1 Samuel 15 - Cofán: Chiga Tevaen'jen

Na'su Chiga Saúlma chi'ga'cho

¹ Tsomba Samuel Saúlnga su: —Na'su Chiga ñama mandasi gi quema ca'nia israendeccumbe na'suve. Tsa'cansi ñotsse pañajan

² Na'su Osha'choma Oshacho'cho Chiga quenga qquen su'choma: ‘Tayoe israendeccu Egiptone sombopa va andeni ji'fasi tsu amalecitandeccuja se'pipa tise'pa ji'je'cho tsaiquima picco'fa.

³ Tsa'cansi japa amalecitandeccui'ccu iyiccopa nanitsse tise'pama fi'tti'faja. Nane pa'cco tise'pambema tsu tsangae catiya'cho. Tsandiendeccu, pushesundeccu, dushundeccu, aipanondeccuma'qque fitti'ttipa toya'caen tise'pa vaura, oveja, cameyo, boroma'qque tsu pa'tssima metsse fitti'tti sefaeña'cho.’

⁷ Tsa'caen mandasi Saúlja Havila andeni ashaemba Shur andepi (tsaja Egipto pporotsse) amalecitandeccuma fitti'ttiye ashaen.

⁸ Nane matichi'ccu poi amalecitandeccuma fittitti'ma amalecita'su na'su Agagmajan indipa fi'ttimbeyi an'bian.

⁹ Toya'caen Saúlja, tise'pa sundarondeccui'ccu bove ñotssia oveja, vaura, yayapatssia vaura du'shu, oveja du'shuma'qque —nane osha'cho ñotssiama fi'ttimbeyi antte'fa. Tsa'ma osha'cho barembi'choamajan metsse fittitti'fa.

¹⁰ Tsa'caen tson'fasi Na'su Chigaja Samuelnga su:

¹¹ —Ñombi'ye gi Saúlma na'suve ca'niamba. Nane tiseja ñama catipa ña manda'choma pañambisi gi ñombi'ye. Samuelja Na'su Chiga su'choma pañamba injama'choni zuccopa pa'cco cose Na'su Chigama iñajan'jen.

¹² Iñaján a'tapa sinte jangipa Saúlma cachuiye ja. Japa paña Saúl Carmelni ja'chove. Nane Carmelni japa tsu patuma jangian ccutsian a'i tise patsu'choma aqque'pa'fasa'ne. Tsa'caen ccutsiamba sombopa shoquendí Gilgalni ja.

¹³ Gilgalni can'jen'choma pañamba Samuel tseni jasi Saúlja tisema su: —Na'su Chiga cuintsu quema ñotsse tsonjan. Tayo gi tise mandaqquia'caen tson.

¹⁴ Tsa'ma Samuelja Saúlma su: —Tsa'caen tson'ninda ¿jongoesuma gi vaura fundojeqquia'caen toya'caen oveja afa'jeqquia'caenda paña?

¹⁵ Tsonsi Saúlja su: —Sundarondeccuja osha'cho amalecitandeccumbe jincho'choma metsse fitti'tti catipa tsu majan bove ñotssia vaura, bove ñotssia ovejama'qque anttepa vani i'fa Na'su que Chiganga afeye.

¹⁶ Tse'faei'ccuyi Samuelja su: —¡Ziyaja! Na'su Chiga ja'ño cose ñanga condase'choma quenga condaye. Ziyapa Saúlja su: —Afaja.

¹⁷ Tsonsi Samuelja su: —Tayoe tisuja joccapitssiambi qquen injan'jen'cho qui ja'ño poi israendeccuma manda'je. Nane Na'su Chiga quema ttu'sesi qui Israel na'suve da.

¹⁸ Toya'caen amalecitandeccu egae tsinconsi tsu Na'su Chigaja quema manda japa tise'pama fitti'tti sefaeñe. Gerave tsomba tise'pama sefaeña'gae fitti'ttiye mandasi

¹⁹ ¿micomba qui Na'suma pañambi? ¿Jongoesie qui Na'su Chiga tsa'caen in'jambi'choama amalecitandeccu an'bian'choma tisumbe isu?

²⁰ Pañamba Saúlja su: —Tsa'ma ñoa'me gi Na'suma pañamba tsa'caen tson. Nane amalecitandeccuma fitti'tti sefaemba gi tise'pa na'su Agagma vani i.

²¹ Sundarondeccuja amalecitandeccu an'bian'cho'su bove ñotssia vaura toya'caen ovejama itsapa vani Gilgalni i'fa oquepa Na'su que Chiganga afeye.

²² Tsonsi Samuelja su: ¿Na'su Chigata ti avujaya oque oraemba afe'ninda? Nane ti'tsse avujatssi tsu tise manda'choma pañasi. Ñotsse pañañe tsu afe'choma bove ñotssi.

²³ Chiga su'choma chi'ga'cho tsu cocoyama iñajanqquia'caen tson'cho. Tisuyi in'jan'cho tsu ñoña'cho chigama in'janqquia'caen tson'cho. Nane que tise su'choma chi'gasi tsu quema ande na'suve an'biañe chi'ga.