1 Samuel 1 - Cofán: Chiga Tevaen'jen

Ana du'shuve isuye antte'cho

¹ Israel ande'su Efraín aindeccu can'jen'cho ccotta'cconi tsu Ramá canqque jin. Tseni tsu can'jen Zuf antiandeccu'su a'i tise inise Elcana. Tsa Elcana tsu Jeroham dutssi'ye. Tise yaya ccashe'ye tsu Eliú. Eliú yaya tsu Tohu. Tohu tsu ñoa'me Zuf dutssi'ye. Nane poiyi'cco tsu israe'su Efraín aindeccu'su.

² Elcanajan dos pusheve an'bian. Fae'cco tsu Ana; faesu tsu Penina. Tsa Peninajan du'shupa. Tsa'ma Anajan du'shu me'cho canse.

³ Poi canqque'fa Elcanajan tisu in'janqquia'caen tisu canqquene sombopa Siloni japoen. Tseni Chigama iñajamba jongoesuma oque oraemba afeye Osha'choma Oshacho Na'su Chiganga. Tse'tti tsu Chigama afa'su na'su Elí dutssiyendeccu, tsa Ofni toya'caen Finees, can'jen'fa. Tsendeccu'qque tsu Na'su Chigama afasundeccu.

⁴ Elcanajan tsa'caen jongoesu aña'choma oque oraemba Chiganga afepa tsa'su nama Peninanga toya'caen poiyi'cco tsambe tsandie du'shu, pushesu dushundeccunga'qque afe.

⁵ Tsa'ma Anama ñoa'me ñotsse in'jamba tisengaja ti'tsse injan'tsse afe. Nane Na'su Chiga Ana du'shuve isuye anttembi'ni'qque toya tsu Elcanajan Anama ti'tsse in'jan.

⁶ Tsa'cansi Peninajan Anama iyicca'yepa tisema noñangiamba fe'ña. Nane ansangiañe tsu in'jan Na'su Chiga tise du'shuve isuye anttembisi.

⁷ Tsa'camba poi canqque'fa Na'su Chiga ettini japa Peninajan tsa'caeñi Anama noñangian. Tsa'caen tsinconsi Anajan i'namba añe chi'ga.

⁸ Tsama attepa tise tsa'ndu Elcanajan su: “Ana, ¿jongoesie qui i'na? ¿Jongoesie qui ñombi'yepa añe chi'ga? ¿Ña quema chonga dushundeccuve an'bia'ma'caen injan'chota ti ñotssimbi?”

⁹ Ccase japa Siloni can'jemba poiyi'cco an nanimba Anajan jangipa Na'su Chiga ettini ja. Chigama afa'su na'su Elíja Chiga etti'su sombo'tti jin'tti siyetani dyaipa Anama atte.

¹⁰ Nane Anajan i'namba injama'cho tsosipie ñombi'yepa Na'su Chigama iñajan.

¹¹ Iñajamba Na'sunga ñoa'me su'chove qquen afa: “Na'su Chiga, que qui Osha'choma Oshacho. Ña quema shondo'suma injan'jemba ñoa'me mende'yepa tsandie du'shuve ñanga afe'ninda gi tsamajan toequi quenga ccase afeya. Afesi tsu quema shondo'suve dapa canseya. Toya'caen tise tosema cha'ttumbe'yi tsu canseya'cho tiseja quembe qquen canjaeñe.”

¹² Tsa'caen Ana bia'ave Na'suma iñajan'jensi Chigama afa'su Elíja aya'fa oya'je'choma atte.

¹³ Nane Anajan injama'cho tsosipie in'jamba pa'ña'tsse afambe'yi Chigama iñajan'jen. Tsa'caen iñajan'jemba aqquia aya'fayi oya'je. Tsa'cansi Elíja “Ccusi tsu” qquen in'jamba

¹⁴ su: —¿Mi'nge'e qui ccusijeya? ¡Tsangaeyi antteja vinoma!

¹⁵ Tsa'ma Anajan su: —Tsa'cambi gi, na'su. Nane vino ni tse'tse'pama cu'imbi gi. Tsa'ma injama'cho tsosipie ñombi'yepa gi pa'cco ña injama'cho in'jan'choma Na'su Chiganga conda'je.

¹⁶ Tsa'cansi ñama ega pushesu qquen in'janjama. Nane cca'i'ccu can'jemba ñoa'me ñombi'yepa vana'jemba gi vani jipa asi'ttaemba Na'su Chigama iñaján can'jen.

¹⁷ Tsonsi Elíja su: —¡Ñombi'yembe japa canseja! Isha tsu Israelmbe Chigaja que in'jamba iñajan'choma afeya.

¹⁸ Tsa'caen susi Anajan “Chigatsuafepaenján” qquen supa ja. Sombopa tise'pa can'jeni japa an. Ccatsse ñombi'ye can'jembi.

¹⁹ Ccaqui a'ta sinte'yi jangipa Na'su Chigama iñajan'fa. Iñajan nanimba toequi tise'pa Ramá canqque'su tsaoni ja'fa. Can'jemba Elcana Anai'ccu fae'ngae can'jensi Na'su Chigaja Ana iñajan'choma in'jan.

²⁰ In'jansi Anajan surie da. Isuya'cho nepisi Anajan tsandie du'shuve isu. Isupa tisema inisian Samuelve. Nane Samuel qquenda tsu “Na'su Chiganima iñajan'cho” qquen su.

²¹ Omboe Elcana, tise pushe Penina, tise dushundeccui'ccu tise poi canqque'fa Chiganga afe'choma afeye, tise Chiganga suya'choma'qque tsoñe ja.

²² Tsa'ma Anajan jambe shanda tise tsa'ndunga qquen supa: —Du'shu toya chochoma anttembichoa'ma angaya'bi gi. Tsa'ma chochoma anttesi gi Chigai'ccu cachuicco'je'ttinga angapa tseni tisema antteye cuintsu tsangae Na'su Chigama shondo'suve daye.

²³ Tsa'caen susi tise tsa'nduja su: —Que in'janqquia'caen tsonjan. Nane ronda'jeja du'shu chochoma anttesi que Na'su Chiganga su'chove tsoñe. Tsa'caen susi Anajan tsaoni can'jemba du'shuma coirapa coeña chochoma antteya'ngae.

²⁴ Tsa'caen chochoma anttesi toya du'shuveyi tise chanjan tisema anga Siloni. Tsa'caen jayipa tres vaura quitsaye du'shu, veinte y dos litro harina, fae ttono botiya vinoma'qque tseni Na'su Chigai'ccu cachuicco'je'ttini anga.

²⁵ Tseni nepipa fae vaura quitsaye du'shuma Chiganga afeye fi'tti. Tsama fi'ttisi Anajan du'shuma na'su Elíni

²⁶ angapa su: —Na'su, ñanda tayoe que dyai'cho pporotsse ccutsupa Chigama iñajan'su pushesu gi.

²⁷ Va du'shuve Chigama iñajansi tsu Na'su Chigaja ñama pañamba ña iñajan'choma ñanga afe.

²⁸ Tsa'caen afesi gi ccane'qque tisema Na'su Chiganga afe cuintsu paya'ngae tisema shondoye. Elíja tsama pañamba puntssamba Chigama iñajan.