Esdras 1 - Cofán: Chiga Tevaen'jen

Na'su Ciro manda'cho

¹ Persia ande'su na'su, Ciro, mandaye ashaensi tsa canqque'fanga Na'su Chigaja tisema in'jaen cuintsu Chiga aya'fama afa'su Jeremías, Na'su tayopi mandasi suqquia'caen tsoñe. Tsa'caen in'jaensi Ciroja tsama in'jamba qquen tevaemba ma'da máñejan cuintsu poi tise manda'je'cho canqqueni japa tsama conda'faye:

² “Ña, Ciro, gi Persia'su na'su qquen su: Na'su, Sefacconi'su Chiga tsu ñama poi ande'su na'suve tsomba ñama manda tisema iñajan'jen'cho tsa'ove Judá ande'su Jerusalén canqqueni tsao'ñañe.

³ Ñama tsa'caen mandasi gi in'jan cuintsu poiyi'cco a'i majan Na'su Chigave in'jan'chondeccu Judá ande'su Jerusaléni japa Na'su Chiga tsa'ove tsao'ña'faye. Nane Chiga que'ima fuitesi japa Na'su Israel Chigambe tsa'ove tsao'ña'faja Na'su can'jen'cho Jerusalén canqqueni.

⁴ Toya'caen gi manda cuintsu majan jayimbindeqquiaja tsaoña'su jayisundeccuma fuite'faye; nane cori, totoacori, osha'cho tise'pa canseqque'suma, aiña'choma'qque afe'faya'cho. Toya'caen tsu ma'caen osha'ta osha'choma fuite'faya'cho cuintsu Chiga ettima ñotsse tsao'ña'faye.”

Israendeccu toequi Jerusaléni ja'cho

⁵ Ciro tsa'caen mandasi poiyi'cco majama Chiga in'jaensi ñoña'fa Jerusaléni japa Na'su Chiga ettive tsao'ñañe. Nane poi Judá'su toya'caen Benjamín'su antian nasundeccu, Chigama afasundeccu, toya'caen levítasundeccu tsu tsa'caen ñoña'fa.

⁶ Jayimbindeqquia tsu cori, totoacori, osha'cho tise'pa canseqque'suma, aiña'choma'qque afepa tise'pama fuite'fa. Toya'caen tsu tisu in'janqquia'caen osha'choma afe'fa cuintsu Chiga ettive ñotsse tsao'ña'faye.

⁷ Na'su Ciro'qque manda cuintsu osha'cho Chiga ettini jincho vase'je'choma somboemba afe'faye, tsa tayópi Nabucodonosor Jerusalénma patsupa ipa tise chigandeccumbe tsaoni an'bian'choma.

⁸ Tsa'caen mandasi tsu Persia'su corima coira'su na'su, Mitrídatesja, tsama agattopa afe Judá'su govierno na'su Sesbasarnga.

⁹ Agattopa qquen afe: treinta cori bandeja, mil totoacori bandeja, veinte y nueve chhichhi'cco,

¹⁰ treinta cori tasa, cuatrociento diez ccaninga'choa totoacori tasa, toya'caen mil faesu vase'je'choma'qque afe.

¹¹ Nane pa'cco cori, totoacori vase'je'choma agattosi tsu cinco mil cuatro cientove napi. Sesbasarja faesu Judándeccui'ccu Babiloniane sombopa pa'cco tsama isupa Jerusaléni anga'fa.