Deuteronomio 19 - Cofán: Chiga Tevaen'jen

Andema agatto'choma itsa'masia

¹⁴ Na'su que'i Chiga que'inga afesi can'jeña'cho andema attufaemba agattopa majambeve canjaeñe tayo ccutsian'cho patuma joqquitssian'fajama faenga'sumbe andema itsaye.

Afopa'choe camba afasundeccu

¹⁵ Fae camba afa'suja barembi a'i egae tsinconsi tise egae tsincon'choma condaye. Tsa'ma dos, tsambi'ta tres camba afasundeccu fae'ngatsse afapa tsu tise egae tsincon'choma conda'faya.

¹⁶ Tsa'ma majan afopa'choe camba afa'su faesuma afasepa egae tsincon qquen afopoen'da

¹⁷ tsu tise, tisenga afaseye'su'qque Na'su Chiganga ccutsu'faya'cho. Nane tsequi a'ta manda'su Chigama afasundeccu, ñoquiansundeccunga'qque ccutsu'faya'cho.

¹⁸ Tsa'caen ccutsu'fasi tsu ñoquiansundeccuja pa'cco tson'choma pañambe in'jan'faya ma'caen tson'jen'chove. Ñotsse tta'ttapa tsa camba afa'su faesuma afasepa aqquia afopoen qquen in'jan'da

¹⁹ tsama injama'choma somboeña'cho. Nane tsaja faesuma vanaeñe in'janqquia'caen tsu tisu vanaña'chove antteye. Tsa'caen tsu tsoña'cho que'i aindeccu'su egae tsincon'choma joqquitssiañe.

²⁰ Nane cca'indeccu tsane pañamba dyopa tsa'caen afopoeña'bi faesuma dañoñe.

²¹ ¡Egae tsinconsundeccuma mende'yejama! Nane fi'tti'suma fi'ttija. Tso'fema daño'sumbe tso'fema somboenjan. Tte'ttoma ucca'sumbe tte'ttoma u'ccaja. Tivema daño'sumbe tivema dañojan. Tsu'ttema daño'sumbe tsu'ttema dañojan.