Amós 3 - Cofán: Chiga Tevaen'jen

Chiga aya'fama afa'su afa'cho

¹ Israendeccu paña'faja Na'su que'ima Egipto'ye somboen'su que'inga su'choma:

² “Poi ande'su aindeccuma camba gi jo'su que'iveyi ttu'se. Tsa'camba gi que'i ñotsse tsombian'da que'i injama'choma somboeña'cho.”

³ Dos fae'ngae jacan'da tsu tayo fae'ngae in'jan'fa.

⁴ Ttesi'qque tsampini seyo'je'tti'e tayo tise indipa anqque'suma atte. Tise can'jen'ni can'jemba seyo'je'a'qque tayo indipa an'jen.

⁵ Nane chhiriria amppi'ta tsu tse'tti quendecco'cho jinsi amppi. Toya'caen quendecco'cho batti'ta tsu jongoesu tsanga pporosi batti.

⁶ Gera'su tsonjen'cho canqqueni jen'ninda tsu aindeccuja tayo dyopa ttun'dundu'je'fa. Tsa'ma canqquenga jongoesu egave tson'jen'da Na'su mandasi tsu tsa'caen tson'jen.

⁷ Nane Na'suja jongoesuve tson'jen'da tsu tise Aya'fama afasundeccunga conda.

⁸ Ttesi fundo'je'ninda poiyi'cco a'i tsu dyo'fa. Toya'caen Na'su afaen'ninda, ña, tise Aya'fama afa'suja, aqquia injanga afaya'bi.