2 Samuel 5 - Cofán: Chiga Tevaen'jen

David poi Israel na'suve da'cho

¹ Tsonsi poiyi'cco israe'su aindeccu tsu Hebróni bo'fa Davidi'ccu cachuiccopa condaseccoye. Cachuiccopa su'fa: “Ingija ñoa'me que antiandeccu.

² Nane Saúl ingi na'suite'qque qui queja ñoa'me Israel gera iyicco'je'choma manda'je. Toya'caen tsu Na'su Chigaja quenga ñoa'me conda que jai'ngae israendeccuma mandapa ande na'suve daya'choma.”

³ Tsa'caen in'jamba tsu poiyi'cco israe'su coenzandeccu Hebróni jipa na'su Davidi'ccu condasecco'fa. Condaseccopa tsu Davidja israendeccui'ccu fae'ngae injancco'fa'chove afa Na'su Chiga paña'jen'ni. Tsonsi tsu Davidma feti'fa poi israe'su na'suve.

⁴ Davidja treinta canqque'fave an'biamba na'suve dapa cuarenta canqque'fave tsa'caen can'jen.

⁵ Nane o'tie Judá aindeccumbe na'suve dapa siete canqque'fave Hebróni can'jen. Omboen tsu Jerusaléni treinta y tres canqque'fave poi israendeccumbe toya'caen poi judándeccumbe na'suve dapa can'jen.

David Jerusaléni manda'cho

⁹ Jerusaléni'su sundaro ettima patsupa Davidja tseni ca'nimba Jerusalénma inisian “David Canqqueve”. Tsomba sinjunccune ashaemba patu ttuccuve ñoña'fa na'su tsa'ove tsanga tsao'ñañe.

¹⁰ Davidja tseni can'jemba ñoa'me ti'tsse quian'me manda. Nane Na'su, Osha'choma Oshacho'cho Chiga tsu tisei'ccu can'jen.