2 Reyes 2 - Cofán: Chiga Tevaen'jen

Elías Chiga sefacconi ja'cho

¹ Na'su Chiga Elíasma fingian fentsindaccui'ccu tisu sefacconi angaya'cho a'ta nepisi tsu Elías Eliseoi'ccu fae'ngae Gilgalne sombo'fa.

⁶ Omboe Elíasja Eliseoma su: —Va'tti can'jenjan. Tayo tsu Na'su Chiga ñama manda Jordán naeni jaye. Tsa'ma Eliseoja su: —Na'su Chiga caña'jen'ni toya'caen que caña'jen'ni gi ñoa'me quema tisuveyi moeña'bi. Tsa'caen supa fae'ngae ja'fa.

⁷ Ja'fasi cincuenta Chiga aya'fama afasundeccu jipa biane ron'da ccutsu'fa tise'pama isevetsse. Elíasja Eliseoi'ccu Jordán na'en otafani japa ron'da ccutsu'fa.

⁸ Tsomba Elíasja tise oppoen'cho sarupama findipa tsai'ccu na'en'su tsa'ccuma ma'ppi. Ma'ppisi tsu na'enjan attufapa san'ame da cuintsu tsa dos a'i san'angae jonifani tsui ise'faye.

⁹ Tayo isepa tsu Elíasja Eliseoma su: —Toya ñama que'ye joqquitssiambi'te ñanga condaja jongoesuve ña quenga tsoña'chove. Tsonsi Eliseoja su: —In'jan gi que oshaqquia'caen dos se ñanga afeye ña quia'caen oshapa ti'tsse oshaya'chove. Tsonsi Elíasja su:

¹⁰ —Re'riccombi tsu que iñajan'cho. Tsa'ma ñama que'ye joqquitssiansi atte'ta qui que iñajan'chove an'biaña. Tsambi'ta an'biaña'bi.

¹¹ Tsa'caen condase nanimba toya condasé jayi'fa. Tse'faei'ccuyi tise'pa enttinge'ye si'nge caro toya'caen si'nge cavayondeccu attiamba Elíasma sefacconi anga'fa fingian fentsindaccui'ccu.

¹² Tsama attepa Eliseoja quian'me su: “¡Ña yaya, Ña yaya'can qui! ¡Que qui coira'su sundaro caro, coira'su cavayo sundarondeqquia'can Israelma coira'su!” Tsama attepa ccase Elíasma attembi. Tsomba tse'i Eliseoja tisu ñombi'ye'choma canjaeñe in'jamba tisu ondiccu'jema indipa chitta.

Eliseo Elías sema'jen'chonga ca'ni

¹³ Chittapa omboe Eleseoja, Elías tisu oppoen'cho sarupama cati'choma attepa isu. Isupa toequi Jordán naini japa otafani ccutsu.

¹⁴ Tseni ccutsupa tsa sarupai'ccu na'ema ma'ppipa su: “Na'su Chiga, ¿Elíasma oshaenqquia'caen ti qui ñama'qque oshaen'jen?” Tse'faei'ccuyi tsa'ccuja attufapa san'ame da. Tsa'caen dasi Eliseoja tsa'ye toequi ise.

¹⁵ Tsonsi Jericó'su Chiga aya'fama afasundeccu tseni isevetsse ccutsusundeccuja tsama attepa su'fa: “Ñoa'me tsu Chigaja Elíasma oshaenqquia'caen ja'ñojan Eliseoma tsa'caen oshaen'jen.” Tsa'caen supa tisenga catsepa andenga puntssan'fa.