Deuteronomio 28 - Cofán: Chiga Tevaen'jen

Pañambi'ta vanaña'cho

⁵⁸ “Osha'cho va tevaen'jeni tevaemba manda'choma ñotsse pañamba tson'faja. Toya'caen Na'su que'i Chiga joccapitssia inisema dyoe'sui'ccu ñotsse in'jan'faja.

⁵⁹ Tsa'caen tsombi'ninda tsu Na'su Chigaja osha'cho ega paqque'suma que'inga, que'i dushundeccunga'qque moeña. Nane ccusha'masia paqque'suma moesi qui bo'tsse vana'jen'faya.

⁶⁰ Nane egiptondeccunga egae daqque'suma, tsa que'i dyoqque'suma, moesi qui tsangae vana'jen'faya.

⁶¹ Toya'caen tsu faesu paqque'su, faesu egae daqque'suma'qque, va tevaen'jeni condambi'choama que'inga moeña que'ima metsse sefaeñe.

⁶² Tsa'caen tsonsi, que'i, israendeccuja, tayoe sefacco'su o'fema agattoye oshambi'tssiqquia'caen qui tsequi a'ta Na'su que'i Chigama ñotsse pañambipa re'ricco a'ive da'faya.

⁶³ Na'suja que'ima ñotsse tsomba atapoemba avujatssiqquia'caen tsu que'ima dañomba nepian'an'qque avujatssiya. Nane jon'choma sai isuqquia'caen tsu que'ima que'i can'jeña'cho ande'ye quian'me joqquitssiaña.

⁶⁴ Joqquitssiamba tsu Na'suja que'ima shequian mañaña poi faesu andenga, sefacco já ccutsuni. Tseni can'jemba qui faesu chigandeccuma iñajan'faya. Nane que'i ni que'i tayopisundeccu'ye atesumbi'choa quini'cco toya'caen patuma ñoña'cho chigandeccuma qui iñajan'faya.”