Deuteronomio 2 - Cofán: Chiga Tevaen'jen

Afe'cho andeni ja'faye manda'cho

¹⁶ Poiyi'cco tsesu Chiga se'pisi afeya'cho andenga ca'niña'bi'choa israe'su sundarondeccu pa'fasi

¹⁷ tsu Na'su Chigaja qquen ñama su:

¹⁸ “Ja'ño a'ta Moab andema pashamba Ar canqquengae jayipa

¹⁹ amonitandeccuma cachui'ta tise'pama noñangian'fajama ni tise'pai'ccu iyicco'fajama. Nane tsendeccu'qque tsu Lot omba'su aindeccu. Nane que'inga gi afeya'bi gi tsa'su andema, tayo tise'panga afe'chosi.”

²⁴ Tsomba tsu Na'su Chigaja su: “¡Jangipa fae'ngatsse japa Arnón Na'ema ise'faja! Ña gi tsoña cuintsu que'ija amorreo'su Hesbón na'su Sehónma patsupa tise andema itsa'faye. ¡Que'i can'jeña'cho andenga ca'nimba geraen'faja!

²⁵ Ja'ño a'ta tsu poiyi'cco tsa ande'su aindeccu que'ima ñoa'me dyojoye ashaen'faya. Nane que'ine jongoesuma paña'da tsu ttun'dundu'je'e dyojo'faya. Toya'caen que'ine asi'ttaen'da tsu ñotsse in'jambitsse da'faya.”

Israendeccu Sehónma patsu'cho

²⁶ Toya Cademot a'i menia can'jemba gi condasundeccuma manda moe Hesbón na'su Sehónga. In'jan gi cuintsu tisema iyicca'ya'be'yi iñajan'faye tise andema pashaña'chove. Tsa'caen in'jamba gi condasundeccuma manda cuintsu qquen su'faye:

²⁷ “In'jan'fa gi que andema pashañe. Nane ni tansinfanga ni pavefanga attufambe'yi gi tansintsse rande tsaiqui'ye ja'faya.

^28-29 Toya'caen jongoesu aña'choma an'da, tsa'ccuma cu'ita gi quenga afepoeña totoacorima. Nane Seir ande'su Esaú omba'su aindeccu toya'caen Ar canqque'su moabitandeccu tisupa andema pashañe antteqquia'caen gi quema iñajan cuintsu que andema'qque pashañe antteye Jordán Na'ema iseya'ngae. Tsama isepa gi Na'su ingi Chiga inginga afeya'cho andenga ca'ni'faya.”

³⁰ Tsa'caen iñajansi tsu na'su Sehónjan se'pi ingi tise andengae pashañe. Nane Na'su que'i Chiga tsu tisema in'jaen cuintsu tsa'caen ñoa'me se'pisi que'ija tisema geraemba patsu'faye. (Nane tsa'caen tsu Na'su Chigaja tayo tson.)

³¹ Tsonsi Na'su Chigaja ñama su: “Ja'ño gi ashaen na'su Sehón, pa'cco tise andema'qque quenga afeye. Japa tise andenga ca'nimba pa'ccoma patsupa itsa'faja.”

³² Tsonsi Sehónjan poiyi'cco tise sundarondeccui'ccu sombo Jahazani ingi'ccu geraeñe.

³³ Tsa'ma Na'su ingi Chiga ingima fuitesi gi tise, tise dutssiyendeccu, tise sundarondeccuma'qque metsse patsu'fa.

³⁴ Toya'caen gi pa'cco tise canqquema asi'tta da'ñomba poi tsandie, pushesu, dushundeccuma'qque fitti'tti sefaen'fa. Nane ni fae'ccoveyi'qque antte'fambi gi cuintsu canseye.

³⁵ Tsa'ma oveja toya'caen vaurama'qque canseveyi isupa an'bian'fa. Toya'caen osha'cho canqqueni ti'tsse bare'cho jinchoma'qque isupa an'bian'fa.

³⁶ Arnón Na'en jin'tti'su Aroer canqquene toya'caen fattocco enttinge'su canqquene ashaemba gi poi canqquema patsu'fa Galaad canqquepi. Nane Na'su ingi Chiga anttesi tsu poiyi'cco oshambi'tsse dapa patsuye'fa.

³⁷ Tsa'ma Na'su ingi Chiga mandaqquia'caen gi amonitandeccu andemajan itsa'fambi. Toya'caen Jaboc na'en jin'tti'su ande, ccotta'cco'su canqque, faesu andema'qque Na'su ingi Chiga se'pi'chosi gi patsu'fambi.