Deuteronomio 8 - Cofán: Chiga Tevaen'jen

A'ija panmeñi amba canse'faya'bi

¹ Ña ja'ño que'inga condase'cho manda'choma pañamba tson'faja cuintsu injan'on a'ive atapapa va andema patsu'faye, va Na'su que'i tayopisundeccu'yenga afeye qquen su'cho andema.

² Ñotsse injan'jen'faja Na'su, que'i Chiga, cuarenta canqque'fave que'ima a'i menia angacan'choma. Nane atesucañe in'jamba que'ima vanaemba opatssia've tson que'i injama'choma atesuye. Ñoa'me tsu atesuye in'jan que'i tise manda'choma paña'chove tsambi'ta pañambi'choa've.

³ Tsa'caen in'jamba tise'pama qquipoe'sian vanae'an'qque tsu omboe manáma o'fian. Nane que'i ni que'i tayopisundeccu'ye tsa manáma atesu'fambisi Na'su Chigaja tsama o'fian cuintsu que'i qquen in'jamba canse'faye: jo'su panmeñi amba canse'faya'bipa Chiga Aya'fa'qque in'jaensi tsu a'ija ñoa'me canse'faya.

⁴ Tise'pa tsa'caen cuarenta canqque'fave a'i menia jacan'fa'ni'qque tise'pa ondiccu'je'cho sarupa tssoruve dambi ni tise'pa tsu'tte'qque ppu'fambi.

⁵ Nane yaya tise du'shuma nafattianqquia'caen tsu Chigaja que'ima nafattian.

⁶ Tsa'cansi Na'su, que'i Chiga, manda'choma pañamba tisema in'jamba ñotsse afapa tise nafattianqquia'caen canse'faja.