Deuteronomio 9 - Cofán: Chiga Tevaen'jen

Chiga israendeccuma fuite'je'cho

¹ “¡Israendeccu, ñama paña'faja! Tayo tsu Jordánma iseya'cho nepi. Isepa qui que'ima ti'tsse quin'anma, ti'tsse injan'on aindeccuma patsuye ashaen'faya. Tise'pa rande canqquema'qque sefa'tssia ttuccui'ccu ttu'cho canqquema qui osuiamba patsu'faya.

² Tsa canqqueni can'jensundeccu tsu tayopi'su Anac dutssiyendeqquia'caen dyo'jinma bia'a aindeccu. Nane Anacja dyo'jin'onsi tsu a'ija su'fa, ‘Majañi'qque tsu Anac dutssiyendeccui'ccuja iyicco'faya'bi.’

³ “Tsa'ma ñotsse in'jan'faja: Na'su que'i Chiga tsu si'nge anchandaqquia'caen que'ima o'tie jayipa tsa aindeccuma patsupa nepiaña. Nane Na'su suqquia'caen qui junde tsa aindeccuma joqquitssiamba nepian'faya.

⁴ Na'su que'i Chiga tsa'caen que'i'ccu va faesu canqque'su aindeccuma joqquitssiansi tisu injama'choni qquen su'fajama: ‘Ingija ñotssisi tsu Na'su Chigaja ingima fuite va andema patsuye.’ Nane tsa ande'su aindeccu egae tsinconsi tsu Na'su Chigaja tise'pama patsupa joqquitssian.”