1 Reyes 10 - Cofán: Chiga Tevaen'jen

Sabá'su na'su pushesu

¹ Tsomba tse'i Sabá ande'su na'su pushesu Salomón joccapitssia've dapa tsa'caen Na'su Chiga Quitsaja ñotssia qquen canjen'choma pañamba Jerusaléni ji Salomónma aiye'pa iñajampaña'choi'ccu iñajampañamba atesuye.

² Jipa tsu Jerusaléni nepi tsain'bio anduqque'su cameyoi'ccu. Nane cameyo tsu ñome'ba, tsain'bio cori, toya'caen bare'cho patuma'qque andupa i'fa. Tsa'caen jipa Salomóni'ccu condasepa pa'cco tisu in'jan'choma tisema iñajampaña.

³ Tsa'caen iñajampañasi pa'cco in'jan'choma tansintsse conda. Nane me'i'on tsu panshaen aiye'pasi tise condaye oshambi'choa've.

⁴ Tsonsi Sabá'su na'su pushesuja Salomón tsa'caen injama'pasi in'jamba toya'caen tise ñotssia na'su tsa'ove tsao'ña'cho,

⁵ tise anqque'suma'qque attepa can'boen ccutsu. Nane tise nasundeccu ma'caen ñotsse dyaisi ofian'jen'cho, shondosundeccu ñotsse ondiccupa ofian'jen'choma, toya'caen vino tasama cuiñasundeccuma attepa tsu can'boen ccutsu. Toya'caen Salomón Na'su Chiga ettini japa aña'choma afepa oque oraen'jen'choma attepa tsu ñoa'me afambi'tsse can'boen ccutsu.

⁶ Can'boemba tsu Salomónma su: “Toya ña andeni can'jemba gi tansintsse condase'choma paña que ma'caen injama'pave dapa joccapitssia've tson'jen'chone.

⁷ Tsa'ma aqquia enttingeveyi tsu ñanga conda'fa. Nane toya jipa attembi'ta in'jambi gi que injama'cho ma'caen injama'pave da'choma. Toya'caen que ricove da'cho'qque tsu ña paña'jen'choma ti'tsse'tssi.

⁸ ¡Avujatssiya tsu queni'su tsandiendeccuja! ¡Avujatssiya tsu quema shondosundeccu'qque! ¡Nane tsangae tsu quenga ccutsupa que injama'pave dapa afa'choma paña'jen'fa!

⁹ ¡Ñoa'me ñotssia tsu Na'su que Chigaja! ¡Quema tsu ñotsse in'jamba ccutsian Israel na'suve tsoñe! Nane Na'su Chiga tsu Israel aindeccuma tsangae ñotsse in'jamba quema tise'pa na'suve ccutsian. Tsa'caen tsu quema tson que injama'choi'ccu tansintsse in'jamba tise'pama ñotsse mandaye.”

¹⁰ Tsa'caen na'su Salomóni'ccu condasepa tsu tisenga corima afe tres mil noveciento sesenta kilove. Toya'caen tsu tsain'bio bare'cho ñome'ba, bare'cho patuma'qque afe. Nane minguite'qque tsu tsa'cantssi ñome'ba ccase jimbi Seba ande'su na'su pushesu na'su Salomónga afeqquia'caen.