Daniel 12 - Cofán: Chiga Tevaen'jen

¹ “Tse'faei'ccuyi tsu joccapitssia Chigama sefacconi'su shondo'su, Miguel, tsa que aindeccuma coirapa sepi'suja attiaña. Tsequi tsu ñoa'me dyo'tssiya. Nane minguite'qque tsu tsa'caen da'choja attiambi tseyi poi aindeccuve agattointe'qque. Nane tsequi a'ta nepisi tsu poiyi'cco que aindeccu, tayo tseni'su tevaen'jenga tisupa inisema tevaenge'chondeccuja, ccusha'faya.

² Toya'caen tsain'bio papa atuye'chondeccu ccase qquendyapa majanda tsangae tsu canse'faya. Tsa'ma majanda ansangepa tsangae tsu vana'jen'faya.

³ Tsequi tsu majan injama'pandeccupa, tsain'bio a'inga tansintsse atesiansundeccuja, sefaccoa'caen chanjun'faya. Nane, ¡tsangae tsu o'fea'caen chanjun'jen'faya!

⁴ “Tsa'ma queja, Daniel, va su'choma ñotsse condambe'yi an'bianjan. Nane va tevaen'jema piccopa setsaenqque'sui'ccu ancaenjan osefaeña'cho a'ta nepiya'ngae. Tsain'bio a'i tsu cca'tti cca'tti jacan'faya osha'choma ti'tsse atesuye.”

⁵ “Tsonsi ña Daniel gi faesu dos a'ima atte, fa'e na'en vaofani ccutsu'choma, faesuja na'en jovofani ccutsu'choma.

⁶ Tsa lino sarupama ondiccucho'choja toya na'en ombani ccutsusi fa'e tsa'suyi tisema iñajampaña: ‘¿Minga'ni tsu va joccapitssia tsoña'choja nepiya?’

⁷ Iñajampañasi tsu lino sarupama ondiccucho'choja poifa'su tivema sefaningae yasapa su: ‘Na'su tsangae canse'cho Chigaja tansintsse conda tres canqque'fa faesu enttinge canqque'fa pasasi tsu tsa'caen nepiya. Nane Chiga in'jan'cho aindeccu patsuyepa quin'su me'choe da'fasi tsu pa'cco va tsoña'choja nepiya.’

⁸ “Ñajan tise su'choma paña'ma atesumbipa iñajampaña: ‘Na'su, tsa'caen tson'cho pasa'ta ¿mingae tsu daya?’

⁹ Iñajampañasi tiseja su: ‘Daniel, ti'tsse iñajampañajama. Nane va condase'choja osefaeña'cho a'ta nepisi atesuya'cho.

¹⁰ Toya nepimbi'te tise'pama noñangiansi tsain'bio a'i osha'choi'ccu vanasundeccu tsu ñotssia giya'tssive sombo'faya. Tsa'ma egae tsinconsundeccu tsu ti'tsse egae tsincomba canse'faya. Nane egae tsinconsundeccuja Chiga ma'caen tsoña'choma atesu'faya'bi. Tsa'ma injama'pandeqquiaja tsama in'jamba atesu'faya.

¹¹ Chiganga poi a'ta oque oraemba afe'je'choma antte'fasi mil dosciento noventa a'ta pasasi tsu egae dyoña'suma Na'su Chiga ettinga ccutsiaña cuintsu tsangae dañoñe.

¹² Nane avujatssiya tsu majan a'i ti'tsse ronda'jepa mil tresciento treinta y cinco a'tave nepian'da.

¹³ Tsa'ma queja, Daniel, can'jemba, papa ño'faja. Nane osefaeña'cho a'ta qui ccase qquendyapa quenga afeya'choma isuya.’ ”