1 Samuel 8 - Cofán: Chiga Tevaen'jen

Israendeccu ande na'suve iñajan'fa

¹ Tsomba tse'i Samuel coenza ccashe'yeve dapa tise dutssiyendeccuma ca'nia israe'su ñoquiansundeccuve.

² Nane tise aishe dutssi'ye tsu Joel. Tse'tti'su tsu Abías. Tsendeccu tsu Beersebani can'jemba israendeccuma ñoquian'jen'fa.

³ Tsa'ma tsendeccuja tise yaya Samuelcan'fambi. Nane ñotsse ñoquiambi'pa panshaen corifin'dive in'jamba egae tsincon'fa. Iyiccosundeccu jipa majan tise'panga ti'tsse corifin'dima afe'ninda tsu tsane ñotsse afa'fa.

⁴ Tsa'caen tson'jen'fasi poi israe'su coenzandeccu bopa Ramáni jipa Samuelnga

⁵ su'fa: “Queja ñoa'me coenza ccashe'yeve dasi que dutssiyendeccu ñoquiansundeccuve dapa ja'ñojan quia'caen tson'jen'fambi. Tsa'cansi majama ttu'sepa ca'niajan ñoa'me ande na'suve. Nane tsa'caen tsu faesu ande'su aindeccuja atesu'fa.”

⁶ Tsa'caen ande na'suve iñajan'fasi Samuelja in'jambipa ñombi'ye. Ñombi'yepa Chigama iñajan.

⁷ Tsa'ma Na'su Chigaja Samuel iñajan'choma pañamba su: “Ma'caen tise'pa in'jan'ninda tsa'caen tsonjan. Nane quema chi'gambipa ñoa'me ñama tsu chi'ga'fa. In'jan'fambi tsu ña tise'pama manda'jeye.

⁸ Egipto'ye ña tise'pama somboeinte chi'gapa ja'ñoa'ngae tsu ñama chi'gapa faesu chigandeccuve ttatta'je'fa. Nane ñanga tsonqquia'caen tsu ja'ño quenga tson'jen'fa.

⁹ Tsa'cansi tise'pa in'janqquia'caen tsonjan. Tsa'ma toyi'te que in'jambi'choama tise'panga condapa, ande na'suve dapa ma'caen mandaya'choma'qque condaja.”

¹⁰ Tsonsi Samuelja Na'su Chiga su'choma ande na'suve iñajansundeccunga conda

¹¹ qquen supa: —Qquen tsu ande na'suja que'ima mandaya: Sundarondeccuve tsu que dutssiyendeccuma ttu'seya cuintsu majandeccu cavayo'su sundaro, majandeccuja cavayo caro'su sundarove da'faye. Toya'caen tsu majandeccumajan tisema coira'su sundarondeccuve tsoña.

¹² Toya'caen tsu majama ca'niaña sundaro capitánme, majama sargentove. Majan que'i'suma tsu mandaya tise andema semañe, toya'caen tise anqque'suma taiye. Faesundeccuma tsu mandaya geraenqque'su matichi, dansan'cho toya'caen gera'su cavayo carove cuintsu ñoña'faye.

¹³ Toya'caen tsu que'i onquengendeccuma ttu'seya tise'be shoccoen'su, panme matssan'su toya'caen ñome'bama ñoña'suve ca'niañe.

¹⁴ Que'imbe bove ñotssia nasipa, tsajaccu toya'caen olivoccuma'qque tsu itsaya tisema shondosundeccunga attufaeñe.

¹⁵ Nane que'i trigo toya'caen olivoma tai'je'cho'suma tsu fae chongayi'cho'ccove itsaya tise sundaro nasundeccunga toya'caen tisema shondosundeccunga'qque afeye.

¹⁶ Toya'caen que'imbe sema'su tsandiendeccu, sema'su pushesundeccuma'qque, itsapa tsu que'imbe bove ñotssia sema'su vaura, que'i boroma'qque tise'be semasundeccuve ca'niañe.

¹⁷ Nane que'i oveja'suma fae chongayi'cho'ccove tisumbe isupa tsu que'iveyi semoeña.

¹⁸ Tsequi a'ta qui que'ija i'na'faya que'i in'jamba iñajan'cho ande na'su tsa'caen tsonsi. Nane tsequi a'ta Na'su Chiga que'ima pañambisi qui i'na'faya.

¹⁹ Tsa'ma aindeccuja Samuelma pañañe chi'gapa su'fa: —Cuin'qque tsa'caen daye. Tisupa gi ande na'suve in'jan'fa

²⁰ ingi'qque faesu ande'su aindeqquia'caen na'supa canseye. In'jan'fa gi cuintsu tise ingima mandapa ingi iyicco'je'choma ñoquian'jeñe toya'caen ingima angacamba ingi'su sundarondeccuma'qque angapa geraen'jeñe.

²¹ Tsonsi Samuelja aindeccu su'choma pañamba pa'ccoma conda Na'su Chiganga.

²² Condasi Na'su Chigaja su: —Tise'pa in'janqquia'caen ande na'suve ttu'sepa ca'niajan. Tsonsi Samuelja aindeccuma manda cuintsu poiyi'cco toequi tise'pa canqqueni ja'faye.