2 Reyes 5 - Cofán: Chiga Tevaen'jen

Naamán paqque'suma ccusha'cho

¹ Fae a'i tsu can'jen tise inise Naamán. Tiseja Siria ande'su sundaro na'su. Na'su Chiga Siriama fuitepa anttesi Naamán ñotsse geraemba patsusi tsu ande na'su tisema ñotsse in'jan. Tsa'ma Naamánjan na congomba paqque'sunga dañonge'cho tsu.

² Geraeñe Siria'su sundarondeccuja cca'tti cca'tti jacamba israe'su pushesu du'shuma indipa i afe'fa Naamán pushembe sema'suve. Tiseja Naamán pushema shondopa

³ tisema su: “¿Ma'caen'qque ña na'su Samariani japa tseni'su Chiga aya'fama afa'sunga catse'ta tsu tise na congomba paqque'suma ccushaya?”

⁴ Tsama pañamba Naamánjan ande na'sunga japa pa'cco tsa indi'cho pushesu su'choma conda.

⁵ Na'suja pañamba su: —Ñotssi tsu. Ña gi tevaen'jema tevaemba moeña Israel na'sunga. Tsonsi Naamánjan tevaen'jema isupa Israel andeni ja. Osha'choma tsu anga tise ccushaeña'chove afeye. Nane treinta mil corifin'di, faesu seis mil ñoa'me cori corifin'di, toya'caen diez ñotssia ondiccu'je na'su fiestanga ondiccuqque'suma'qque anga afeya'chove.

⁶ Nepipa tevaen'jema afe Israel na'sunga qquen su'choma: “Va tevaen'jema isupa camba qui in'jaña ñama shondo'su Naamánma ña quenga moe'chove tise na congomba paqque'suma que ccushaeñe.”

⁷ Tsa'ma Israel na'su Acabja tsa tevaen'jema camba tisu ñombi'yepa iyicca'ye'choma canjaeñe in'jamba tisu na'su ondiccu'jema indipa chi'tta. Chittapa su: —¿Ñanda ti gi Chiga, a'ima qquendyaeñe toya'caen fi'ttiye oshaye'ta cuintsu Siria'su na'su na congomba paqque'sui'ccu dañonge'choma ña ccushaeñe moeñe'da? Aqquia tsu ñai'ccu iyiccoye in'jamba qquen tsincon.

⁸ Omboe Chigama afa'su Eliseoja Israel na'su tsa'caen tevaen'jema camba tisu ondiccu'jema chi'tta'choma pañamba qquen aya'fama moe: “¿Jongoesie qui tisu ondiccu'jema chi'tta? Naamánma ñani moejan cuintsu poiyi'cco atesu'faye Na'su Chiga aya'fama afa'su toya Israelni can'jen'chove.”

⁹ Tsa'caen ttu'sesi Naamánjan pa'cco caro, cavayondeccui'ccu Eliseo tsaoni japa tsotefani ccutsu.

¹⁰ Tsa'ma Eliseoja tisu sombombe'yi tisema shondo'suma moe cuintsu qquen condaye: “Japa Jordán na'enga siete se onjomba qui giya'tsse ccushaya que na congomba paqque'suma.”

¹¹ Tsama pañamba Naamánjan ñoa'me iyicca'ye. Iyicca'yepa qquen supa ja: —Ñanda gi in'jan Chiga aya'fama afa'su sombopa ñanga catse ccutsupa Na'su tise Chigama iñajamba tivei'ccu na congomba jinchoma canjaensi ti gi ccushaya.

¹² Nane Damasco canqque'su Abana na'en toya'caen Farfar na'en tsu poiyi'cco Israel ande'su na'ema bove ñotssi. ¿Oshambi ti gi tseni japa onjomba ccushaye'ta? Tsa'caen supa ñoa'me iyicca'yepa tse'ttie ja.

¹³ Tsa'ma tisema shondosundeccuja tisenga catsepa su'fa: —Na'su, ¿tsa Chiga aya'fama afa'su ñoa'me aiye'pave manda'choecan'da ti qui tsa'caen tsombiye'can? Tsa'ma tiseja aye'pambi'ccoe mandapa ‘Onjomba qui ccushaya’ qquen su'chomanda tsu tsa'caen tsoncaña'cho.

¹⁴ Pañamba Naamán japa Jordán na'enga siete se cu'no Chiga aya'fama afa'su suqquia'caen. Tsa'caen siete se onjomba sombosi tayo ccushapa tise najan ñoa'me cunamba dusunga ttonoa'cantsse da.

¹⁵ Ccushapa toequi tisema shondosundeccui'ccu Eliseoma can'su ja'fa. Tiseni ji ccutsupa tsu Naamánjan su: —Ja'ño gi in'jan poi andeni faesu chiga jimbisi fae Na'su Israel Chiga tsu ñoa'me Chiga. Omboe tsu tsain'bio nasundeccu Israel aindeccuma manda'je'fa. Poiyi'cco egae tsincomba Na'su Chigama ñotsse paña'fambi. Judá andeni'qque tsain'bio nasundeccu, David omba'su dutssiyendeccu, manda'jesi fae pushesu'qque manda. Majan tsendeccu'su Na'suma pañamba ñotsse tson'fa. Tsa'ma faesundeccu egae tsincomba Na'su Chigama ñotsse paña'fambi.