1 Samuel 16 - Cofán: Chiga Tevaen'jen

Davidma feti'cho na'suve

¹ Tsonsi Na'su Chigaja Samuelma su: —¿Mi'nge'e qui Saúlne ñombi'ye? Tsangaeyi gi chi'ga tise ande na'suve ti'tsse can'jeñe. Tsa'cansi queja que aseitema angaqque'su can'chonga aseitema on'boemba jaja Belén canqqueni. Tseni nepipa Isaí tsaoni jaja. Nane tayo gi in'jamba ttu'se fa'e tise dutssiyendeccu'su cuintsu Israel na'suve daye.

² Pañamba Samuelja su: —¿Ma'caen gi tsa'caen tsoña? Nane Saúl tsama paña'da tsu ñama fi'ttiya. Tsonsi Na'su Chigaja su: —Vaura pushe du'shuma angapa suja: ‘Ña gi ji quei'ccu Na'su Chiganga vama fi'ttipa afeye.’

³ Toya'caen Isaíma ttu'seja cuintsu quei'ccu Chiganga afe'choma fi'ttiye. Tise jisi gi quenga condaya ma'caen tsoña'choma. Nane ña quenga canjaen'choma qui fetiya na'suve.

⁴ Tsonsi Samuelja Na'su Chiga suqquia'caen tson. Beléni japa nepisi tsa canqque'su coenzandeccu ttun'dundu'je dyopa tisenga jipa su'fa: —¿Avujatsse ti qui ji?

⁵ Tsonsi Samuelja su: —Avujatsse gi ji. Na'su Chiganga afeye fi'tti'choma afeye gi ji. Que'i poiyi'cco qui tisupama Chiga in'janqquia'caen ñoñaña'cho. Ñoñamba ñai'ccu ji'faja Chiganga afe'jeni. Toya'caen tsu Samuelja Isaí tise dutssiyendeccuma'qque ttu'sepa ñoña cuintsu Chiganga tise afe'jeni ji'faye.

⁶ Tise'pa nepi'fasi Samuelja Eliabma attepa qquen asi'ttaen: “Ñoa'me va a'i tsu Na'su Chiga in'jan'cho ande na'suve.”

⁷ Tsa'ma Na'su Chigaja tisema su: “Ni tise camba'ju ni tise quin'suma canjama. Nane tayo gi tisema joqquitssian, a'i canqquiacambi tsu ña a'ima caña'jen'cho. Nane a'ija camba'juma caña'jen. Tsa'ma ñajan a'i injama'cho'su in'jan'choma caña'jen.”

⁸ Tsonsi Isaí Abinadabma ttu'se cuintsu Samuelnga ccutsuye. Tsa'ma Samuelja tisema attepa su: —Me'in, va'qque tsu Na'su joqquitssian'cho.

⁹ Omboe tsu Isaíja Samama ttu'sepa ccutsian. Tsa'ma Samuelja tisema attepa su: —Me'in, va'qque tsu joqquitssian'cho.

¹⁰ Tsa'caen Isaíja siete tise dushundeccuma Samuelnga ccutsian'ma Samuelja poiyi'ccoma su Na'su Chiga joqquitssian'cho tsu.

¹¹ Tsomba Samuelja Isaíma iñajampaña: —¿Faesu du'shuveta ti qui an'biambi? Tsonsi tsu su: —Toya tsu fae'cco ñoa'me chu'a can'jen. Tiseja ovejama coira'su tsu. Tsonsi Samuelja su: —Mandaja cuintsu i'nga'faye. Nane tise toya jimbi'te ashaeñe oshambi gi.

¹² Tsa'caen susi Isaí mandasi i'fasi chu'aja cujujutssia du'shu ji. Ñoa'me me'detssipa tise camba'ju'qque ñotssia. Tsonsi Na'su Chigaja Samuelnga su: —Va tsu ña in'jan'cho. Jangipa tisema fetija ande na'suve.

¹³ Tse'faei'ccuyi Samuelja aseite an'bianqque'su can'choma isupa chu'ama feti ande na'suve poiyi'cco tise quindyandandeccu camboen'jen'fa'ni. Tsa chu'aja David tsu. Tisema na'suve fetisi tsu Na'su Chiga Qquendya'pa tisema in'jaemba quiñaen. Omboe Samuelja Ramáni ja.