Daniel 3 - Cofán: Chiga Tevaen'jen

A'ia'can'me ñoña'chonga iñajaña'cho

¹ Omboe na'su Nabucodonosorja manda cuintsu corima a'ia'can'me ñoña'faye. Nane treinta metro bia'su, toya'caen tres metro rande'suve ñoña'faye tsu manda. Tsa'caen ñoñamba cuintsu Babilonia ande'su Dura qquen inisecho'chombe fae'ngatssia andenga ccutsian'faye tsu manda.

² Tsama nani'fasi tsu manda cuintsu poiyi'cco tsa ande'su nasundeccuma ttu'se'fasi jipa tsama nani'chone fiestaen'faye. Nane gobernadorndeccu, sundaro nasundeccu, provincia'su gobernadorndeccu, mandasi jacansundeccu, tesorerondeccu, ñoquiansundeccu, presidentendeccu, toya'caen poiyi'cco tsa provincia'su nasundeccuma tsu ttu'se cuintsu jipa tise a'ia'can'me ñoñañe mandasi ñoñamba nani'chone fiestaen'faye.

³ Tsa'caen ttu'sesi jipa tsu tsain'bitssi a'i tsa ñoña'chonga bo'fa tsama nani'chone fiestaeñe.

⁴ Tsa'caen bo'fasi tsu bo'chonga afa'suve manda'choja quian'me afapa qquen su: “Paña'faja, poi canqque'su aindeccu toya'caen faesu aya'fangae afa'je'chondeccu'qque:

⁵ Ja'ño tsonjen'cho, bifano, fororo'cco, fendo'cco ugafin'di toya'caen osha'cho jeñaqque'suma jeñasi paña'da poiyi'cco tsu na'su Nabucodonosor mandasi a'ia'can'me ñoña'chonga ccaru dyaipa puntssamba tsanga iñajaña'cho.

⁶ Poiyi'cco majan tsa ñoña'chonga ccarupa tsanga iñajambi'ta tsu jundeyi osha'choma oque'jeye ñoñaccu'su si'nge anchanda'je'chonga ttova caniange'faya'cho.”

⁷ Tsa'caen su'chosi, poiyi'cco a'i bo'cho osha'cho jenqque'suma jeñasi pañamba ccaru dyaipa tsa corima ñoña'chonga iñajan'fa.

⁸ Tsa'ma majan nasundeccuja na'su Nabucodonosornga japa judá'su aindeccu tsu shacaen qquen supa

⁹ qquen su'fa: —Que Ti'tsse'tssiaja, tsangae qui canseya, toya'caen que inisema'qque tsu tsangae injan'jen'faya.

¹⁰ Que ti'tsse'tssia manda'cho tsu qquen: Poiyi'cco bo'cho tsu osha'cho jenqque'suma jeña'fasi paña'da junde ccaru dyaipa tsa ñoña'chonga iñajaña'cho.

¹¹ Toya'caen majan tsa'caen tsombi'ta tsu osha'choma oque'jeye ño'ñaccu'su si'nge anchanda'je'chonga ttova caniangeya'cho.

¹² Tsa'caen tsoña'chove manda'ma tsu majan judá'su aindeccu, Que Ti'tsse'tssia in'jamba Babilonia'su nasundeccuma manda'suve tson'chondeccu, Que Ti'tsse'tssiama paña'fambi ni que chigandeccunga iñajan'fambi. Toya'caen Que Ti'tsse'tssia mandasi corima ñoñamba ccutsian'chonga'qque iñajan'fambi. Tsendeccu tsu Sadrac, Mesac, toya'caen Abednego.

¹³ Tsa'caen su'fasi pañamba Nabucodonosorja ñoa'me iyicca'yepa manda cuintsu Sadrac, Mesac toya'caen Abednegoma tiseni anga'faye. Tsa'caen mandasi tise dyaini tsendeccuma anga'fasi

¹⁴ na'suja qquen iñajampaña: —¿Ñoa'me ti qui que'ija ña chigandeccunga ni ña mandasi corima ñoña'chonga'qque iñajan'fambi?

¹⁵ ¿In'jan'fambi ti qui ma'caen osha'cho jenqque'suma jeña'fasi junde ña mandasi corima ñoña'chonga ccarupa tsanga iñajaña'choma? Tsa'caen tsombi'ta qui ja'ñoñi oshacho'choma oque'jeye ñoñaccu'su si'nge anchanda'je'chonga ttova caniange'faya. Tsonsita ¿Jongoesu chiga tsu que'ima ccushaen'me'se?

¹⁶ Tsa'caen susi tsa tres dusungandeccuja qquen su'fa: —Tsane jongoesu qquen afaya'chove me'cho'fa gi.

¹⁷ Ingi Chiga, tsa ingi iñajan'jen'cho, tsu osha'choma oque'jeccu'su si'ngeye ccushaemba Que Ti'tsse'tssia ma'caen egae tsoñe injan'cho'ye'qque ingima ccushaeña.

¹⁸ Tsa'caen tsonsi qui in'jaña ingija que chigandeccu ni que corima ñoña'chonga ccarupa iñajan'jeña'bi'choa've.

Dusungandeccu si'nge'ye ccusha'cho

¹⁹ Tsa'caen su'fasi pañamba na'su Nabucodonosorja tsa tres dusungandeccuma ñoa'me iyicca'yepa tise camba'ju'qque cutsse da. Tsa'caen dapa manda cuintsu osha'choma oque'jeccu'su si'ngema siete se ñoa'me ti'tsse anchandaen'faye.

²⁰ Omboe manda cuintsu tise sundarondeccu'su majan ti'tsse quin'andeccu tsa tres dusungandeccuma tandamba si'nge anchanda'jeccunga ttova ca'niañe. Nane tsa Sadrac, Mesac, toya'caen Abednegoma ttova ca'niañe tsu manda.

²¹ Tsonsi tsu tsa tres dusungandeccu toenga na'su ondiccu'jepayi tandañemba tsa si'nge anchanda'jeccunga ttova caniange'fa.

²² Nane na'su tise mandaqquia'caen jundeyi tson'faye manda'chosi sundarondeccuja tsa'caen tsoñe tsa tres dusungandeccuma indipa si'ngenga ttova ca'niañe jasi si'ngeja quian'me anchanda'jepa tise'panga nepisi ju'rupa pa'fa.

²³ Tsa'ma tres dusungandeccuja tandan'choyi si'ngenga amppi'fa.

²⁴ Tsa'caen tson'fasi na'su Nabucodonosorja camba cunshoa'me jangipa ñoa'me dyopa afa'chove tise mandasi jacansundeccunga qquen afa: —¿Tres a'iyita ti tandamba si'ngenga ttova moe'fa'chombi? Tsonsi su'fa: —Jnn, tseyiccoyi. Pañamba na'suja su:

²⁵ —Nane cuatro a'i tayo ccupayepa mingae dambe'yi si'nge enttinge'ye tsui ja'je'fa'choma gi atte. Fae'ccoja ñoa'me sefacconi'su a'i ai'voa'can tsu.

²⁶ Tsa'caen supa Nabucodonosorja osha'choma oque'jeye ñoñaccu'sumbe sombo'ttinga catsepa quian'me qquen fundo: —Sadrac, Mesac toya'caen Abednego, ti'tsse joccapitssia Chigama shondosundeccu, ¡sombopa ji'faja vani! Tsa'caen susi tres dusungandeccu si'ngeye sombo'fasi

²⁷ poiyi'cco nasundeccu tse'tti bojin sheque'chondeccu tsendeccunga catse'fa. Catsepa can'fanijan ni tise'pa ai'vonga si'nge pporo'chove me'cho'fa tsu. Toya'caen tise'pa tsove'su tose'qque ju'ru zuruchombi ni ondiccu'je'qque dañongembi toya'caen mingavieyi'qque juru've'e tssu'jiambitssi.

²⁸ Tse'faei'ccuyi na'su Nabucodonosorja qquen afa: “Ñotssia tsu Sadrac, Mesac toya'caen Abednegombe Chiga. Tise sefacconi'su shondo'suma tsu moe cuintsu tise'be ño'an shondosundeccuma si'nge'ye ccushaeñe, tsa na'su mandaqquia'caen tsombindeqquia'ma. Nane tise'pa Chigambisi, tsa ñoña'cho chiganga ccarupa iñajan'choma bove ñotsse tsu junde paye, qquen tsu in'jan'fa.

²⁹ Ja'ño ñajan manda: Majan a'i, mani'su canqque, mani'su ande, faesu aya'fangae afa'je'chondeccu can'jeñe'qque va dusungandeccumbe Chigama egae afa'ta tsu gettiyepa pasi tise'pa tsa'o'qque osuipa amppipa boñame daya'cho. Nane faesu chiga qquen ccushaeñe osha'chove me'i'on tsu.”

³⁰ Tsa'caen supa omboe na'suja tsa tres dusungandeccuma ti'tsse'tssia Babilonia'su nasundeccuve tson.