2 Reyes 22 - Cofán: Chiga Tevaen'jen

Josías Judáma manda'je'cho

¹ Josíasja ocho canqque'fave an'biamba na'suve dapa mandaye ashaen. Jerusaléni can'jemba treinta y un canqque'fave manda'je. Tise mama inise tsu Jedida. Tsambe yaya tsu Adaía, Boscat canqque'su a'i.

² Josíasja tise tayopi'su antian David'ye mandaqquia'caen egae tsincombe'yi ñotsse manda'jesi Na'su Chiga tise ñotsse tson'choma atte.

Chiga Tevaen'jema atte'cho

³ Na'su Josías diez y ocho canqque'fave manda'je'ni tisema tevaen'su, Safánma, Chiga ettinga jaye manda. Safán yayaja Azalía, tise yayaccasheyeja Mesulam. Mandapa qquen su:

⁴ —Chigama afa'su na'su Hilcíasnga japa condaja cuintsu Chiga Ettinga ipa afe'cho corifin'dima ñoñañe, tsa sombo'ttima coirasundeccu aindeccu'ye isu'cho corifin'dima.

⁵ Ñoñamba tsa corifin'dima Na'su Chiga ettima coirasundeccunga afeya'cho cuintsu tsendeccuja ñoñamba semasundeccunga afeye etti daño'chove ñoñañe.

⁸ Tsa'caen ñoña'jen'fasi Chigama afa'su na'su Hilcíasja na'suma tevaen'su Safánma conda: —¡Na'su Chiga ettima ñoñamba gi Chiga Aya'fa Tevaen'jema atte! Tsa'caen condapa Chiga Aya'fama afesi Safánjan tsama camba afa.

¹⁰ Tsomba Safánjan na'su Josíasma Hilcías atte'cho tevaen'jene condapa tsa Chiga Tevaen'jen su'choma na'sunga camba afa.

¹¹ Chiga Tevaen'jen manda'choma pañamba na'suja tise ondiccu'jema chitta, ñombi'ye'choma canjaeñe.

¹² Chigama afa'su na'su, Hilcías, Safán dutssi'ye, Ahicam, Micaías dutssi'ye, Acbor, na'suma tevaen'su, Safán, toya'caen na'suma shondo'su, Asaías, tseni can'jensi na'su Josíasja tise'pama manda:

¹³ —Japa ñane Na'su Chigama iñajamba poi Judá'su aindeccune'qque iñajan'faja. Nane va atte'cho tevaen'jema camba gi in'jan Na'su Chiga ingima ñoa'me iyicca'ye'choma. Ingima tayopisundeccu va manda'choma pañambi'fa. Pañambipa va manda'cho tevaen'jema mandaqquia'caen tson'fambi.

¹⁴ Tsonsi Hilcías, Ahicam, Acbor, Safán, Asaías'qque Jerusaléni'su segundo tsa'o bo'fa'choni japa Chigama afa'su pushesu Hulda tsa'onga ja'fa. Hulda tsa'ndu tsu Salum, tsa Ticva dutssi'ye. Ticva yaya tsu Chiga etti'su sarupama coira'su, Harhas. Tseni japa Huldama condasesi

¹⁵ tsu su: —Qquen tsu Na'su, Israel Chigaja que'i iñajan'choma pañamba su: ‘Que'ima iñajañe manda'sunga japa

¹⁶ ña Na'su gi qquen su'choma conda: Va aindeccuma, va canqquema'qque gi ñoa'me vanaeña. Nane osha'cho tsa tevaen'jenga Judá na'su camba afaqquia'caen gi vandeccunga tsoña.

¹⁷ Ñama catipa faesu chigandeccunga ñome'bama oque oraemba ñama iyicca'yean. Tsa'caen tivei'ccu ñoña'cho chigandeccuve ñoñasi gi si'nge anchandasi fi'ttiye oshambiqquia'caen anttembe'yi tise'panga iyicca'yeya.

¹⁸ Tsa'cansi Na'suma iñajañe que'ima manda'su Judá na'sunga condaja tise camba afa'cho tevaen'jene Na'su, Israel Chiga qquen su'choma: Queja que atte'cho tevaen'jema camba ñotsse pañamba

¹⁹ injama'choni tsama in'jamba ñombi'ye'sui'ccu ñama iñajansi gi quema paña. Nane ña va aindeccu, va canqquema'qque chi'gapa ñoa'me vanaemba sefaeña qquen su'choma pañamba ñombi'yepa tsa'caen canjaeñe que ondiccu'jema chittapa ina'jensi gi quema paña. Tsa'cansi ña Na'su gi quema paña.

²⁰ Quema pañamba gi antte cuintsu toya va canqquenga tsa'caen tsombisi queja opatsse can'jemba que tayopisundeqquia'caen paye. Nane queja va ega daño'choma cañambi.’ Tsama pañamba mandasi iñajansundeccuja toequi na'sunga ja'fa Na'su Chiga su'choma condaye.