Daniel 6 - Cofán: Chiga Tevaen'jen

Daniel ttesi changoni ccusha'cho

¹ Na'su Daríoja ciento veinte governadorondeccuve tsomba manda cuintsu poi provinciani fae'cco, fae'cco can'jen'faye.

² Toya'caen tsu tres a'i presidentendeccuve manda cuintsu governadorondeccuve caña'jen'faye. Tsa'caen tsu na'suja tson jongoesuma qqueñasa'ne. Tsa presidentendeccu'su fae'cco tsu Daniel

³ tsa tisei'ccu fae'ngae presidentendeccuma ti'tsse injama'pa. Tsa'cansi tsu na'suja in'jan Danielma poiyi'cco nasundeccuma ti'tsse'tssia've tsoñe.

⁴ Tsama in'jansi tsu fae'ngae presidentendeccu, toya'caen governadorondeccu'qque ma'caen tsomba tise egae tson'choma attepa na'sunga tsesuma egae tsomba shacaen qquen suye in'jamba tta'tta'fa. Tsa'ma Danielja ñoa'me ñotssia a'isi jongoesu shacama atte'fambi. Tsa'camba osha'fambi jongoesu tson'choi'ccu tisenga shacave tsoñe.

⁵ Tsa'camba tsain'bitsse tsane asi'ttaemba qquen su'fa: “Tise ma'caen Chigave in'jan'cho toya'caen ande na'su ma'caen mandaya'chove in'jamba tsombi'ta, ma'caen Danielma egae tsoña'chove atte'faya'bi gi.”

⁶ Tsa'caen in'jamba presidentendeccu toya'caen governadorondeccu'qque na'su Daríoi'ccu afaye in'jamba japa tise dyaini nepipa qquen su'fa: —Que Ti'tsse'tssia'ja cuintsu tsangae canseja.

⁷ Poiyi'cco que mandasi na'suve da'chondeccu gi bopa in'jan'fa cuintsu que tevaen'jema tevaemba poiyi'cco a'inga que manda'chove canjaeñe: Cuintsu treinta a'tave majañi'qque jongoesu chigama ni a'ima iñajambe'yi jo'su Que Ti'tsse'tssia'veyi iñajan'jen'faye. Nane majan tsa'caen tsombi'ta tsu ttesi changonga ttova catiyeya'cho.

⁸ Tsa'caen Que Ti'tsse'tssia, mandapa tisu inisema tevaenjan cuintsu tsangae tsa'caen tsoña'chove jinchoye. Nane medondeccu toya'caen persandeccu manda'cho pasa'masia've jinchoqquia'caen tsu mandaya'cho.

⁹ Tsa'caen su'fasi na'su Daríoja tsendeccu caña'jen'ni tsa'caen mandapa tisu inisema tevaen.

¹⁰ Tsa'caen mandapa na'su tisu inisema tevaen'choma in'jamba Danielja tisu tsaoni ja. Japa tisu anambaccunga ca'nimba Jerusalén canqque jinfa'su ventanama fettapa ccaru dyai Chigama iñajamba tisenga ñotsse afaye. Tsa'caen tsu fae a'ta tres se Chigama iñajamba canse.

¹¹ Tsa'cansi tsu tisema vanaeñe in'jan'chondeccu'qque fae'ngae Daniel tsa'onga ca'nimba tise Chigama iñajamba tisenga ñotsse afa'je'choma atte'fa.

¹² Tsa'caen attepa jundeyi na'su Daríoni japa tise manda'chone afapa qquen su'fa: —Que Ti'tsse'tssia qui poiyi'cco a'inga manda cuintsu treinta a'tave majañi'qque jongoesu chigama ni a'ima iñajambe'yi jo'su Que Ti'tsse'tssia'veyi iñajan'jen'faye. Nane majan tsa'caen tsombi'ta tsu ttesi changonga ttova catiyeya'cho. ¿Ñoa'me tsa'can ti? Tsonsi na'suja su: —Ju, tsa'can tsu. Nane tsa manda'choja medondeccu, toya'caen persandeccu mandaqquia'caen tsu pasambe'yi naningeya'cho.

¹³ Tsa'caen susi pañamba tsendeccuja ti'tsse afapa qquen su'fa: —Tsa Judá'suma indipa i'cho, Daniel, tsu Que Ti'tsse'tssiama ni va que tevaemba manda'choma pañambi. Nane tayo gi atte'fa tiseja fae a'ta tres se tsu tise Chigama iñajan'jen.

¹⁴ Tsama pañamba na'suja ñoa'me ñombi'yepa ma'caen tsomba Danielma ccushaeña'chove tta'tta. Nane tsequi a'ta cose'tsse ma'caen

¹⁵ Danielma tsa paya'cho'ye ccushaeña'chove asi'ttaen'jen'ni tsendeccuja ccase na'suni jipa qquen su'fa: —Que Ti'tsse'tssia qui pa'ccoma ñotsse atesu ma'caen medondeccu, toya'caen persandeccu in'jansi na'su mandapa tisu inisema tevaen'choma se'pipa pasaen'masiave.

¹⁶ Tsa'caen su'fasi na'suja manda cuintsu Danielma ipa ttesi changonga ttova moe'faye. Tsa'ma toya tsa'caen tson'fambi'te na'suja Danielnga qquen su: —Que Chiga, tsa que ñoa'me in'jamba tsain'bitsse shondocan'cho, tsu quema ccushaeña.

¹⁷ Tsa'caen Danielma changonga ttova moemba patuma ipa tsa patui'ccu chango sombo'ttima picco. Piccopa na'suja tsa patuma setsaenqque'sui'ccu setsaemba tisu ñoa'me na'su sotijai'ccu setsaenqque'sunga pisa tevaen. Toya'caen poiyi'cco faesu nasundeccu'qque tise'pa sotijai'ccu tsa'caeñi tevaen'fa. Tsa'caen tsu tson'fa cuintsu poiyi'cco ñoa'me na'su tson'chove atesupa tsa ttesi chango'ye Danielma somboembe can'faye.

¹⁸ Tsa'caen tsomba na'suja tisu na'su tsaoni japa ambe'yi anañe ccui. Nane tisu tayoe toya avujatssi'te tsinconqquia'caen tsombe'yi tsu anañe ccui. Tsa'caen ccuipa tsequi coseja anambitsse a'ta.

¹⁹ Tsa'caen a'tapa sinte'yi jangipa quian'me buttopa ttesi changoni ja.

²⁰ Tayo pporotsse japa na'suja ñoa'me ñombi'ye'cho aya'fai'ccu Danielma qquen afa: —Daniel, Cansian Chigama shondo'su, ¿que Chiga, tsa que ñoa'me in'jamba tsain'bitsse shondocan'chota ti ttesindeccu'ye quema ccushaeñe osha?

²¹ Tsonsi Danielja su: —Ti'tsse cansejá, Ti'tsse'tssia.

²² Ña Chiga tsu tisema sefacconi'su shondo'suma ñani moe cuintsu ñama mingae tson'fasa'ne ttesi aya'fama piccoye. Nane Chigata tsu atesu ñajan ño'an a'ive, toya'caen ñajan mingae Que Ti'tsse'tssiama egae tsincombi'choa've.

²³ Tsonsi na'suja avujapa manda cuintsu Danielma tsa chango'ye somboen'faye. Somboemba camba ni fae fuchha'ttiveyi'qque atte'fambi tise Chigama in'jansi tisema mende'yepa ccushaensi.

²⁴ Omboe na'su mandasi tsa Danielma egae tsonsundeccuma toya'caen tise'pa pushendeccu, tise'pa dushundeccuma'qque indipa ipa tsa ttesi changonga ttova moe'fa. Tsendeccuma tsa'caen ttova moe'fasi ttesija toya tise'pa amppimbi'te tayo ronda'jepa aiye'je tise'pa amppi'ninda jimbitsse an cati'fa.

²⁵ Tsama attepa na'su Daríoja poi andenga, toya'caen poi faesu aya'fangae afa'je'chondeccunga'qque qquen afa'chove tevaen: “Que'ima in'jamba gi opatsse, toya'caen avujatsse vama tevaemba in'jamba que'ima manda.

²⁶ Nane pa'cco ña manda'je'cho tsu Daniel Chigama dyoe'sui'ccu paña'faya'cho. Tsa tsu ñoa'me Cansian Chiga, toya'caen tsangae tsu jinchoya. Tise manda'je'cho'ni tise oshacho'qque pasaya'bi ni sefaya'bi.

²⁷ Tsayi tsu ccushaen'su, toya'caen fetta'su. Tsayi tsu sefacconi toya'caen andeni'qque osha'cho ñotssiama canjaen'su. Tsa tsu Danielma ccushaen ttesi'ye.”

²⁸ Toya'caen Danielja ti'tsse'tssia've dapa can'jen na'su Darío manda'jeite, toya'caen Persia ande'su na'su Ciro mandajeite'qque. Can'jemba Danielja ti'tsse attian'choma attepa tise aindeccune Na'su Chigama ñoa'me iñajan'jen. Persia'su na'su tres canqque'fave manda'je'ni lino sarupama ondiccucho'cho a'ija chanjumba Danielnga attian. Attiamba osefaeña'cho a'ta tsoña'chone condasepa Danielnga qquen su: