choma canjaeñe.

² Toya'caen que'qque qui que dushundeccunga que du'shumbe dushundeccunga'qque ña pa'cco Egipto andenga tson'cho toya'caen canjaen'choma condaseya. Tsomba qui ñajan ñoa'me Na'su Chiga qquen in'jan'faya.

³ Tsa'caen susi pañamba Moisés toya'caen Aarón faraóni japa qquen su'fa: —Qquen tsu Na'su Chiga tsa hebreondeccumbe Chigaja quema su: ‘¿Minga'ni qui ñama utu'ccoa've da qquen in'jaña? Antteja cuintsu ña aindeccu japa ñama iñajan'faye.

⁴ Nane que tise'pama moeñe ti'tsse sepi'je'ninda gi tu'ija pa'cco que andenga ttombuma moeña.

⁵ Tsa ttombu pa'cco andema pi'cco'tsse bosi qui andeve atteye osha'faya'bi. Nane tsendeccu tsu tsandapandaqui amppite dañongembe pasa'cho re'riccoama metsse an sefaemba pa'cco quini'jima'qque an sefaen'faya.

⁶ Pa'cco que tsa'onga quema shondosundeccumbe tsa'onga toya'caen poi egiptondeccumbe tsa'onga'qque tsu ttombuyi on'baya. Nane minga'ni'qque que yayandeccu, que yaya ccasheyendeccu'qque tsa'cantssia'ma attepa pa'fambi.’ Tsa'caen afa nanimba Moisésja piyipa faraón tsa'o'ye sombopa ja.

⁷ Tsonsi faraónma shondosundeccuja faraónga qquen su'fa: —¿Mi'nge'e qui tsa a'i'ccu iyiccopani canseye in'jan? Antteja, Ti'tsse'tssia, cuintsu tise aindeccui'ccu japa Na'su tise'pa Chigama iñajan'faye. Ti'tsse'tssia, ¿injiengembitssi ti qui pa'cco egiptoni jincho'cho dañongepa sefaji'ni'qque?

⁸ Tsonsi faraónjan ccase Moisés toya'caen Aarónme ttu'senga'faye manda. Tise'pa jisi qquen su: —Japa que'i Na'su Chigama iñajan'ga'faja. Tsa'ma toya jambite ñanga condaja majan majan qui ja'faya.

⁹ Moisés pañamba su: —Nane ingi dushundeccu, coenzandeccu, dutssiyendeccu, onquengendeccu toya'caen ingi oveja, vaura'qque tsu ja'faya'cho. Ingine'ja Na'su Chigane randeve fiestaeña'cho tsu.

¹⁰ Tsa'ma faraónjan su: —¡Tayo gi atesu que egae in'jamba tson'jen'choma! ¿Que'i Na'su Chiga que'i'ccu fae'ngae jacamba fuiteya qquen ti qui in'jan? Toya'caen ¿que'i poiyi'cco tisupa dushundeccui'ccu jaye ña antteya qquen ti qui in'jan?

¹¹ Nane tsa'caen tsoñe antteya'bi gi. Ñoa'me que'i Na'su Chiganga iñajañe in'jan'da jo'su tsandienaccuyi japa iñajan'ga'faja. Tsa'caen supa faraónjan manda cuintsu Moisés toya'caen Aarónma tise dyai'ttie joqquitssian'faye.

¹² Tsa'caen joqquitssian'fasi Na'su Chigaja Moisésnga su: —Que tivema pa'cco egipto'su andenga yasaja cuintsu ttombu jipa tsandapandaqui dañoite dañongembeyi pasa'cho jomba'choma an sefaen'faye.

¹³ Tsama pañamba Moisés tise tivema Egipto andenga yasasi Na'su Chigaja chiga sombo'jeni'su fingiama moesi quian'me fingiamba ji pa'cco a'ta toya'caen pa'cco cose. Ccaqui a'ta chiga sombo'jeni'su fingian ttombuma i.

¹⁴ Tsa ttombu tsu pa'cco andenga ca'ni'fa. Minguite'qque ni minga'ni'qque tsa'cantssi ttombu ca'nimba canse'fambi.

¹⁵ Nane pa'cco andema pi'cco'tsse jisi andema atteye oshambi. Tsa'cantsse jipa pa'cco jomba'choma amba tsandapandaqui dañoite dañongembe pasa'cho quini'jin'su teta'choma'qque an sefaen'fa. Ni faeje'ccoyi'qque inzia ccaqueje Egipto andeni antteyembi. Nasipa'su toya'caen quini'jin'su'qque inzia ccaqueje jinchombi.

¹⁶ Tsonsi faraónjan uta'tsseyi Moisés toya'caen Aarónme ttu'senga'faye manda. Tise'pa jisi qquen su: —Ñoa'me gi que'i Na'su Chiganga toya'caen que'inga'qque egae tsincon.

¹⁷ Tsa'camba gi iñajan ja'ñoñi'qque ña egae tsincon'chone aqque'papa ñane Na'su Chigama iñajan'faja cuintsu va tsangae fi'ttiqque'su paqque'suma ña'ñe joqquitssiañe.

¹⁸ Tsa'caen susi Moisésja faraón tsa'o'ye sombopa japa Na'su Chigama iñajan.

¹⁹ Iñajansi pañamba Na'su Chigaja chiga amppi'jeni'su fingiama moesi quian'me jipa pa'cco ttombuma Cu'a marnga maña. Ni fae ttombuyi'qque Egipto andeni catiyembi.

²⁰ Tsa'ma Na'su Chiga faraónma in'jaensi iyicca'yepa se'pipa israendeccu jaya'chove anttembi.

Pa'cco ande si'en da'cho

²¹ Tsonsi Na'su Chigaja Moisésnga su: —Que tivema sefacconingae yasaja cuintsu pa'cco Egipto andenga ñoa'me sintsse dasi aindeccuja vasecamba ja'je'faye.

²² Tsa'caen mandasi Moisés tise tivema sefaningae yasasi pa'cco Egipto andenga sintsse da.

²³ Nane tsa'caen dasi tres a'ta pa'cco majañi'qque tisupapora atteye osha'fambi ni ccani jacañe'qque osha'fambi. Mapán tsa'caen da'je'ni'qque poiyi'cco israendeccumbe tsaonijan a'tatsse jincho.

²⁴ Tsonsi faraónjan Moisésve ttu'senga'faye manda. Tise jisi qquen su: —Que'i dushundeccui'ccu japa que'i Na'su Chiganga iñajan'faja. Tsa'ma que'i oveja, que'i vaurama'qque vani catija'faja.

²⁵ Tsa'ma Moisésja su: —Isha, tsa'ma que'qque que'i aiña'choma inginga afeya'cho cuintsu tsama ingi oque oraemba Na'su ingi Chiganga afeye.

²⁶ Toya'caen pa'cco ingi aiña'cho ingi'ccu tsu jaya'cho. Ni fae'ccoyi'qque tsu vani catiyeya'bi. Nane tsendeccu'suma gi indipa oque oraen'jen'faya'cho Na'su Chigama iñajañe. Toya tseni jambipa gi jongoesuma Na'su Chiganga afeya'chove atesu'fambi.

²⁷ Tsa'ma Na'su Chiga faraónma in'jaensi iyicca'yepa se'pipa israendeccu jaya'chove anttembi.

²⁸ Toya'caen faraónjan Moisésnga su: —Junde va'ttie sombopa japa ccase ñama can'su ji'jembe canjan. Nane maqui a'ta ñani ccase ji'ta qui paya.

²⁹ Tsonsi Moisésja su: —Ñotsse qui su. Ccase can'su ji'jeya'bi gi.