Amós 7 - Cofán: Chiga Tevaen'jen

Amós Amasíasma cachui'cho

¹⁰ Betelni'su Chigama afa'su, Amasíasja, manda Israel ande na'su Jeroboamnga cuintsu qquen condaye: “Amósja Israel aindeccuma in'jaen cuintsu fae'ngae ñoñamba Que Ti'tsse'tssiama daño'faye. Ñotssimbi tsu tise toyayi afa'jepa va andesundeccuma tsa'caen ccaningae in'jaeñe.

¹¹ Nane cca'tti cca'tti jacamba tsu su: ‘Matichi'ccu Jeroboamjan paya. Pasi poi israendeccuja faesu andeni angaye'faya'cho.’ ”

¹² Omboe Amasíasja Amósnga qquen su: —¡Joqquitssipa jaja, Chiga Aya'fama afa'su qquen su'cho! Ñoa'me Chiga Aya'fama afaye in'jan'da Judáni japa tseni tsa'caen afapa ganamba canseja.

¹³ Tsa'ma va Betelni, ti'tsse jipa afajama. Vata tsu ande na'su chigama iñajan'jen'tti. Pa'cco ande'suma ti'tsse'tssia chiga etti tsu.

¹⁴ Tsa'ma Amós tisema su: —Chiga Aya'fama afa'sumbi gi. Ni tisuma tsesuve canjaembi gi tsai'ccu ganamba canseye. Tsa'ma ovejama coira'suve gi semamba canse. Toya'caen tsampi'su higoma taipa gi ganamba canse.

¹⁵ Tsa'caen ña canse'choma tsu Na'suja tsa'ye ñama itsapa mandapa su: ‘Japa ña Aya'fama ña israel aindeccunga condaja.’

¹⁶ Tsa'caen Na'su ñama manda'chosi tise Aya'fama pañajan. Nane qquen qui queja su: ‘Israelnga egae afajama: Na'su su'cho tsu, qquen supa. Ni Isaac omba'su dutssiyendeccunga egae afajama.’

¹⁷ Tsa'ma qquen tsu Na'suja su: ‘Faesu ande'su sundarondeccu tsu jipa canqquenga a'tatsse que pushei'ccu ccui'faya. Que dushundeccuma'qque matichi'ccu fi'tti'faya. Que andema itsapa attufaen'faya majan gana'sunga. Quema'qque faesu Na'su Chigama atesumbi'choa andeni angasi qui tseni paya. Nane israendeccuma'qque indipa tise'pa ande'ye joqquitssiamba biani anga'faya.’