2 Samuel 12 - Cofán: Chiga Tevaen'jen

Natán Davidma iyu'ucho

¹ Na'su Chiga Quitsaja tise aya'fama afa'su Natánma Davidnga moe. Natánjan Davidnga catsepa tisema su: —Fae canqqueni tsu dos tsandiendeccu can'jen'fa. Fa'e ricosi faesuja va'cha can'jen.

² Nane ricoja tsain'bitssi vaura toya'caen ovejama an'bian.

³ Tsa'ma va'chaja aqquia fae oveja du'shuve an'bian tisu chava'choma. Tsama tsu coeña fae'ngae tise dushundeccui'ccu. Nane tsa oveja du'shuja tise na'sui'ccu can'jemba tise anqque'suma fae'ngae amba tise tasa'suma'qque cu'ipa ñoa'me na'su tivenga opisi ana'jen. Ñoa'me tsa tsandiembe onque'ngia'can tsu.

⁴ Tsomba fae a'ta tsu faesu a'i tsandie riconi pasia'su ji. Jisi ricoja tise vaura ni tise oveja du'shuma fi'ttiye in'jambi pasia'suma o'fiañe. Tsa'ma japa va'chambe oveja du'shuma itsapa fi'ttipa sho'ccoen cuintsu pasia'su añe.

⁵ Davidja condase'choma pañamba tsa ricoma ñoa'me iyicca'yepa Natánga su: —Chiga caña'jen'ni gi su: ¡tsa'caen tson'jen'cho tsandieja paya'cho tsu!

⁶ ¡Toya'caen tsu va'changa afepoeña'cho ccattufayi se oveja du'shu bare'chone! ¡Nane injama'cho me'choqquia'caen tsa'caen tson'da tsu afepoeña'cho!

⁷ Tsonsi Natánjan Davidma su: —¡Que qui tsa tsandie! Toya'caen tsu qquen Na'su israendeccu Chigaja quema su: ‘Quema gi ttu'se Israel na'suve daye. Toya'caen gi quema na'su Saúl'ye ccushaen.

⁸ Nane que na'sumbe tsa'oma quenga afepa gi tise pushendeccuma'qque quenga afe. Poi israendeccu, poi judándeccuma'qque gi quenga afe tise'pa na'suve daye. Pa'cco tsa shaca'choecan'da gi ti'tsse quenga afeye'can.

⁹ ¿Micomba qui Na'su Chiga aya'fama chi'gapa tise in'jambi'choa've tson? Queja Uríasma fi'ttipa tise pushema itsa tisumbe. Nane amonita sundaroi'ccu qui tisema fi'ttian.

¹⁰ Que tsa'caen hitita Urías pushema tisumbeve itsa'ninda minguite tsu iyicco'je'choja pasaya que tsa'o'ye toya'caen que dushundeccu'ye.’

¹¹ Toya'caen tsu Na'su Chigaja qquen su: ‘Nane que dushundeccu'ye gi quema dañoña. Que caña'jen'ni gi que pushendeccuma que ñotsse in'jan'chonga afesi tsu tiseja a'tatssianga que pushendeccui'ccu ccuiya.

¹² Queja a'tutsse tsonsi gi antte cuintsu a'tatsse tsonsi poiyi'cco israendeccu atte'faye.’

¹³ Na'su tsa'caen su'choma pañamba Davidja Natánga su: —Na'su Chiganga gi egae tsincon. Natánjan Davidma su: —Na'su Chiga que egae tsincon'choma joqquitssiansi qui paya'bi.

¹⁴ Tsa'ma que ñoa'me Na'suma dañomba tson'chone tsu que du'sian'choja paya'cho.

¹⁵ Tsa'caen supa Natán tisu tsaoni jasi Na'su Chigaja Urías pushe Davidmbe isu'cho du'shuma pporaen cuintsu pave daye.

¹⁶ Pajisi Davidja tisene Chigama iñajan. Nane ambitsse tise tsaoni ca'nimba andeni ccui a'ta'je poi cose.

¹⁷ David tsa'o'su coenzandeccu tisenga catsepa iñajan'fa cuintsu ande'ye jangiye. Tsa'ma jangimbi ni tise'pai'ccu jongoesuma an'jembi.

¹⁸ Siete a'ta pasasi du'shuja pa. Pasi Davidma shondosundeccu tisenga condaye dyojo'fa qquen in'jamba: “Du'shu toya canse'ni afasi ingima pañañe chi'ga'chomanda ¿ma'caen gi conda'faya du'shu pa'chone? Isha tsu sumbie dapa egae tsoña.”

¹⁹ Tsa'ma Davidja tisema shondosundeccu a'tutsse condasecco'je'choma attepa du'shuja tayo pa qquen in'jamba iñajampaña: —¿Tayo ti pa du'shuja? Tsonsi su'fa: —Ju, tayo pa.

²⁰ Pañamba Davidja ande'ye jangipa onjon. Onjomba ñome'bai'ccu ño'memba cuna ondiccu'jema ondiccu. Ondiccupa Na'su Chiga ettinga ca'nimba Na'suma iñajan. Iñajan nanimba toequi tise tsaoni jipa dyaipa aña'chove afa. Afesi an nanisi tsu

²¹ tisema shondosundeccuja tisema iñajampaña'fa: —¿Jongoesie qui tsa'caen tson? Nane du'shu pajisi ambitsse qui ina'jen. ¡Tsa'ma ja'ño du'shu pasi qui jangipa an!

²² Tsonsi Davidja su: —Du'shu toya cansesi gi ambe'yi ina'jen. Nane injama'choni gi asi'ttaen: ‘Isha tsu Na'suja ñama mende'yepa antteya cuintsu du'shu ccushaye.’

²³ Tsa'ma ja'ño pa'ninda ¿ma'caen gi ambecaña? Oshambi gi du'shuma ccase qquendyaeñe. Nane jai'ngae gi tiseni jaya. Tsa'ma tiseja toequi ñani jiya'bi.

Salomónma isu'cho

²⁴ Tsomba Davidja tise pushe Betsabéma ñotsse afa cuintsu ñombi'ye'choma pasaye. Omboe tisei'ccu fae'ngae can'jensi ccase surie da. Tsa'caen dapa tsandie du'shuve isusi Davidja tisema inisian Salomónme. Toya'caen Na'su Chigaja tisema ñotsse in'jan.