1 Samuel 21 - Cofán: Chiga Tevaen'jen

David Saúl'ye ccuya'cho

¹ Chigai'ccu cachuicco'je'tti Nobni ccutsusi Davidja Saúlne ccuyapa Chigama afa'su Ahimelecma can'su ja. Nepisi Ahimelecja dyoe'sui'ccu sombopa su: —Queja sundaro na'supa ¿jongoesie qui tisuyi ji? ¿Micomba tsu faesundeccu quei'ccu jacan'fambi?

² Tsonsi Davidja su: —Na'su tsu ñama manda tise in'jan'chove tsoñe. Toya'caen tsu se'pi faesu jongoesune ñama moe'chove atesusa'ne; ni ñama tise mandasi tsoña'choma atesusa'ne. Ñama mandasi fae'ngae jacansundeccu tsu ña condase'je'ttinga ñama cachui'faya.

³ ¿Anqque'suta ti vani jin? Nane qquipoe'su gi cinco panme tsambi'ta mañi'ccoe an'bian'da ñanga afeja.

⁴ Tsa'ma Chigama afa'suja Davidma su: —Aqquia injanga anqque'su panjan vani jimbi. Nane Chiganga afe'cho pañi tsu jin. Tsa'ma que aindeccu pushesundeccui'ccu can'jembian'da gi tsa'suma quenga afeya.

⁵ Tsonsi Davidja ñoa'metsse su: —Nane majan sundarove ñai'ccu jacan'da tsu pushesui'ccu can'jembi. Tsaveqque'su tsu. Tsa'ma ja'ño ti'tsse a'tutsse jacamba gi tsa'caen can'jen'fambi.

⁶ Tsa'caen susi Chigama afa'suja tsa Na'su Chiganga afe'cho panma Davidnga afe. Nane tsa panjan, tsequi a'ta cuname matssan'cho panma Na'su Chiga cachuicco'je'ttinga ppiñaña'ba somboen'cho panma tsu afe.