Deuteronomio 7 - Cofán: Chiga Tevaen'jen

Faesu chigama iñajan'fajama

¹ Na'su, que'i Chigaja, que'i an'biaña'cho andenga ca'niamba siete ande'su aindeccuma, que'ima ti'tsse quin'an, ti'tsse tsain'bitssia aindeccuma tteya mañaña. Nane hititandeccu, gergeseondeccu, amorreondeccu, cananeondeccu, ferezeondeccu, heveondeccu, jebuseondeccuma'qque tsu tteya mañaña.

² Na'su que'i Chiga anttesi que'ija tsendeccuma patsupa tise'pama metsse nepiaña'cho. Nane tise'pama mendeye'fajama ni injancco'fa'chove tise'pai'ccu afa'fajama.

³ Toya'caen tise'pa'suma casara'fajama. Que'i dutssiyendeccuma tise'pa onquengendeccunga antte'fajama ni que'i onquengendeccuma tise'pa dutssiyendeccunga antte'fajama.

⁴ Nane tsa'caen tson'ninda tsu tsendeccu que'i dushundeccuma qqueña'faya cuintsu Na'su Chigama catipa faesu chigandeccuma iñajan'faye. Tsa'caen tson'fa'ninda tsu Na'suja que'ima iyicca'yepa tse'faei'ccuyi nepiaña.

⁵ Qquen tsu que'i tsoña'cho: tise'pa chiganga afe'je'cho oque oraen'jen'choma tsu osuiaña'cho. Toya'caen tsu tise'pa iñajan'jen'cho patu, quini'ccoma'qque ucca'sho catiya'cho. Toya'caen tise'pa ñoña'cho chigandeccuma'qque oqueya'cho.

⁶ Nane que'ija Na'su que'i Chiga in'jan'cho aindeccu qui. Na'suja poi ande'su aindeccu'su'ye que'ima in'jamba attufaen tisumbeve.

Israendeccuma in'jamba isu'cho

⁷ Na'su Chiga ti'tsse injan'on aindeccuma tta'ttambipa que'i injan'ombi'ma attepa tisumbeve isu. Nane que'ija ñoa'me faesu aindeccuma bove'cco qui.

⁸ Tsa'ma Na'suja que'ima Egiptoni'su sema'jen'cho'ye somboen. Nane tise ñotssia quin'sui'ccu Egipto'su na'su faraónma patsupa que'ima in'jamba ccushaen tise que'i tayopisundeccu'yenga tansintsse su'choma tsoñe.