Deuteronomio 34 - Cofán: Chiga Tevaen'jen

Moisés pasi a'tu'cho

¹ Moisésja Moab a'i menia'ñe sombopa Nebo ccotta'ccoma ansundepa Pisga tsutopanga ccutsu Jericó canqquema isevetsse. Tse'tti ccutsusi tsu Na'su Chiga Dan andepi pa'cco Galaad andema tisenga canjaen.

² Nane Neftalí, Efraín, toya'caen Manasés andema canjaemba pa'cco Judá andema'qque canjaen Mediterráneo marpi

³ Toya'caen Néguev ande, Jordán na'en sinjunccu, Jericó fae'ngatssia ande, tsa Palmera canqque, Zoar canqquepi tisenga canjaen.

⁴ Canjaemba Na'suja tisema su: “Va tsu ña Abraham, Isaac, Jacobnga'qque tise'pa dushundeccunga afeye qquen tansintsse su'cho ande. In'jamba gi quema canjaen que ca'niñambia'qque tso'fei'ccu atteye.”

⁵ Tsa'caen tsu Moisés, tsa Chigama shondo'suja, Na'su suqquia'caen Moab andeni pa.

⁶ Papa Moab ande'su Bet-peor isevetssia sinjunccuni tiseja a'tuye. Nane ja'ño a'tapan majañi'qque atesu'fambi tise mani atuye'chove.

⁷ Ciento veinte canqque'fave an'biamba tsu pa. Tsa'ma tise tso'fe toya ñotssiyi tise'qque toya quinse'tssiyi pa.

⁸ Pasi israendeccuja treinta a'tave tse'tti Moab a'i menia can'jemba tisene ina'jen'fa, injan'jemba ñombi'ye'cho naniña'ngae.

⁹ Nane Moisés tisu tivei'ccu Nun dutssi'ye Josuénga pporaensi Josuéja osha'chove in'jan'cho qquendya'pai'ccu mandasi israendeccu tisema pañamba Na'su Moisésnga mandaqquia'caen tson'fa.

¹⁰ Tsa'ma faesu Chiga aya'fama afa'suja Moisés'cantsse Israelnga attiambi. Nane Moisésja Na'su Chigai'ccu cambajunaccu condasecco'je.

¹¹ Na'su Chiga mandasi Moisésja osha'cho canjaen'choma agattoen'choma'qque attian Egipto'su na'su faraón, tisema shondosundeccu, poi egiptondeccunga'qque.

¹² Nane jimbi tsu faesu tisia'caen israendeccunga osha'cho ti'tsse'tssia tson'choma canjaemba Na'su Chiga oshacho'choma canjaen'suve.