2 Reyes 17 - Cofán: Chiga Tevaen'jen

Asiria israendeccuma anga'cho

¹ Acaz dose canqque'fave Judáma manda'je'ni tsu Ela dutssi'ye Oseasja Israel na'suve dapa mandaye ashaen. Samariani can'jemba nueve canqque'fave tsu israendeccuma manda.

² Oseasja tayo'su Israel nasundeccu egae tsinconqquia'caeñi egae tsincombi'ma Na'su Chigaja tise tson'choma attepa toya ega qquen tsu in'jan.

³ Omboe Salmanaser, Asiria'su na'su, Israeli'ccu geraemba Oseasma patsu. Tsa'caen Israel Asiriama fuitesi Oseas gobierno'qque poi canqque'fa Salmanasernga afepoen'jen.

⁴ Tsa'ma Oseasja Asiriama catiye in'jamba canqque'fanga tise afepoen'jen'choma moembi. Tsa'caen moembi'pa a'tutsseyi tisema afasundeccuma moe Egipto'su na'su Songa cuintsu tisema fuiteya'chove afa'faye. Tsama pañamba Salmanaserja tise sundarondeccuma moe cuintsu Oseasma indipa picco'faye. Picco'je'cho ettinga piccopa

⁵ poi sundarondeccui'ccu Samariani japa tres canqque'fa gerave tson.

⁶ Osefa'poe Oseas nueve canqque'fa Israel na'suve dapa can'jensi Asiria'su na'su Samariama patsu. Patsupa poi a'ima indipa Asiriani anga. Majama Halahni angapa cutsian cuintsu tseni can'jeñe. Majama Gozán naini angapa Haborni cutsian cuintsu tseni can'jeñe. Toya'caen majama cca'tti'su medondeccu canqqueni anga.

⁷ Nane israendeccuja Na'su tise'pa Chigama egae tsincomba faesu chigandeccuma iñajan'fa. Tsa'cansi tsu Chigaja antte cuintsu ccase vana'faye. Nane Egipto'su na'su faraón tise'pama vanae'jensi Chigaja tise'pama itsapa Egipto'ye somboen.

⁸ Somboemba faesu aindeccuma tteyamaña cuintsu israendeccu tise'pa andeni can'jeñe. Tsa'ma tsa faesu aindeccu mandaqquia'caeñi tsu Israel nasundeccu'qque egae tsincomba manda'fa. Tsa'cansi tsu Na'suja ccase tise'pama vanae.

⁹ Toya'caen tsu israendeccuja Na'su Chiga in'jambi'choa've a'tutsse egae tsincon'fa. Nane poi canqqueni, majan aqquia se'fatsse caña'jen'cho tsa'o jini canqquian'jen'tti toya'caen sundaro can'jen'cho ta'etssia canqqueni'qque tsu faesu chigama iñajan'jen'ttive ñoña'fa.

¹⁰ Toya'caen tsu poi se'fatssia ccotta'cconga, poi quini'jin tsosiccu'su tumbianccunga iñajaña'cho patuma ccutsian'fa. Aserama ñoña'cho chigama'qque tsu tseni ccutsian'fa.

¹¹ Nane Na'su Chiga joqquitssian'cho a'i iñajanqquia'caeñi tsu israendeccu'qque poi se'fatssia iñajan'jen'ttinga ñome'bama oque oraen'fa. Tsa'caen egae tsincon'fasi tsu Na'su Chigaja tise'pama iyicca'ye.

¹² Na'su Chiga “¡Que'ija tsa'caen tson'fajama!” qquen su'ni'qque toya tsu ñoña'cho chigandeccuma iñajan'jen'fa.

¹³ Tsa'caen tson'jen'fasi Na'su Chiga poiyi'cco tise aya'fama afasundeccu toya'caen tise canjaen'choma attesundeccuma in'jaensi tsu israendeccu toya'caen judándeccuma manda'fa cuintsu tise'pa egae canse'choma cati'faye. Nane Chigaja Israel tayopi'su antiandeccunga tise manda'cho toya'caen tise atesian'choma'qque tayo conda tisema shondo'su Chiga aya'fama afasundeccui'ccu.

¹⁴ Tsa'ma aindeccuja paña'fambi. Nane tise'pa tayopisundeqquia'caeñi tsosinambipa Na'su tise'pa Chigave in'jan'fambi.

¹⁵ Na'su Chiga tise'pa tayopi'su ccasheyendeccui'ccu fae'ngae injancco'fa'choma catipa tise manda'choma'qque chi'ga'fa. Tsa'caen “¡Tson'fajama!” qquen Chiga su'ni'qque pañambiqquia'caen tsincon'fa. Nane “¡Faesu pporotsse can'jen'cho aindeqquia'caen tson'fajama!” qquen Chiga se'pi'ni'qque tsendeccunga ma'depa barembi'choa ñoña'cho chigandeccuma iñajan'fa. Tsa'caen iñajamba tsu tise'pa'qque barembi'choa've da'fa.

¹⁶ Osha'chove Na'su tise'pa Chiga manda'choma catipa cu'a yoshavama tssutssiamba dos ñoña'cho vaura du'shuve ñoña'fa tsama iñajañe tise'pa chigave. Toya'caen tsu Asera quini'ccoma ccutsian'fa tsama'qque iñajañe. Osha'cho sefacconi jincho'choma chiga qquen in'jamba Baalma'qque iñajan'fa.

¹⁷ Tise'pa dushundeccuma'qque chigandeccunga afeye oque fi'tti'fa. Davuma atesu'fa. Toya'caen tise'pa coragandeccuja seje'ccoi'ccu fi'tti'fa. Nane ma'caen osha'ta Na'su Chiga in'jambi'chove tsomba tsai'ccu Na'suma iyicca'yeañe in'jamba tta'tta'fa.

¹⁸ Osefa'poe Na'su Chigaja ñoa'me iyicca'yepa Israelma tisu'ye joqquitssian. Judáyi tsu ccusha.

¹⁹ Tsa'ma Judá'qque Na'su tise'pa Chiga manda'choma pañambi. Nane Israel tsoñe atesuqquia'caen tsu Judá'qque tson.

²⁰ Tsa'caen tson'fasi tsu Na'su Chigaja poi israendeccuma cati. Catipa tise'pama vanaemba afe patsusundeccunga. Nane tsa'caen tsu tisu'ye joqquitssian.

²¹ O'tie David manda'je'cho'suma tsu Israel aindeccuma enttingeve itsa. Tsa'caen itsasi tsu israendeccuja Nabat dutssi'ye Jeroboamma na'suve ca'nia'fa. Tsa Jeroboam tsu israendeccuma angacan cuintsu Na'su Chigama catipa ñoa'me egae tsincon'faye.

²² Nane israendeccuja Jeroboam tson'choma chi'gambi'pa tsa'caen canse'fa.

²³ Osefa'poe Na'suja tayo tisema shondo'su Chiga aya'fama afasundeccuma afaemba tsa'caen israendeccunga condapa tisu'ye tsendeccuma joqquitssian. Tsa'cansi tsu israendeccuja tise'pa ande'ye joqquitssipa Asiria andeni angayepa tseni canse'fa. Toya tsu ja'ñopan tseni canse'fa.

Cca'indeccuma Samariani ca'nian

²⁴ Israendeccuma Asiriani angapa Asiria'su na'suja faesu aindeccuma ipa ca'nia Samaria'su canqquenga. Nane babiloniandeccu, cutandeccu, avandeccu, hamateondeccu toya'caen sefarvaindeccuma'qque ipa ca'nia cuintsu Samaria andema an'biamba tseni canse'faye.

²⁵ Tsa'ma tsesu aindeccu Na'su Chigama atesu'fambisi Na'suja ttesindeccuma moe. Moesi jipa majan aindeccuma fi'tti'fa.

²⁶ Tsa'caen fi'tti'jesi tsu Asiria'su na'sunga conda: “Que Samariani angapa ca'nia'chondeccuja atesu'fambi tsa ande'su chigama ma'caen iñajañe. Tsa'cansi tise ttesindeccuma moesi tsu majan aindeccuma fi'tti'je.”

²⁷ Tsama pañamba Asiria'su na'suja manda: “Fae'cco indiye'cho israe'su Chigama afa'suma moejan Samariani cuintsu tseni can'jemba aindeccuma tsa ande'su chigane atesiañe.”

²⁸ Tsonsi fae'cco Samaria'ye joqquitssi'cho Chigama afa'suma moesi japa Betelni can'jen. Tseni can'jemba aindeccuma atesian ma'caen Na'su Chigama iñajaña'chove.

²⁹ Tsa'ma poi cca'tti'su aindeccu tseni can'jemba tsu tise'pa canqqueni'su iñajan'jen'ttinga tise'pa ande'su chigandeccuma ccutsian'fa. Nane Samaria aindeccu ñoña'cho se'fatssia iñajan'je'ttinga tsa'caen ccutsian'fa.

³³ Tsa'camba aindeccuja Na'su Chigama iñajan'an'qque toya tsu tise'pa chigandeccuma'qque iñajan'fa. Nane tayopi tseni can'jen'cho aindeccu in'jañe atesuqquia'caen tsu toya tson'jen'fa.