1 Reyes 19 - Cofán: Chiga Tevaen'jen

Elías Horeb ccotta'cconi ccuya'cho

¹ Jezreelni nepipa Acabja tise pushe Jezabelnga osha'chove Elías tson'choma conda. Toya'caen Elías poiyi'cco Baal aya'fama afasundeccuma fittitti'choma'qque conda.

² Pañamba Jezabelja conda'suma Elíasnga moe cuintsu japa qquen condaye: “Que Elías tsa'caen tson'chone gi ña Jezabel'qque quema tsa'caen tsoña. Nane tu'i ja'ñoa'can'ni qui que'qque tsa Baal aya'fama afasundeqquia'caen paya. ¡Tsambi'ta cuintsu chigandeccu ñama tsa'caen tson'faja!”

³ Elíasja tsama pañamba dyopa ccuyain ja tisuma ccushaeñe. Nane Judá ande'su Beersebani japa tseni tisema shondo'suma cati.

⁴ Tsama catipa ti'tsse joccani a'i menia ja. Fae a'ta pa'cco japa quimbipa dyai fundui'si quini'jin tsosiccuni. Ñombi'yepa paye in'jamba Na'sunga su: “Nanitssi tsu, Na'su. ¡Antteja cuintsu ña paye! Nane ñanda gi ña tayopisundeccuma ti'tsse ñotssimbi.”

⁵ Tsa'caen supa fundui'si quini'cco tsosiccunga ccuipa ana. Tsa'ma Chigama sefacconi'su shondo'su jipa tisema pporaemba su: “¡Jangipa anjan!”

⁶ Elíasja piyicamba atte tise tsove pporotsse tseyi cuname si'ngenga matssan'cho pan toya'caen tsa'ccu tsoripa ccutsu'choma. Attepa jangipa amba cu'i. An nanimba ccase ccuipa ana.

⁷ Tsa'ma ccase Na'su Chigama shondo'suja jipa Elíasma pporaemba su: “Jangipa anjan. Nane que jaya'cho tsu ñoa'me bia'a; ambita qui utunga quimbiya.”

⁸ Tsa'caen susi Elíasja ccase jangipa amba cu'i. Tsa anqque'su tsu tisema quiñaen cuarenta a'ta, cuarenta cose'qque japa Horeb ccotta'cco, tsa Chiga Moisési'ccu condase'cho ccotta'cconga nepiya'ngae.

⁹ Horebni nepipa tseni'su fattocco changonga ca'nimba ana. Tsa'caen can'jensi Na'su Chiga tisenga jipa iñajampaña: “¿Micon'jen qui va'tti, Elías?”

¹⁰ Pañamba Elíasja su: “¡Na'su Chiga, queja Osha'choma Oshacho! Anttembe'yi gi ñajan quema ñotsse in'jan. Nane israendeccuja que tise'pai'ccu condasecco'choma chi'gapa quenga afeye oque'je'choma asitta'fa. Toya'caen matichi'ccu tsu que aya'fama afasundeccuma fi'tti'fa. Tsa'caen tson'jen'fasi fae, ñañi gi, que aya'fama afa'suja toya canse. Toya'caen tsu ñame'qque ja'ño ttatta'je'fa ñama fi'ttiye.”

¹¹ Tsa'ma Na'suja su: “¡Fattocco chango'ye sombopa ccotta'cconi ñanga ccutsuja!” Tsa'caen supa tse'faei'ccuyi Na'su Chigaja jipa panshaen. Nane quian'me fingiansi ccotta'cco dosi patu'qque ucca sheque. Tsa'ma Na'suja tsa fingiani can'jembi. Fingiama omboe tsu ande oya. Tsa'ma Na'suja ande oya'je'choni can'jembi.

¹² Ande oya'je'choma omboe tsu si'nge ji. Tsa'ma Na'suja tsa si'ngeni can'jembi. Tse'i si'ngema omboe tsu pañaen chipiri aya'fa.

¹³ Elíasja tsama pañamba tise omba'su ondiccu'jei'ccu camba'juma piccopa sombopa fattocco chango cani'jen'ttinga japa ccutsu. Tseni ccutsusi aya'fa tsu jipa tisema qquen iñajampaña: “¿Micon'jen qui va'tti, Elías?”

¹⁴ Pañamba Elíasja su: “¡Na'su Chiga, queja Osha'choma Oshacho! Anttembe'yi gi ñajan quema ñotsse in'jan. Nane israendeccuja que tise'pai'ccu injancco'fa'choma chi'gapa quenga afeye oque'je'choma asitta'fa. Toya'caen matichi'ccu tsu que aya'fama afasundeccuma fi'tti'fa. Tsa'caen tson'jen'fasi fae, ñañi gi, que aya'fama afa'suja toya canse. Toya'caen tsu ñame'qque ja'ño ttatta'je'fa ñama fi'ttiye.”

¹⁵ Tsonsi Na'su Chigaja Elíasma su: “Japa toequi Damasconi'su a'i menia jaja. Tseni nepipa Hazael tsovenga aseitema fiñamba Siria ande'su na'suve fetija.

¹⁶ Tsa Nimsi omba'su dutssi'ye, Jehúma'qque ttu'sepa fetija Israel na'suve. Toya'caen Abel-mehola canqque'su Safat dutssi'ye Eliseoma ttu'sepa fetija cuintsu quema omboe Chiga aya'fama afa'suve daye.

¹⁷ Tsendeccuma tsa'caen tsonsi majan Hazael matichima ccusha'ninda tsu tsamajan Jehú fi'ttiya. Toya'caen majan Jehú matichima ccusha'ninda tsu tsamajan Eliseo fi'ttiya.

¹⁸ Tsa'ma ñotsse in'janjan: Toya tsu siete mil israendeccu can'jen'fa toya Baalnga puntssamba mochambindeqquia.”

Eliseoma ttu'se'cho

¹⁹ Elíasja tsene sombopa japa Eliseoma cachui andema dyandya'je'choma. Nane Eliseo tsu sema'su vaurai'ccu semamba an'ccoma qquitssa'je andema dyan'dyaye joña'chove. Nane tisema o'tie tsu dose qquitssapa dyandya'je'cho–poiyi'cco tsu dos vaura. Eliseo tsu omboe jiña'cho dosma asittaen'su. Elíasja Eliseoma cachuipa tise omba'su oppoen'cho sarupai'ccu Eliseonga catsepa oppoen.

²⁰ Tse'faei'ccuyi Eliseoja Elíasma shondoye ttu'se'choma pañamba tise sema'su vaurama anttepa Elíasnga butto catsepa su: —Antteja ñama ña yaya ña mamama'qque mochapa chigambian'gaye. Tsa'caen tsomba gi quei'ccu jacaña. Tsa'caen iñajansi Elías su: —Japa tsa'caen tsonjan. Quema se'pimbi gi.

²¹ Anttesi Eliseoja tise tsaoni japa tise dyandya'je'cho vaura dosma fi'ttipa gettipa si'ngenga ishoen. Nane andema dyandya'je'cho an'cco osha'cho tsani jincho'choma'qque si'ngenga oquepa tsai'ccu aña'choma ishoemba poiyi'cco a'ima o'fian. O'fiamba já Elíasma omboe tisema shondo'suve.