Daniel 2 - Cofán: Chiga Tevaen'jen

Na'su Nabucodonosor ayo'o'cho

¹ Dos canqque'fave manda'jepa Nabucodonosorja tsain'bitsse ayo'o. Tsa'caen ayo'opa panshaen tsama asi'ttaemba anañe oshambi.

² Tsa'camba manda cuintsu injama'pandeqquia, mágiccondeccu, jai'ngae daya'choma atesu'chondeccuma, coragandeccuma toya'caen atesu'chondeccuma ttu'senga'fasi jipa tise jongoesune ayo'o'choma conda'faye. Tsendeccu jipa tisenga ccutsusi

³ na'suja qquen su: —Ayo'opa gi tisu jongoesune ayo'ochove atesu qquen panshaen asi'ttaemba vana'jen.

⁴ Tsa'caen susi atesu'chondeccuja na'suma su'fa: —¡Ti'tsse joccapitssia've dapa tsangae canseja! Ti'tsse Joccapitssia, que ayo'ochoma ingi quema shondosundeccunga condaseja. Tsonsi gi conda'faya jongoesune que ayo'ochoma.

⁵ Tsa'caen su'fasi na'suja su: —Tayo gi qquen tsoñe in'jan. Que'iyi ña ma'caen ayo'ochoma condapa, jongoesune ña tsa'caen ayo'choma conda'faja. Tsa'caen conda'fambian'da gi que'ima getti fi'ttisi tsu que'i tsa'oja jimbitsse sheque catiyepa boñame daya.

⁶ Tsa'ma ña ayo'ochoma condapa, jongoesune ña tsa'caen ayo'ochoma conda'ta qui ña afe'cho ñocca'tssiama injan'tsse isupa joccapitssia've da'faya. Tsa'cansi conda'faja ma'caen ña ayo'ochoma, toya'caen jongoesune ña tsa'caen ayo'ochoma.

⁷ Tsa'caen na'su susi atesu'chondeccuja ccase su'fa: —Ti'tsse'tssia, condaseja que ayo'o'choma. Tsonsi gi jongoesune que tsa'caen ayo'ochoma conda'faya.

⁸ Tsa'caen su'fasi na'suja qquen su: —Tayo gi in'jan, que'ija ña ma'caen tsoñe su'choma pañamba qui ti'tsse'tssi a'tave biañañe in'jan'fa.

⁹ Tsa'camba qui ma'caen ña ayo'ochoma condambi'ta poiyi'cco fae'ccungayi japa pa'faya. Nane que'ija ña tisu ayo'o'choma condasesi pañamba aqquia afo'poemba ña tsoñe in'jan'choma pasaeñe in'jamba qui ña in'janqquia'caen conda'fambi. Tsa'cansi conda'faja ma'caen ña ayo'ochoma. Tsonsi gi in'jaña que'i jongoesune ña tsa'caen ayo'o'chove condaye osha'fa'chove.

¹⁰ Tsa'caen susi atesu'chondeccuja qquen su'fa: —Ti'tsse'tssia na'su, me'i'on tsu va andeni que iñajanqquia'caen iñajansi majan tsane condaya'chove. Toya'caen minga'ni'qque tsu majan na'su ti'tsse'tsse oshacho'cho'qque tsa'caen a'i condaye osha'masia've iñajan'fambi.

¹¹ Ti'tsse'tssia na'su, ñoa'me aiye'pave qui iñajan ni majañi'qque condaye osha'masia've ñoa'me chigandeccuma iñajanqquia'caen. Tsa'ma tsendeccuja a'ini can'jen'fambi.

¹² Tsa'caen su'fasi pañamba na'suja ñoa'me iyicca'yepa manda cuintsu poiyi'cco Babilonia'su atesu'chondeccuma fi'tti'faye.

¹³ Tsa'caen manda'choma poiyi'cco pañamba Daniel, toya'caen tisei'ccu canjensundeccuve'qque tta'tta'fa fi'ttiye.

Daniel na'su ayo'ochoma conda'cho

¹⁴ Tsa'caen poiyi'cco injama'pandeqquia'ma fi'ttiye manda'choma in'jamba Danielja egae afasa'ne in'jamba ñotsse afapa Arioc tsa na'sumbe sundaro na'sunga

¹⁵ qquen iñajampaña: —¿Jongoesune tsu na'suja ñoa'me iyicca'yepa tsa'caen pasambe'yi fi'ttiya'chove manda? Tsa'caen iñajampañasi Ariocja conda jongoesune na'su iyicca'ye'choma.

¹⁶ Pañamba Danielja na'suni japa iñajan cuintsu re'riccoe rondaccasi tise na'su ma'caen ayo'ochoma, toya'caen jongoesune tsa'caen ayo'ochoma condaye.

¹⁷ Tsa'caen supa tisu tsaoni japa poiyi'cco tisei'ccu canjensundeccunga condase tsa Ananías, Misael, toya'caen Azaríanga'qque.

¹⁸ Poiyi'cco pañamba fae'ngae sefacconi can'jen'cho Chigama iñajan'fa cuintsu tise'pama fuitepa ma'caen tsa a'tutsse tson'jen'choma canjaeñe. In'jamba'qque Babilonia'su atesu'chondeccui'ccu fae'ngae tise'pama fi'tti'fasa'ne.

¹⁹ Tsequi cose tsa in'jamba tson'jen'choja attian'choi'ccu Danielnga canjaen. Tsa'caen pa'ccoma canjaensi Danielja Na'su Chigama ñotsse afapa

²⁰ qquen su: “Tsangae ñotsseyi jinchoja Chigambe inise. Nane tsambeyi tsu atesuqque'su, toya'caen oshachoqque'su'qque.

²¹ Tsayi tsu canqque'fa, ccovu, a'ta, cose, coejefa, sanfane'qque cambiamba na'suma somboemba ca'niañe'qque osha. Atesu'chondeccunga tsu atesuqque'suma afe. Toya'caen injama'pandeccunga tsu ti'tsse in'jan'faya'chove afe.

²² Tsa tsu ñoa'me a'tutsse osha'chove su'choan'qque canjaeña. Tisenejan sinttia'su'qque tsu a'tatssi. Nane tiseni tsu a'tatssia'ja jin.

²³ Ña yayandeccumbe Chiga, quenga gi chigatsuafepaenján qquen supa queve in'jan que ñama atesu'chove tsomba toya'caen quin'anme tsonsi. Toya'caen qui ja'ñojan ingi in'jamba iñajan'choma a'tatsse canjaen. Tsa'caen qui inginga na'su asi'ttaemba vana'jen'choma a'tatsse canjaen.”

²⁴ Tsa'caen afa nanimba Danielja Ariocni can'su ja. Nane tsama tsu na'suja manda cuintsu Babilonia'su atesu'chondeccuma fitti'ttiye. Tsanga japa Danielja qquen su: —Injama'pandeqquia'ma fi'ttimbe'yi ñama na'sunga angaja ña pa'cco tise ayo'ochoma condaye.

²⁵ Tsa'caen susi jundeyi Ariocja Danielma na'su Nabucodonosornga angapa na'sunga su: —Atte gi judá'sundeccu indiyepa ji'cho'su fae'cco tsu que ayo'ochoma condapa, jongoesune Que Ti'tsse'tssia tsa'caen ayo'ochoma condaye osha.

²⁶ Tsa'caen susi pañamba na'suja Danielma su: —¿Ñoa'me ti qui su? ¿Osha ti qui ma'caen ña ayo'ochoma condapa, toya'caen jongoesune ña tsa'caen ayo'ochoma condaye?

²⁷ Tsonsi Danielja su: —Me'i'on tsu ni majan atesu'cho ma'caen jai'ngae daya'chove atesu'chondeccu, injama'pa, toya'caen o'fema camba ma'caen daya'chove atesu'chondeccu, tsa Que Ti'tsse'tssia atesuye injan'choma in'jamba condaya'chove.

²⁸ Tsa'ma fae Chigayi tsu sefaccone que injan'choma canjaen. Toya'caen tsayi tsu Que Ti'tsse'tssia ma'caen jai'ngae daya'choma conda. Ja'ño gi condaya Que Ti'tsse'tssia anamba ayo'opa atte'choma:

²⁹ Que Ti'tsse'tssia ana'jen'choni ccuipa jai'ngae ma'caen daya'choma asi'ttaensi tsu tsa Chiga osha'cho atesu'ma'sia'ma canjaen'suja tsane conda.

³⁰ Toya'caen ñanga'qque tsu tsane a'tatsse canjaen. Tsa'ma ñajan poiyi'cco atesu'chondeccuma ti'tsse'tssisi atesuchopa que a'tutsse ayo'ochoma ñanga'qque canjaen qquen in'janjama. Nane ña, Que Ti'tsse'tssia, ayo'ochoma atesupa jongoesune que tsa'caen ayo'ochoma condasi pañamba que atesuye tsu ñanga'qque Chiga tsa'caen canjaen.

³¹ “Que Ti'tsse'tssia, qquen tsu que ayo'opa atte'cho: Que Ti'tsse'tssia'ye tsu fae'cco rande a'ive ñoña'cho chhariccotssipa tise ai'vo dyo'tssia jangi.

³² Tsa ñoña'chombe tsoveta tsu pa'cco coriyi. Tise utu'cho toya'caen tise tive tsu totoacorima ñoña'cho. Tise tto'pa toya'caen tise ttena'go tsu cu'a yoshavama ñoña'cho.

³³ Tise san'ccoata tsu yoshavama ñoña'cho. Toya'caen tise tsu'tteta tsu ma'ttija yoshavama ñoña'cho; tsa'ma cca'ttija aqquia apichama ñoña'cho.

³⁴ Tsama Que Ti'tsse'tssia, caña'jen'ni tsu a'i ccofettambi'ma fae patu, ccotta'cco'ye battin jipa tsa ñoña'cho ccutsu'chombe tsu'ttenga depa tsu'ttema u'cca.

³⁵ Tse'faei'ccuyi tsu yoshava, apicha, cu'a yoshava, totoacori, toya'caen ñoa'me cori'qque jimbitsse vuvu sheque. Nane coejefani trigoma qquesho'jesi fingian ttonoma metsse angaqquia'caen tsu ni minga'vieyi'qque jinchombitsse vuvu sheque. Tsa'ma tsa patu vuvian shequian'suja tse'ttinga ccuipa rande ccotta'ccove dasi pa'cco andema picco.

³⁶ “Tsa tsu que ayo'ocho. Ja'ño gi, Que Ti'tsse'tssia, jongoesune tsa'caen ayo'ochoma condaya:

³⁷ Que, Ti'tsse Joccapitssia, qui poi nasundeccuma ti'tsse'tssia. Nane sefacconi'su Chiga tsu quema na'suve tsomba afe cuintsu osha'chove tsomba quin'sui'ccu mandasi aindeccu quema ñotsse afa'faye.

³⁸ Toya'caen pa'cco a'i, aiña'cho, chhajepa jacanqque'suma'qque mandaye antte. Tise tsa'caen anttesi queja tsa cori tsove'caen joccapitssia've da.

³⁹ Que Ti'tsse Joccapitssia manda'je'chombe omboe tsu faesu na'su quene bove'ccoa ca'niña. Toya'caen omboe tsu cu'a yoshava'can na'su ca'nimba pa'cco andema manda'jeya.

⁴⁰ Tsambe omboen tsu faesu na'su yoshava'caen quin'an jiya. Nane yoshava pa'ccoma ucca shequianqquia'caen tsu tsain'bitssi nasundeccuma patsuya.

⁴¹ “Que Ti'tsse'tssia, toya'caen qui atte tsu'tte toya'caen tsu'tte'su tsimian'cco ma'tti apicha, cca'ttija yoshavama. Tsata tsu canjaeñe in'jan nasundeccu attufaccoya'choma. Nane majan quin'an, majan utu'ccoa've daya'chone tsu tsa'caen ma'tti yoshava cca'tti apichave canjaen. Nane, Que Ti'tsse'tssia, yoshava apichai'ccu echhoen'choma qui atte.

⁴² Toya'caen tsu'tte'su tsimian'ccota tsu ma'ttija yoshava, cca'ttija apicha. Tsata tsu canjaen manda'je'cho enttingeve quin'amba enttingeve oshambi'choa've.

⁴³ Tsa, Que Ti'tsse'tssia, yoshava apichai'ccu echhoen'choma atteqquia'caen tsu tsa manda'je'cho nasundeccuja tise'pa dushundeccuma poini anttecco'faya fae'ngatsse dacañe in'jamba. Tsa'ma mapán tsa'caen tson'jen'an'qque ñoa'me fae'ngatsse daye osha'faya'bi yoshava apichai'ccu echhoengembiqquia'caen.

⁴⁴ Tsa'caen tsendeccu da'je'ni tsu sefacconi'su Chigaja minguite pasa'masia na'suma moesi jipa poiyi'cco nasundeccuma metsse sefaemba tsangae tise'yi na'suve daya.

⁴⁵ Tsane tsu tsa patu ccotta'cco'ye a'i ccofettambi'ma battin jipa pa'cco yoshava, cu'a yoshava, apicha, totoacori, toya'caen corima metsse vuvian cati'choja canjaen. Ti'tsse Joccapitssia Chiga tsu Que Ti'tsse'tssianga jai'ngae ma'caen daya'choma tsa'caen canjaen. Tsa ayo'opata tsu ñoa'metsse ayo'o'cho. Toya'caen tsane conda'cho'qque tsu ñoa'metsse su'cho.”

⁴⁶ Tsa'caen susi na'su Nabucodonosorja Daniel cambajufanga tsutta'choi'ccu ccaru dyaipa andenga puntssamba manda cuintsu chiganga afeqquia'caen Danielnga afe'faye. Toya'caen tsu manda ñome'bama'qque tisenga oque oraen'faye.

⁴⁷ Omboe Danielnga su: —Ñoa'me que'i Chiga tsu poi chigandeccuma ti'tsse joccapitssia Chiga. Tsa tsu nasundeccumbe Na'su toya'caen osha'cho atesu'ma'sia'ma attian'su. Nane queyi qui tsa atesu'masia'ma atesupa condaye osha.

⁴⁸ Tsa'caen supa omboe Danielma ti'tsse joccapitssia've tsomba osha'cho ñotssiama afe. Toya'caen Babilonia'su provinciambe na'suve tisema ca'niamba poi tsa ande'su atesu'chondeccumbe ti'tsse joccapitssia na'suve tson.

⁴⁹ Daniel iñajanqquia'caen na'suja Sadrac, Mesac, toya'caen Abednegoma'qque ca'niansi tsu tise Babilonia'su provinciane in'jan'choma tson'jen'fa. Tsa'ma Danielja na'sui'ccu fae'ngatsse manda'je.