1 Reyes 12 - Cofán: Chiga Tevaen'jen

Israel Judá'ye attufa'cho

¹ Poi israendeccu Siquemni ja'fa Roboamma na'suve tsoñe. Roboam tseni jasi

² Jeroboam'qque Egiptoni can'jen'cho pañamba ji. Nane na'su Salomón tisema iyicca'yesi Egiptoni ccuyapa can'jen'cho tsu.

³ Tisema ttu'se'fasi jipa poi Israel aindeccu'su bo'fa'choi'ccu Roboamnga catsepa su'fa:

⁴ —Que yaya'yeja quian'me ingima mandapa semoen. Ja'ño que na'suve dapa tsa'caen semoembipa ni panshaen semañe mandambiya'ninda gi quema shondo'faya.

⁵ Tsa'caen afasi Roboamjan su: —Japa tres a'ta pasasi ccase bopa ji'faja. Tsa'caen susi aindeccu

⁶ ja'fasi Roboamjan tise yaya Salomón'ñe cansuite tisema shondo'su coenzandeccuma iñajampaña: —¿Jongoesu qquen qui asi'ttaen'fa ña va aindeccuma suya'chove?

⁷ Tise'paja su'fa: —Queja ja'ño ñoa'me va aindeccuma fuiteye in'jamba tise'pama ‘Jujú’ qquen susi tsu tsangae quema shondo'faya.

⁸ Tsa'ma Roboamjan coenzandeccu su'choma chi'gapa tisui'ccu coen'fa'cho chu'a tsandiendeccu majan tisuma shondosundeccuma

⁹ iñajampaña: —Da que'ija ¿jongoesu qquen qui asi'ttaen'fa va ‘¡Que yaya'ye'caen ingima semoenjama!’ qquen su'chondeccuma?

¹⁰ Tsonsi chu'a tsandiendeccu tisei'ccu fae'ngatsse coen'fa'chondeccuja su'fa: —Va ‘¡Que yaya'ye'caen ingima panshaen semoenjama!’ qquen su'chondeccungata tsu qquen suya'cho: ‘Ña yaya'ye quian'me semoen'ninda gi ñajan ti'tsse quian'me semoeña.

¹¹ Ña yaya'ye sema'jen'cho panshaen aiye'pa'ta tsu ñambeja ti'tsse aiye'paya. Tise'be semoesundeccu utuqui'fai'ccu ma'ppipa semoen'fa'ninda tsu ñambeja nojansifai'ccu ma'ppipa semoen'faya.’

¹² Tres a'ta pasasi Jeroboamjan poiyi'cco aindeccui'ccu ccase jipa Roboamnga catse'fa tise suqquia'caen.

¹³ Bo'fasi na'suja coenzandeccu in'jan'choma catipa iyu'uye afa.

¹⁴ Nane chu'a tsandiendeccu in'jan'choma afa cuintsu tise yaya'ye sema'jen'cho panshaen aye'pa'ta tise'beja ti'tsse aiye'paye. Toya'caen tise yaya'yembe semoesundeccu utuqui'fai'ccu ma'ppipa semoen'ninda cuintsu tise'be semoesundeccuja nojansifai'ccu ma'ppipa semoen'faye.

¹⁵ Na'su Chiga tsa'caen anttesi tsu na'su Roboamjan aindeccu su'choma in'jambi, cuintsu Na'su Chiga tayoe Jeroboamnga suqquia'caen somboye. Nane tayo tsu Chiga aya'fama afa'su Ahías tsa'caen Jeroboamnga conda, tsa Silo canqque'su Nabat dutssi'yenga.

¹⁶ Israel aindeccuja tsa'caen na'suja supa tise'pama in'jambi qquen in'jamba qquen settapoemba afa'fa: “Ingija ñoa'me David aindeccumbi. Isaí dutssi'ye tsu faesu a'i. ¡Tisupa tsaoni ja'faja israendeccu! ¡Davidta tsu tisu a'iveyi coiraya!” Tse'faei'ccuyi poi israendeccu tisupa tsaoni ja'fa.

¹⁷ Tsa'ma poiyi'cco majan Judá andeni can'jen'cho israendeccu tisema paña'fasi Roboamjan tsendeccuma manda.

¹⁸ Omboe na'su Roboamjan aindeccuma semoen'su Adorama manda cuintsu a'ima semoeñe. Tsa'ma poi israendeccu patuma isupa ttova'ccoen Adorama fi'tti'fa. Tsonsi dyopa Roboamjan cunshoa'me tise caronga otsepa Jerusaléni ccuyapa ja.

¹⁹ Tsa'caen tsu israendeccuja David manda'choma chi'gapa joqquitssi'fa. Ja'ño a'tapan tsu tsa'cañi.

²⁰ Jeroboam tsa'caen Israel andeni toequi jisi poi israendeccu pañamba tisema ttu'se'fa cuintsu bo'fa'chonga jiye. Jisi tisema na'suve tson'fa cuintsu poi israendeccuma mandaye. Jo'su Judá aindeccuyi tsu David manda'choma in'jamba Roboamma paña'fa.

Jeroboam chigave ccutsian'cho

²⁵ Tsonsi Jeroboam Efraín aindeccu'su ccotta'cconga japa Siquem canqqueni can'jen. Canqquema ccase ñoñamba tise sundarondeccuma'qque tseni ccutsian. Omboe tsu tsa'caeñi tson Penuel canqquema'qque.

^26-27 Tsomba Jeroboamjan asi'ttaen: “Isha tsu poiyi'cco a'i Jerusaléni Chiganga afe'choma Na'su Chiga ettinga angapa afeye ja'je'fasita ccase David manda'choja quin'anme dapa ñama patsuya. ¿Toya'caenda ti tseni japa Judá na'su Roboamme in'jamba ñama fi'ttipa na'su Roboamma shondo'faya'bi?”

²⁸ Tsa'caen tisema fuitesundeccuma iñajampañamba tsu dos corima ñoña'cho vaura quitsaye'can'me ñoñamba aindeccunga su: “Israendeccu, nanitssi tsu que'i Jerusaléni japa ji'je'cho. Vani qui que'ima Egipto'ye somboen'su chigandeccuma an'bian'fa.”

²⁹ Tsa'caen supa tsu fae'ccoma ccutsian Betelni; toya'caen faesumajan Dan canqqueni.

³⁰ Tsonsi tsu israendeccuja Betelni toya'caen Danni japa tsa corima ñoña'cho vaura quitsayendeccuma chigama'caen iñajamba egae tsincon'fa.

³¹ Toya'caen tsu Jeroboamjan faesu chigama iñajan'jen'ttive ñoñamba faesu a'i Levi'sumbi'choa'ma injanga ttu'sepa ccutsian tsa chiga'can'ma afa'suve dapa cuintsu iñajan'jen'ttima coiraye.

³² Toya'caen tsu tsa chigama iñajaña'cho a'tave afa tsa ccovu ocho'su a'ta quincema. Nane Judáni Chigama iñajamba afe'choma oque oraemba afeqquia'caen tsu fae'ngatsse fiestaen'jeñe manda. Tsa'caen tsu Jeroboamjan Betelni japa ñoña'cho cori vauranga oque oraen'jen. Nane tsa chiga'can'me iñajan'jen'ttima Betelni ccutsiamba tseni'su afasundeccuma'qque ccutsiamba tseni Betelni japa ñoña'cho vaurama iñajan'jen'ttinga afe'choma afe.

³³ Jeroboamjan tisu injama'choni in'jamba tsa ccovu ocho'su, a'ta quince'qque tsu tise Betelni ñoña'cho chigama iñajan'jen'ttinga ansundepa afe'cho ñome'bama oque oraen. Tsa'caen oque oraemba tsu manda cuintsu israendeccu'qque tsequi a'ta chiga'can'ma iñajamba fiestaen'faye.