SALMOS 98 - El Nuevo Testamento y Salmos

Tavástaraꞌ pu arí jatáaꞌsacaꞌ ɨ tɨ jɨn tyuꞌtyámueꞌtɨn

Chuíicarij

¹ ¡Siataꞌaj jájcuacan tyuꞌtáchuiicaj ɨ Tavástaraꞌ jimi, jiꞌnye tyámuaꞌ pu vaꞌcán jɨn tyúꞌruuj tajimí ɨ tyaj jɨn jeꞌej tyoꞌtaséj! ¡Puꞌríj jatáaꞌsacaꞌ ɨ tɨ jɨn tyuꞌtyámueꞌtɨn aꞌɨ́jcɨ jɨmeꞌ ɨ tɨ néijmiꞌi jɨn putyíꞌuurej, ajta ɨ jumuácaꞌ jɨmeꞌ tɨ tyámuaꞌ een!

² Ɨ Tavástaraꞌ pu arí jaataxájtacaꞌ ɨ tɨ jɨn tyuꞌtyáamueꞌtɨj, ajta arí jaataséjratacaꞌ ɨ tɨ jɨn tyámuaꞌ tyáꞌxaꞌpuɨꞌɨntareꞌ aꞌɨ́ɨmaj mu mij jaaséj ɨ maj aꞌyan huacháatɨmee ɨ cháanacaj japua,

³ aꞌnáj tɨnaꞌaj pu jitzán séejreꞌ ɨ tɨ jɨn tyúꞌxɨeꞌveꞌ ajta ɨ tɨ jɨn tyámuaꞌ tyíꞌtyevij aꞌɨ́ɨjma jimi ɨ tyeɨ́tyee ɨ maj Israel jitze ajtyámaꞌcan. ¡Majta meríj néijmiꞌi jaaséj aꞌájna ɨmuáj joꞌtɨj ɨ cháanacaj jooꞌástɨmee aꞌɨ́jcɨ ɨ taj Dios tɨ jɨn tyuꞌtyáamueꞌtɨj!

⁴ Xuutyámuaꞌveꞌej xu setyuꞌtáchuiicaj ɨ Dios jimi, mu siaj yan huacháatɨmee néijmiꞌqueꞌ ɨ cháanacaj japua; jéehua xu naa tyityatóotyamuaꞌveꞌen siajta jimi tyuꞌtáchuiicaj.

⁵ Setyuꞌtáchuiicaj ɨ Tavástaraꞌ jimi aꞌɨ́jcɨ jitze setyiꞌcuíinaj ɨ arpaj, siajta aꞌɨ́jcɨ jitze canárij tɨ tyeꞌejvivin.

⁶ Siataꞌaj jutyamuaꞌveꞌej setyuꞌtáchuiicaj aꞌɨ́jcɨ jimi ɨ Tavástaraꞌ, ɨ tɨ Rey puéꞌeen, siajta néijmiꞌi aꞌɨ́jcɨ jitze ɨ cɨꞌsítyeꞌrij tɨ tyíꞌsejreꞌ.

⁷ Cheꞌ huatánamuajreꞌen ɨ jájrij ajta néijmiꞌi aꞌɨ́j tɨ jitze tyíꞌsejreꞌ, ɨ cháanacaj majta ɨ maj japuan huacháatɨmee;

⁸ cheꞌ ajta huatánamuajreꞌen ɨ játyaꞌnaj; micheꞌ antyóosɨɨreꞌen ɨ jɨríj mej mij huajíjhua muutyámuaꞌvaꞌaj

⁹ aꞌɨ́jcɨ jimi ɨ Tavástaraꞌ, ɨ tɨ mujoꞌvéꞌmej tɨꞌij tyuꞌtaꞌíjtaj ɨ cháanacaj japua. Aꞌɨ́ɨ pu tyuꞌtaꞌíjtaj tɨꞌɨj naꞌaj tyiꞌchájtaꞌnajmee íiyan ɨ cháanacaj japua tyámuaꞌ tyuꞌtoojéꞌyacan jɨmeꞌ ajta juxaꞌaj naꞌaj tyihuoꞌtaꞌíjtyeꞌsij.