1 Reyes 18 - Cofán: Chiga Tevaen'jen

Ccase Elías Acabma cachui'cho

¹ Tres canqque'fa pasapa ccase Na'su Chigaja Elíasma afapa qquen su: “Japa Acabma cachuija. Nane antteya gi cuintsu unjin andenga ccase tuiye.”

² Na'su tsa'caen susi Elías japa Acabma cachui.

¹⁷ Acabja tisema attepa su: —¿Que ti qui ji, tsa Israel ande'suma noñangian'su?

¹⁸ Tsa'ma Elíasja su: —Ñajan Israelma noñangian'sumbi gi. Tsa'ma que toya'caen que aindeccu Na'su Chiga manda'choma catipa Baal chigandeccuma iñajamba qui Israelma noñangian'fa.

¹⁹ Ja'ño mandaja cuintsu poiyi'cco israendeccu Carmelo ccotta'cconga bo'faye. Toya'caen mandaja cuintsu tsa cuatrociento cincuenta Baal aya'fama afasundeccu, tsa Jezabel in'jamba coira'je'cho cuatrociento Asera aya'fama afasundeccu'qque tseni bo'faye.

Baalma afasundeccui'ccu cama'cho

²⁰ Elías tsa'caen susi Acabja manda cuintsu poi israendeccuma ttu'se'faye. Toya'caen tsu poi Baal aya'fama afasundeccuma ttu'sepa boña Carmelo ccotta'cconga.

²¹ Tsonsi Elíasja poi aindeccunga catsepa su: —¿Mi'nge'e qui tsa'caen dosve in'jamba canse'fa'ya? Na'su Chiga ñoa'me Chigamanda tsave in'jan'faja. Tsambi'pa Baal ñoa'me Chigamanda tsu tsave in'jan'faya'cho. Tsa'caen susi a'i bo'choja afa'fambi.

²² Tsonsi ccase afapa Elíasja su: —Fae ñañi gi Na'su Chiga aya'fama afa'suja ccushapa canse. Tsa'ma Baal aya'fama afasundeccuja cuatrociento cincuenta a'i tsu.

²³ Ñotssi tsu inginga afeye dos vaura quitsaye du'shuma. Tsonsi tsu Baal aya'fama afasundeccu fae'ccoma fi'ttipa gettipa si'tsinga ccuiñaña'cho. ¡Tsa'ma si'ngema setsaembe'yi can'faja! Tsa'caen tsonsi ña'qque faesu vaura quitsaye du'shuma fi'ttipa cca'ttinga ñoñamba si'tsinga ccuiñaña. Ña'qque gi si'ngema setsaeña'bi.

²⁴ Tsa'caen ñoñamba que'ija que'i chigandeccuma iñajan'faja. Ña'qque Na'su Chiga Quitsama gi iñajaña. Majan chiga si'ngema sefaccone moe'da tsaya tsu ñoa'me Chiga. Tsonsi tsu poiyi'cco a'i su'fa: —Tsa'caen tsoñe ñotssi tsu.

²⁵ Tsonsi Elíasja Baal aya'fama afasundeccuma su: —Que'i tsain'bitssiapa o'tie fae vaura quitsaye du'shuma isupa ñoña'faja. Ñoñamba que'i chigama iñajan'faja. Tsa'ma si'ngema setsaen'fajama.

²⁶ Tsa'caen susi tise'panga afe'cho vaurama isupa ñoña'fa. Ñoña ccuiñamba sinte ashaen'cho enttinge a'ta'o'tsse Baalma iñajan'fa qquen supa: “¡Baal, pañamba afaja!” Toya'caen butto ccutsu butto ccutsu ñoña'cho oque'je'choma shoquendi'je'fa. Tsa'ma minga'vieyi'qque afambi.

²⁷ Enttinge a'ta nepijisi Elíasja tise'pai'ccu feñamba su: —¡Tiseja ñoa'me chiga tsu! ¡Ti'tsse quian'me fundo'faja! Isha tsu toya sema'jemba pañambi'ya. ¿Tsambi'ta ti cco'pa'su ja? Isha tsu pasia'suta ja'ya. Tsambi'pa ana'jen'ninda tsu qquendyaeña'cho.

²⁸ Tsa'ma Baal aya'fama afasundeccuja toya fundo'jepa tisupama chhiyi'fa chhichhi'ccoi'ccu toya'caen satai'ccu cuintsu tise chigandeccu tisema mende'ye'faye. Nane tise'pa in'janqquia'caen tsu tsa'caen tson'fa anjampa tssañangae.

²⁹ Tsa'caen tson'jen'fasi chiga onduse'ni'qque toya tsu si'nge sefaccone amppimbi. Nane fundopa sumbia'caen buttopa'je'fa sime'su Chiganga afeya'cho nepiya'ngae. Tsa'ma si'ngeja sefaccone amppimbi. Majameñi'qque pañambi ni afambi.

³⁰ Tsonsi Elíasja poiyi'ccoma ttu'sepa su: —Ñani catse'faja. Poiyi'cco a'i tisenga catsesi Elíasja Na'su Chiga Quitsanga afe'choma oque'je'cho tayo catiye'choma ccase ñoñañe ashaen

³¹ doce patuve isupa. Nane tayopi'su Jacob'ye Chiga tisema Israelve inisiainte doce dutssiyendeccuve an'bian. Tsendeccu'ye tsu israe'su doce aindeccuja sombo'fa. Tise'pa'ye tsu Elíasja tsa'caen doce patuve isupa

³² tsai'ccu Na'su Chiganga afe'choma oque'je'chove ñoña. Ñoña nanimba tsambe utufama shoquendi'e andema dyan'dya tsanga tsa'ccu bo'ya'chove. Nane tso'si'e tsu pa'fu jongoesu injan'tssia'ma on'boeña'ca'en, cuatro, tsambi'ta cinco galónme.

³³ Tsomba si'tsima ccuiñamba vaurama gettipa tsanga ccuiña.

³⁴ Omboe tsu su: —Cattufayi apive tsa'ccuma on'boemba tsama fiñajan afe'cho vaura nanga toya'caen si'tsinga'qque. Omboe manda tsa'caen dos se toya'caen tres se fiñañe. Mandasi tsa'caen tson'fa.

³⁵ Tsa'ccuja tsa'caen pa'ccoma tssipoemba oque'je'choma shoquendi'e tsa'ccu bo'ya'chove ñoña'chonga on'ba.

³⁶ Tsonsi Chiganga afeya'cho hora nepisi Chiga aya'fama afa'su Elíasja catsepa quian'me su: “Na'su Chiga, Abram, Isaac toya'caen Israel Chiga, ja'ño a'ta canjaenjan cuintsu poiyi'cco atesu'faye queja ñoa'me Israel Chigave. Toya'caen canjaenjan cuintsu atesu'faye ñajan quema shondo'supa que mandasi ja'ño que suqquia'caen vama tson'jen'chove.

³⁷ ¡Na'su Chiga, ñama pañajan! Ñama pañajan cuintsu va aindeccu que ñoa'me Na'su Chiga qquen in'jan'faye; toya'caen cuintsu que tise'pama ttu'se'choma pañamba quenga toequi ji'faye.”

³⁸ Tse'faei'ccuyi Na'su Chigambe si'ngeja sefaccone amppipa afe'cho vaurama oque cati. Nane vaura, toya'caen si'tsi, patu, andema'qque oque catipa pa'cco tsa'ccuma'qque metsse oque cati.

³⁹ Tsama attepa poiyi'cco a'i camba'jui'ccu andenga puntssamba su'fa: “¡Na'suja ñoa'me Chiga tsu! ¡Na'suja ñoa'me Chiga tsu!”

⁴⁰ Tsa'caen su'fasi Elíasja su: —¡Baal aya'fama afasundeccuma junde indi'faja! ¡Ni fae'ccoma antte'fajama cuintsu ccuyaye! Tsa'caen susi aindeccuja tsendeccuma indi'fa. Indi'fasi Elíasja poiyi'ccoma Cisón nai'quini angapa tseni fitti'tti.

Elías unjime Chigama iñajaña'cho

⁴¹ Omboe Elíasja Acabma su: —¡Japa amba cui'jeja! ¡Nane tayo gi unjin jen'fama paña!

⁴² Tsa'caen susi Acab amba cu'iye ja. Tsa'ma Elíasja Carmelo ccotta'cco tansin'choni ansundepa dyai. Dyaipa tise camba'juma tsutta'cho enttingenga puntssamba

⁴³ tisema shondo'sunga su: —Japa marnima canjan. Japa camba jipa su: —Me'i'on tsu. Tsa'ma Elíasja siete se tsa'caen manda: —¡Japa canjan!

⁴⁴ Seis se japa jongoesuma attembipa siete se japa jipa shondo'suja su: —Jone mar'ye chipiri unjimba jangijiqquia'caen gi atte. Nane chipiri tsu, a'i tiveacan'cco. Tsonsi Elíasja su: —Japa Acabma suja cuintsu tise sundaro cavayo caroma ñoñamba otsepa uta'tsse japa andeye, unjin tisema indisa'ne.

⁴⁵ Pañamba Acabja tise caronga otsepa Jezreelni ja. Tise jasi sefacco unjimbai'ccu si'en dasi fingian'qque jangi. Tsonsi unjinjan pa'choa've tuiye ashaen.

⁴⁶ Tsa'ma Elíasja, Na'su tisema quiñaesi, tise ondiccu'je'cho sarupama ñoñamba quian'me buttopa japa Acabma o'tie nepi Jezreelni cani'jen'ttinga.