2 Samuel 11 - Cofán: Chiga Tevaen'jen

David Betsebéi'ccu egae tsincon'cho

¹ Coejefave dajisi tsu poi ande nasundeccu sombopa geraeñe atesu'fa. Tsa'cansi majan canqque'fa Davidja jambipa Joabma manda cuintsu sundaro nasundeccu toya'caen poi israe'su sundarondeccui'ccu japa amonitandeccui'ccu iyicco'faye. Japa amonitandeccuma patsupa Rabá canqquema shoquendi ttupa ronda'je'fa. Tsa'ma na'su Davidja toe Jerusaléni can'jen.

² Fae cose Davidja ana'jen'cho'ye jangipa tise tsao'cco omba'su ppappacconi tsui jacamba atte faesu tsaoni pushesu onjon'jen'choma. Nane tsa pushesuja me'detssisi attepa

³ Davidja manda ma'can pushesuve atesuye in'jamba. Japa toequi jipa tsu conda tsa pushesuja Betsabé, tsa Eliam onque'nge. Tise tsa'ndu tsu Urías tsa hitita a'i.

⁴ Tsonsi Davidja ttu'sesundeccuma manda moe cuintsu pushesuma i'nga'faye. I'fasi jisi Davidja tisei'ccu ccuipa fae'ngae ana'fa. (Egapa pasapa oti'shi'choma tsu Davidja tisema atte.) Tsomba pushesuja toequi tise tsaoni ja.

⁵ Omboe pushesuja surie dapa David tisema tsa'caen tson'chone conda.

⁶ Tsa'caen pañamba Davidja Joabma manda Urías tsa hitita a'ima tisenga moeñe. Joab tisema moesi

⁷ Urías Davidnga ccutsusi Davidja osha'chone tisema iñajampaña: ¿Minga tsu Joab? ¿Minga tsu sundarondeccu? ¿Minga tsu gerave tson'jen'cho?

⁸ Tsa'caen iñajampañamba Uríasma manda cuintsu tise tsaoni japa onjomba ñofaccaye. Tsonsi Urías na'su tsaone sombopa ja. Tise jasi Davidja afe'chove aña'cho tayo sho'ccoen'choma tise tsaoni moe.

⁹ Tsa'ma Urías tise tsaoni jambipa na'su tsa'o coira'su sundaro cuartoni japa ana.

¹⁰ Ccaqui a'ta Urías tise tsaoni jambi'choa'ma Davidnga conda'fasi Davidja Uríasma iñajampaña: —Queja ñoa'me biane jipa ¿micomba qui que tsaoni jambi?

¹¹ Uríasja su: —Chiga a'i'ccu injancco'fa'cho cafon carpani ccuisi poi israe'su, judá'su sundarondeccu'qque carpani ja'ño can'jen'fa. Toya'caen ña na'su, Joab, poiyi'cco que ña joccapitssia na'sumbe sundaro nasundeccu tsu carpani gerane sinjunccuni ana'fa. Tsa'can'an'ma, ¿ma'caen gi ñañi'jan tisu tsaoni japa amba cui'pa tisu pushei'ccu anaña? Nane ñoa'me tsa'caen tsoñambi gi.

¹² Tsa'ma Davidja tisema manda: —Ja'ño a'ta vani can'jensi gi tu'i que jaya'chove antteya. Tsa'caen mandasi Uríasja tsequi a'ta'qque Jerusaléni can'jen.

¹³ Can'jensi Davidja tisema ttu'se tisei'ccu amba cu'iye. Cui'ñamba tisema ccusian. Tayo cosesi Uríasja sombopa na'su tsa'oma coira'su sundaro cuartoni japa ana tise tsaoni jambe'yi.

¹⁴ Ccaqui a'ta sinte tsu na'su Davidja tevaen'jema tevaemba Uríasnga moe cuintsu angapa Joabnga afeye.

¹⁵ Qquen tsu tevaen'jenjan su: “Uríasma o'tie ja'su sundarondeccui'ccu ccutsianjan. Nane ti'tsse quian'me iyicco'ya'ttinga ccutsiamba faesundeccumajan sepaccoe somboenjan cuintsu tisema enemigondeccu fi'ttiye.”

¹⁶ Tsa'caen tevaensi Joab Rabá canqquema shoquendi piccopa Uríasma ccutsian mani in'jan'tssi enemigo ti'tsse quian'me iyiccoya'ttinga.

¹⁷ Tsendeccuja canqque'ye sombopa Joabi'ccu iyiccoye ashaemba majan David sundarondeccuma'qque fi'tti'fa. Nane tsendeccui'ccu fae'ngae tsu Urías tsa hitita a'ija pa.

¹⁸ Tsonsi Joabja Davidnga iyicco'je'chone condase'choma moe.

¹⁹ Conda'su ja'sunga qquen su: “Que pa'cco iyicco'je'chone na'sunga condasesi

²⁰ isha tsu tiseja iyicca'yeya. Tise iyicca'yepa qquen iñajampaña'ninda: ‘¿Jongoesie qui panshaen pporotsse canqque ttuccunga catse'fa? ¿Atesu'fambi ti qui ttuccune osha'choma que'inga ttovaya'chove?

²¹ ¿Nane majan tsu Abimelec tsa Jerobaal dutssi'yema fi'tti Tebes canqquei'ccu iyicco'je'fasi? Ju, pushesu tsu sunda'cho patuma ttuccune ttova moemba tisema fi'tti. Tsa'canqque'suma ¿jongoesie qui canqque ttuccunga panshaen catse'fa?’ Tsa'caen iñajampaña'ninda qquen tisenga suja: ‘Toya'caen tsu pa quema shondo'su Urías tsa hitita a'i.’ ”

²² Tsa'caen susi japa Jerusaléni nepipa pa'cco Joab su'choma Davidnga conda. Davidja Joabma iyicca'yepa conda'sunga su: —¿Jongoesie qui panshaen pporotsse canqque ttuccunga catse'fa? ¿Atesu'fambi ti qui ttuccune osha'choma que'inga ttovaya'chove? ¿Nane majan tsu Abimelec tsa Jerobaal dutssi'yema fi'tti Tebes canqquei'ccu iyicco'je'fasi? Ju, pushesu tsu sunda'cho patuma ttuccune ttova moemba tisema fi'tti. Tsa'canqque'suma ¿jongoesie qui canqque ttuccunga panshaen catse'fa?

²³ David tsa'caen iyicca'yesi conda'suja su: —Tsa canqque'su a'ija sombopa ingima vanae'fa sinjunccuni. Tsa'ma quian'me iyiccopa gi tise'pama ganamba tise'pa canqque sombo'ttinga nepi'fa.

²⁴ Tse'ttinga iyicco'jesi tsu battittiansundeccuja ttuccune ccutsupa ingi que joccapitssia na'sumbe sundarondeccuma battittian'fa. Nane majan quema shondosundeccuma fittitti'fa. Toya'caen tsu Urías tsa hitita a'i'qque pa.

²⁵ Tsonsi Davidja conda'sunga su: —Joabnga condaja cuintsu tsane asi'ttaembe cañe. Tsaveqque'su tsu geraja. Nane ti'tsse quian'me tsu iyiccoya'cho canqquema patsuye. Ya'caen condaja cuintsu vuiquiye.

²⁶ Tsonsi Urías pusheja pañamba ñombi'ye tise tsa'ndu pa'chone.

²⁷ Ñombi'ye'cho pasasi Davidja manda cuintsu ttu'sepa i'fasi tise ettini can'jeñe. Isi tsu Davidja tisema pushe. Omboe tsandie du'shuve isu. Tsa'ma Na'su Chigaja David tsa'caen tson'choma in'jambipa chi'ga.