Esdras 6 - Cofán: Chiga Tevaen'jen

Chiga ettive tsao'ñañe nani'cho

¹⁴ Tsa'caen anttesi Judá'su nasundeccuja tsaoña'jen'choma ccase ashaen'fa. Nane Chigama afasundeccu, Hageo, toya'caen Ido dutssi'ye Zacarías, suqquia'caen tsu ccase ashaen'fa. Israel Chiga mandaqquia'caen tsu tsa'oma nani'fa. Nane Persia'su nasundeccu, Ciro, Darío toya'caen Artajerjes manda'fasi tsu tsa'caen nani'fa.

¹⁵ Persia'su na'su Daríoja canqque'fa seisve manda'je'ni, tsa Adar ccovu a'ta tresni, tsu Chiga ettive tsaoña'jen'choma nani'fa.

¹⁶ Nani'fasi israendeccu, Chigama afasundeccu, levítandeccu toya'caen faesu Babiloniani anga'fasi can'jemba ji'chondeccu avujatsse fiestaen'fa Chiga ettive tsaoña'jen'choma nani'fa'chone.

¹⁷ Fiestaemba tsu cien vaura quitsaye, dosciento oveja quitsaye, cuatrociento oveja quitsaye du'shuma'qque oque oraemba Chiganga afe'fa. Toya'caen tsu afe'fa doce chivoma, poi israe'su doce aindeccu fae chivo, fae chivove, poi israendeccu egae tsincon'chone.

¹⁸ Fiestaen nanimba tsu ñoña'fa Chigama afasundeccu maqui a'ta majan Chiga ettinga ca'nimba semaña'chove. Toya'caen poiyi'cco levítandeccuma tsu manda ma'caen tise'pa semaña'chove cuintsu a'ija Jerusaléni Chigama iñajan'faye. Nane Moisés tevaen'jen suqquia'caen tsu tsa'caen tson'fa.

¹⁹ Canqque'fa'su primer ccovu, a'ta catorce, tsu poiyi'cco Babiloniani anga'fasi can'jemba ji'chondeccuja Chiga Pashan'chone injienge'cho fiestama fiestaen'fa.

²⁰ Nane Chigama afasundeccu, levítandeccu'qque tisuma Chiga mandaqquia'caen tayo ñoñamba giya'tssi'fa tsu Chiganga afe'choma afeye. Tsa'caen ñoñamba tsu Panshan'chone injienge'cho fiestanga afe'choma oque oraemba afe'fa. Babiloniani anga'fasi can'jemba ji'chondeccune tsu tsa'caen afe'fa. Toya'caen faesu Chigama afasundeccune, tisupane'qque afe'fa.

²¹ Poiyi'cco Babiloniane ji'cho israendeccu tsu Chiga Pashaen'chone injienge'cho fiesta aña'choma an'fa. Toya'caen poiyi'cco majan tayoe israembindeqquiai'ccu can'jemba tsendeqquia'caen egae canse'chondeccu'qque, ja'ño tsa'caen canse'choma catipa, fae'ngae voeyi ji'cho israendeccui'ccu Na'su Israel Chigama iñajan'fa.

²² Siete a'tave tsu pan suforaenqque'su me'choa fiestama avujatsse fiestaen'fa. Nane Na'su Chigaja Persia'su na'suma in'jaensi tsu israendeccuma in'jamba fuite cuintsu Israel Chiga ettive ccase tsao'ña'faye. Chiga tsa'caen tson'choma in'jamba poiyi'cco israendeccu avujatsse fiestaen'fa. Chiga etti tsa'caen nanisi Chiga Aya'fama atesian'su, Esdrasja, Babiloniane ji, aindeccuma atesiañe Chiga manda'choma.