1 Reyes 17 - Cofán: Chiga Tevaen'jen

Elías ande sambaya'chone condase

¹ Tsonsi Chiga aya'fama afa'su Elías tsa Galaad ande'su Tispe canqque'su a'i, jipa Acabma su: “Na'su Chiga Quitsa, tsa Israel Chiga, mandasi pañamba gi quenga ñoa'me su: Ja'ño va canqque'fani unjinjan tuiya'bi ni surunoñi'qque andema tssipoeña'bi ña pasaya'chove suya'ngae.”

² Tsa'caen afasi Na'su Chigaja Elíasma su:

³ “Vane sombopa chiga sombo'jeni jaja Jordán na'en jonifani. Querit nai'quini japa tseni a'tuja.

⁴ Tseni can'jemba qui tsa nai'qui'su tsa'ccuma cu'ipa canseya. Toya'caen gi mandaya seña'bama cuintsu anqque'suma ipa quenga afe'jeye.”

⁵ Tsa'caen susi Elíasja Na'suma pañamba tsa'caen tson. Sombopa japa Querit nai'qui jini can'jen Jordán na'ema chiga sombo'jefani.

⁶ Tseni can'jensi tsu seña'baja pan toya'caen aña'choma ipa tisenga afe'je sinte toya'caen sime'qque. Tsa'caen can'jen'ni Elías cui'je'cho

⁷ nai'qui'su tsa'ccu'qque samba. Nane pa'cco andeni unjin tuimbisi tsu tsa'caen samba.

Tsandupajen'cho tsaoni can'jen'cho

⁸ Nai'qui sambasi Na'su Chigaja Elíasma su:

⁹ “Jangipa Sidóni'su Sarepta canqqueni japa tseni can'jenjan. Tayo gi manda tseni canjen'su tsandupajen'cho cuintsu que tseni can'jensi quema ofian'jeñe.”

¹⁰ Na'suma pañamba Elíasja jangipa Sareptani ja. Tseni nepipa canqqueni cani'jen'tti tsandupajen'cho si'tsive ttatta'je'choma atte. Attepa Elíasja tisema ttu'sepa su: —Chigáne tasa chipiringa re'ricco tsa'ccuve ñambe ija ña cu'iye.

¹¹ Tsandupajen'cho pañamba inga'su jayisi ccase Elíasja ttu'sepa su: —Chigáne toya'caen fae panme ija ña añe.

¹² Tsa'ma tsandupajen'choja su: —Na'su que Chiga ñama paña'jen'ni gi su: matssan'cho panme mecho gi. Nane panme ñoñaqque'su fae pafu'cco, toya'caen re'ricco yayapave'qque fae botiyani gi an'bian. Tse'ccoan matssamba ña du'shui'ccu añe gi re'ricco si'tsive ttatta'je. Ja'ño pa'ccoma amba poiyi'cco qquipoe'supa paye.

¹³ Tsa'ma Elíasja su: —¡Dyombe canjan! Japa que suqquia'caen matssanjan. Tsa'ma o'tie ñambe tse'ccoan re'rije'ccoe ñoñamba ipa afeja. Ñanga o'tie matssamba afepa omboe quembe, que du'shumbe'qque matssanjan.

¹⁴ Nane Na'su, Israel Chiga tsu su: que panme ñoñaqque'su ni que yayapa'qque sefaya'bi ccase Chiga anttesi unjin va andenga tuiya'ngae.

¹⁵ Tsa'caen susi tsandupajen'choja japa tise suqquia'caen tson. Tsa'caen tsomba tise, tise du'shu, toya'caen Elías'qque bo'tsse anqque'suma an'bian'fa.

¹⁶ Nane panme ñoñaqque'su api'qque sefambitssi. Toya'caen yayapa botiya'qque sefambitssi tsu. Na'su Elíasma afaenqquia'caen tsu sefambitsse canse.