Daniel 5 - Cofán: Chiga Tevaen'jen

Ttuccunga tevaen'chone condase'cho

¹ Babilonia'su na'su Belsasar tsu tsain'bitssi tsa ande'su nasundeccuma ttu'sepa rande fiestave fiestaen'jen. Tsa'caen tson'jemba na'suja tise ttu'sesi ji'chondeccui'ccu an'jemba tsain'bitsse vinoma'qque cui'je'fa.

^2-3 Tsa'caen avujatsse vinoma cui'jepa ccusipa na'su Belsasarja in'jan tise yayaccashe'ye Nabucodonosor'ye Jerusaléni'su Chiga etti'su cori tasa toya'caen totoacori tasama i'choma. Tsa'caen in'jamba manda cuintsu tsa tasama i'ngapa tiseni i'faye. I'fasi tsesu tasanga na'su, tise pushendeccu, tise ambian'chondeccu, toya'caen poiyi'cco tsa fiestani canjensundeccu'qque cui'je'fa.

⁴ Tsa'caen cui'jepa poiyi'cco tise'pa ñoña'cho chigandeccunga iñajan'fa. Nane majan cori chiga, majan totoacori, majan cu'a yoshava, majan yoshava, majan quini'cco chiga, toya'caen majan patuma ñoña'cho chiganga tsu iñajan'fa.

⁵ Tse'faei'ccuyi tsu a'i tive tuño chhara'faye attiamba ttuccu'su utufani totoa jinchonga tevaeñe ashaen. Tsa'caen a'i tive attiamba tevaen'choma attepa na'suja ñoa'me dyopa

⁶ inzu'tsse dapa pa'cco ai'vo ttun'dundu'jeve da.

⁷ Omboe fundopa ttu'se cuintsu poiyi'cco Babilonia'su injama'pandeqquia, jai'ngae ma'caen daya'chove atesu'chondeccu, toya'caen o'fema camba ma'caen daya'chove atesu'chondeccu'qque ji'faye. Tsa'caen fundopa qquen su: —Majan a'i va tevaen'choma camba attepa jongoesune su'choma ñanga conda'ninda gi na'sumbe cu'a sarupa ondiccu'jema tisenga ondiqquiamba tise tsifonga'qque cori candenama andiaña. Toya'caen ña manda'je'cho'su tercer na'suve gi tsoña.

⁸ Tsa'caen susi poiyi'cco na'suma shondo'su injama'pandeqquia tseni ca'ni'fa. Tsa'ma majañi'qque tsa tevaen'choma camba pañamba na'sunga condaye osha'fambi.

⁹ Tsa'caen osha'fambisi na'suja ñoa'me dyopa pa'cco camba'ju inzu'tsse da. Toya'caen nasundeccu bojin sheque'chondeccu'qque ma'caen tsoña'chove atesu'fambi.

¹⁰ Tsa'ma tsa na'sumbe mama tise dutssi'ye toya'caen poiyi'cco bopa fiestaen'jendeccu fundo'je'choma pañamba tseccuni ca'nimba qquen su: —Que Ti'tsse'tssiaja, cuintsu tsangae canseja. Panshaen tsane asi'ttaemba inzujama.

¹¹ Nane que manda'je'choni tsu can'jen fae a'i ño'an Chigambe Qquendya'pa angacan'cho. Que Ti'tsse'tssiambe yayaccasheye'ye na'suite tsu tsa a'ija a'tatsse canjaen tiseja chigandeqquia'caen ñoa'me injama'pave. Tsa'cansi tsu que ti'tsse'tssiambe yayaccashe'ye Nabucodonosor'yeja tisema inisian poiyi'cco va ande'su injama'pandeqquia, jai'ngae ma'caen daya'choma atesu'chondeccu, toya'caen o'fema camba ma'caen daya'chove atesu'chondeccumbe na'suve.

¹² Tsa tsu Daniel. Tsama tsu que yayaccashe'ye na'suiteja Beltsasar qquen inisian. Tsani tsu Chiga Qquendya'pa can'jemba in'jaensi ñoa'me injama'pa've dapa osha'choma pañamba in'jañe atesu. Toya'caen jongoesune ayo'ocho ma'caen in'jamba conda'masia'ma'qque condaye osha. Ma'caen tise conda'ninda tsa'caen tsu daya. Tsa Danielma ttu'seja, Ti'tsse'tssia. Tsa tsu va ttuccu utufanga tevaen'choma camba jongoesu qquen su'choma condaye osha.

¹³ Tsonsi Daniel na'suni i'fasi na'suja tisema iñajampaña: —¿Que ti qui Daniel, tsa Judea andema ña yayaccashe'ye Nabucodonosor'ye patsupa indipa i'chondeccu'su?

¹⁴ Nane paña gi queni Chiga Qquendya'pa can'jemba in'jaensi queja osha'choma a'tatsse in'jamba ñoa'me injama'pa, toya'caen atesu'cho qquen.

¹⁵ Nane poiyi'ccoma ti'tsse va ande'su injama'pandeqquia tsu va'tti can'jen'fa va tevaen'choma camba jongoesu qquen su'choma ñanga condaye. Tsa'ma ni paña'baeñi'qque paña'fambi.

¹⁶ Nane queja osha'cho aiye'pa atesupa conda'masia'ma'qque condaye osha qquen gi paña. Ja'ño que oshapa va su'choma camba jongoesu qquen su'choma ñanga conda'ninda gi na'sumbe cu'a sarupa ondiccu'jema ondiqquiamba que tsifonga'qque cori candenama andiaña. Toya'caen ña manda'je'cho'su tercer na'suve gi tsoña.

¹⁷ Tsa'caen susi Danielja qquen su: —Ñanda gi pa'cco va ttuccu utufanga tevaen'choma Que Ti'tsse'tssianga jongoesu qquen suye in'jan'choma condaya. Tsa'ma que afeye su'choja cuintsu pasaja; tsambi'ta majan quei'ccu na'su tsaoni can'jeñe injan'chonga afeja.

¹⁸ “Nane joccapitssia Chiga tsu na'suve tsomba osha'cho jincho'cho ñocca'tssiama, toya'caen ti'tsse'tssia'ma Que Ti'tsse'tssiambe yayaccashe'ye Nabucodonosor'yenga afe.

¹⁹ Tsa'caen ti'tsse osha'choya'chove afesi tsu mani'su canqque'su aindeccu, mani'su andesundeccu, toya'caen faesu aya'fangae afa'je'chondeccu'qque tisema dyoe'sui'ccu pañamba ñoa'me dyopa ttun'dundu'je'fa. Tsa'cansi tsu tise majama fi'ttiye in'jan'da fi'ttipa majama antteye in'jan'da antte cuintsu canseye. Majamanda tsu ti'tsse'tssia've tson, toya'caen majamanda tsu ñombi'yamba vanae.

²⁰ Tsa'ma tise injama'cho, toya'caen tise in'jan'cho poiyi'ccoma patsu qquen in'jansi Chigaja tise dyaipa'cho'ye joqquitssiamba tise ñotssiama'qque joqquitssian.

²¹ Tsa'caen joqquitssiansi aindeccu'ye joqquitssipa aiña'cho in'janqquia'caen in'jamba tsampi'su boroi'ccu fae'ngae canse. Nane vaura'caen tsu shoshovima amba canse. Toya'caen suruno'qque tsu tise ai'voma tssipoen'jen. Tsa'caen tsu canse qquen in'jaña'ngae: ‘Joccapitssia Chiga tsu poi va ande'su nasundeccuma ma'caen tsoñe in'jan'da tsa'caen tsoñe osha. Toya'caen tise tsu majama na'suve tsoñe in'jan'da tsama na'suve tson.’

²² Ja'ño Ti'tsse'tssia Belsasar, ma'caen tise da'choma atesu'chopa tsambe dutssi'ye'qque qui ni ñoquimbi'ccoe canjeñe in'jambi.

²³ Tsa'camba qui sefacconi'su Na'suma dañomba mandasi Chiga etti'su tasama va cui'jeni i'fasi poiyi'cco que ttu'se'chondeccu tsesu tasanga vinoma cui'jepa tisupa ñoña'cho chigandeccunga iñajan'fa. Nane majan cori chiga, totoacori, cu'a yoshava, yoshava, quini'cco chiga, patuma ñoña'cho chigandeccunga qui iñajan'fa. Nane tsa atteye ni pañañe ni jongoesuveyi'qque atesu'chombindeqquia chiganga qui iñajan'fa. Tsa'ma Que Ti'tsse'tssiama cansian'su Chiganga, tsa que ma'caen tson'jeña'chove tson'su Chiganga, qui iñajan'fambi.

²⁴ Tsa'can'fasi tise tsu tivema moe cuintsu va afa'chove tevaeñe. Qquen tsu afaye:

²⁵ mene, mene, tekel, y parsin.

²⁶ mene, qquenda tsu afaye: Chiga tsu Que Ti'tsse'tssiambe manda'je'choma agattopa naniña'chove canjaen.

²⁷ tekel, qquenda tsu afaye: Que Ti'tsse'tssiama agattosi qui queja shaca.

²⁸ parsin, qquenda tsu afaye: Que Ti'tsse'tssiambe manda'je'cho qui medosundeccu toya'caen persandeccunga patsuyeya.”

²⁹ Tsa'caen condasi tse'faei'ccuyi na'su Belsasarja manda cuintsu Danielnga na'su cu'a sarupa ondiccu'jema ondiqquiamba tise tsi'fonga'qque cori candenama andian'faye. Toya'caen tsu junde poiyi'cconga conda ma'caen Daniel tise manda'je'cho'su tercer na'suve da'choma.

³⁰ Tsequi cose'yi tsu Babilonia'su na'su Belsasarma fi'tti'fa.

³¹ Tsa'caen tsomba Media ande'su a'i, Darío, tise manda'je'chonga ca'ni. Daríoja sesenta y dos canqque'fave an'bian'cho tsu na'suve da.