1 Reyes 3 - Cofán: Chiga Tevaen'jen

Salomón injama'pa've daya'cho

³ Salomónjan Na'su Chigama ñotsse in'jamba pa'ccoma tise yaya David'ye mandaqquia'caeñi in'jamba tsa'caen manda'je. Tsa'can'ma ccotta'cco'su Chiganga afe'je'ttinga japa afe'choma Chiganga afepa ñome'bama'qque oque oraen.

⁴ Nane Gabaón afe'je'ttinga afeye japa afe'choma milve fi'ttipa oquepa Chiganga afe. Tsa Gabaón tsu ti'tsse joccapitssia ccotta'cco'su afe'je'tti.

⁵ Fae cose Salomón Gabaóni can'jemba ayo'osi Na'su Chiga tisenga attiamba su: “Jongoesuve in'jan'da ñama iñajanjan. Ña gi afeya.”

⁶ Pañamba Salomónjan su: “Quema shondo'su ña yaya David'yenga qui ñoa'me ñotsse tson. Nane tise quema ñotsse pañamba ñotsse cansepa tise injama'choni ñotsse tsoñe in'jansi qui tisema ñotsse tson. Ja'ño a'tangae tisema ñotsse tsomba tisenga dutssi'yema afe cuintsu tise manda'je'chonga ca'niñe.

⁷ Nane, Na'su Chiga, queja ña Na'su. Queja ñama ande na'suve tson ña yaya'ye manda'je'chonga ca'niñe. Mapán toya chu'apa ma'caen mandaye atesumbi'ni'qque qui ñama ca'nia.

⁸ Tsa'ma ja'ño quema shondo'su gi va que in'jamba ttu'se'cho aindeccuma mandaya'cho. Nane que aindeccuja ñoa'me tsain'bio'pa agattoye oshambi'tssi.

⁹ Tsa'cansi in'jan gi ña quema shondo'sunga que afesi ñajan jongoesu tsu ñotsse tson'cho qquen in'jamba, jongoesu tsu egae tson'cho'qque in'jañe. Nane tsa'caen in'jamba gi que aindeccuma ñotsse mandaya. Nane tisuyi gi oshambi va que in'jan'cho aindeccuma mandaye.”

¹⁰ Salomón tsa'caen in'jamba afasi Na'su Chigaja avuja.

¹¹ Avujapa su: “Bo'tsse canseye ni ricove daye ni quei'ccu iyiccosundeccu junde paye afambi'ma qui tisu aindeccuma ñotsse pañamba mandaye afasi

¹² gi tsa'caen quenga afeya. Nane que injama'choma gi in'jaeña que ñoa'me injama'pave dasi cuintsu ni tayo canse'cho ni jai'ngae canseya'cho a'i quema patsumbe can'faye.

¹³ Toya'caen que afambi'choama'qque gi quenga afesi qui ricove dapa joccapitssia've daya. Nane que cansuiteta tsu faesu ande na'suja quia'caen ti'tsse'tssiya'bi.

¹⁴ Toya'caen que ñama ñotsse pañamba que yaya David'yema tsonqquia'caen pa'cco ña mandapa in'jan'chove tson'ninda gi antteya cuintsu que bo'tsse canseye.”

¹⁵ Tsonsi Salomón qquendyapa bittapa in'jan tisu ayo'o'choma. Tsa'caen in'jamba toequi Jerusaléni japa Chiga a'i'ccu injancco'fa'cho cafonga catsepa fi'ttipa afe'choma oque o'raemba Chiganga afe Chigai'ccu ñoquiye.