Deuteronomio 6 - Cofán: Chiga Tevaen'jen

Ti'tsse'tssia manda'cho

¹ Qquen tsu Na'su que'i Chigaja tise manda'choma afapa manda ña que'inga atesiañe cuintsu que'i an'biaña'cho andeni can'jemba tsama pañamba tsa'caen tson'faye.

² Tsa'caen tson'jemba qui que'i dushundeccui'ccu Chiga que'i Na'suma ñotsse tson'faya. Poi a'ta, poi canqque'fa tsa'caen canse'fasi tsu Na'suja antteya que'i tsain'bitssi canqque'fave canse'faye.

³ Tsa'cansi, israendeccu, Chiga manda'choma pañamba tson'faja. Nane tsa'caen tsomba qui tsa andeni ñotsse cansepa ti'tsse'tssi aindeccuve atapa'faya. Na'su que'i tayopisundeccumbe Chiga tise'pama tansintsse suqquia'caen tsa andeni tsu chocho toya'caen tuño cuñajun'cho'qque shacaya'bi.

⁴ Israendeccu paña'faja: Na'su, ingi Chiga, tsayi tsu Na'suja.

⁵ Pa'cco injama'choi'ccu Na'su que Chigama ñotsse in'jan'faja. Nane pa'cco que canse'pai'ccu, pa'cco que quin'sui'ccu tisema ñotsse in'jan'faja.

⁶ Ña ja'ño a'ta Chiga manda'choma que'inga atesian'choma injama'chonga ñotsse in'jan'faja.

⁷ Anttembe'yi que'i dushundeccunga'qque tsama condase'faja. Tisu tsaoni dyai'a'qque tsambi'ta tsaiqui'ye jayi'a'qque tsane condase'faja. Nane anañe ccui'a'qque, toya'caen sinte qquendyapa jangi'a'qque tsane condase'faja.

⁸ Que'i tive tandan'fanga toya'caen otifaccunga'qque ña manda'choma tevaen'faja.

⁹ Toya'caen que'i tsa'o sombo'ttinga tsa'o dyaiña'chonga'qque tsama tevaemba ancaen'faja.

Moisés Chigama paña'faye su'cho

¹⁰ Na'su Chigaja que'i tayopisundeccu'yenga, nane Abraham, Isaac toya'caen Jacobnga'qque, andema jai'ngae afeya'chone tansintsse conda. Ja'ño tsu Na'suja que'ima tsa andenga ca'niaña. Ñotssia rande canqque tsu tsa andeni jin, que'i canqquiambi'choa.

¹¹ Canqque'su tsaoni tsu osha'cho ñotssia jincho, que'i chavambi'choa. Tsa'ccu poso'qque tsu jin, que'i changoembi'choa. Toya'caen tsu o'fa tsajaccu, olivoccu'qque jin, que'i jombi'choa. Tsa'ma tsesuma ttepputsse amba

¹² aqque'pa'fajama Na'su que'ima Egipto'su sema'jen'cho'ye somboen'suma.

¹³ Na'su que'i Chigama ñotsse in'jamba tise'veyi shondo'faja. Que'i su'cho tansintssia qquen canjaeñe in'jamba tise inisei'ccuyi afa'faja.

¹⁴ Pporotsse canjen'su israembindeqquiambe chigandeccuma iñajan'fajama.

¹⁵ Nane tsa'suma iñajan'ninda tsu Na'su que'i Chigaja, cca'i'su chigandeccuma chi'gapa, iyicca'yepa que'ima tsangae nepiaña.

¹⁶ Qqueñacan qquen tson'fajama Na'su que'i Chigama Masahni can'jemba tson'faqquia'caen.

¹⁷ Tsa'ma Na'su que'i Chiga su'choma tise manda'choma'qque ñotsse pañamba pa'tssima tson'faja.

¹⁸ Tsa'caen tson'ninda tsu Na'suja camba avujatssipa tsa que'i tayopisundeccu'yenga jai'ngae afeya'cho qquen su'cho ñotssia andema que'inga afesi qui ca'nimba opatsse cansepa an'bian'faya.

¹⁹ Toya'caen tsu Na'suja tise suqquia'caen poiyi'cco que'i enemigondeccuma tteya mañaña.