1 Samuel 3 - Cofán: Chiga Tevaen'jen

Na'su Chiga Samuelma ttu'se'cho

¹ Du'shu Samuelja tsa'caen Elíma ñotsse pañamba Na'su Chigama shondó can'jen. Tsaite Samuel can'jeinte Na'su Chigaja a'inga zutsse afa'jembi. Nane zutsse attiambi a'ima in'jaeñe.

^2-3 Tsa'cansi fae cose Elí tayo ccuipa ana'jen. Nane Elíja tayo coenzapa atteye oshambi'tsse dasi Samuelja tsa Na'su Chiga a'i'ccu injancco'fa'cho cafon ccutsu'cho carpani can'jen. Tsa'caen can'jemba toya Chigai'ccu cachuicco'je'tti'su tuño chanjun'jen'ni anañe ccuisi

⁴ Na'su Chigaja Samuelma ttu'sepa su: —¡Samuel! Ttu'se'choma pañamba Samuelja su: —¡Va'tti gi can'jen!

⁵ Tsa'caen supa jangipa Elíni buttopa japa su: —Tayo gi ji. ¿Jongoesie qui ñama ttuse'je? Tsa'ma Elíja su: —Me'in, ñajan quema ttu'se'jembi. Toequi japa ccuija. Tsonsi Samuelja japa ccase ccui.

⁶ Ccuisi ccase Na'su Chigaja tisema ttu'se: —¡Samuel! Tsonsi ccase Samuelja jangipa Elínga catsepa su: —Tayo gi ji. ¿Jongoesie qui ñama ttuse'je? Tsa'ma ccase Elíja su: —Me'in, jaricho, ñajan quema ttu'se'jembi. Toequi japa ccuija.

⁷ Nane toya tsu Samuelja atesumbi Na'su Chiga tsa'caen a'i'ccu condaseqque'suve minguite'qque tsa'caen pañamba cansembi'pa.

⁸ Tsa'ma ccase tres se Na'su Chiga tisema tsa'caen su'jesi ccase jangipa Elínga catsepa su: —Tayo gi ji. ¿Jongoesie qui ñama ttuse'je? Tsa'caen susi Elíja in'jan Na'su Chiga tsa du'shuma ttuse'je'chove.

⁹ In'jamba Samuelma su: —Japa ccuija. Ccase Na'su Chiga quema ttu'se'ninda qquen suja: ‘Afaja. Ña quema shondo'su gi quema paña'jen.’ Tsonsi Samuel japa tise ana'jen'chonga ccui.

¹⁰ Ccuisi ccase Na'su Chigaja tayoa'caen ji ccutsupa ttu'se: —¡Samuel! ¡Samuel! Ttu'sesi Samuelja pañamba su: —Afaja. Ña quema shondo'su gi quema paña'jen.

¹¹ Tsonsi Na'su Chigaja su: —¡Ñotsse pañajan! Ña Israel andeni tsoña'choma pañamba tsu aindeccuja bo'yo'e dapa can'boen ccutsu'faya.

^12-14 Nane tayo gi Elínga conda tise'pa injama'choma somboeña'chove. Tise dutssiyendeccu ñama afasepa egae tsinconsi tsendeccuma tansiambipa tsu tise'qque shacapa. Tsa'cansi gi tsequi a'ta pa'cco ña vanaeña'chove tise'panga suqquia'caen tsoña. Nane anttembe'yi tisema vanaesi ni Chiganga afe'cho ni jongoesuma fi'ttipa oque oraen'jen'cho'qque tise'pa egae tsincon'choma joqquitssiaña'bi. Tsangae tsu tsa'caen jinchoya.

¹⁵ Na'su Chiga tsa'caen condasesi Samuelja ccuí a'ta. A'tasi jangipa Na'su Chiga a'i'ccu cachuicco'je'tti'su sombo'tti piccofin'dima fetta. Tiseja dyojopa Chiga susi paña'choma Elínga condambi.

¹⁶ Tsa'ma Elí tisema ttu'sepa su: —¡Jaricho Samuel! Ttu'sesi Samuelja su: —Va'tti gi can'jen.

¹⁷ Tsonsi Elíja qquen iñajampaña: —¿Jongoesu qquen tsu Na'su Chigaja quenga conda? Chigáne a'tiembe'yi pa'tssima ñanga condaja. ¡Nane jongoesu qquen tise su'choma a'tiemba ñanga condambi'ninda cuintsu Chigaja quenga'qque tise suqquia'caen tsomba ti'tsse quema vanaejan!

¹⁸ Tsa'caen susi Samuelja pa'tssi Chiga su'choma tisenga conda. Condasesi Elíja su: —¡Chiga tsu Na'su! ¡Ma'caen tise in'janqquia'caen tson'jenjan!

¹⁹ Samuel coenjinsi Na'su Chigaja tisema fuite'je. Toya'caen pa'cco tise su'choma tson.

²⁰ Tsa'caen tsonsi poi israendeccu, nane Dan canqque'ye Beerseba andeni canjensundeccu'qque in'jan'fa Chiga ñoa'me Samuelma ttu'sepa tisema afa'suve tson'choma.

²¹ Toya'caen Na'su Chigaja Siloni jipa attian'ñaccapa tise in'jan'choma Samuelnga conda'je.